Mathiew 18 - Wëël Jwøk

Pwöc Kiper Ŋato Kare Dwøŋ Yi Buya Käl Maal

¹ 'Ba kanyøgø bääŋi aö baŋ Jecu, ni köge, na «?Aŋa ni kare dwøŋŋa eni yi buya käl maal?»

² Kar kaagø, Jecu acwön baŋe ki nyilaal, ni cïp gø dïge.

³ Ni kööe, na «Adïëri møn, a caana gø jïïu, ni näk cwïnynyu ba løgu ni tïmu kaamar obwöre, u ba døny yi buya käl maal na bäre bäre.

⁴ 'Ba ŋato wäro døøc dëëre mo mwöl kaamar nyilaari, beeye eni ni kare dwøŋ yi buya käl maal.

⁵ Ni ŋat wäro pänh nyilaal mo caala man ki nyeŋŋa, eni pänhnha aani.

⁶ 'Ba ŋato wäro wëëk nyilaal aciel bääyö dëët moi ni therø ii no ojïëy ni ŋääthge aani en, doo beerra eni kiper ŋatøgø ki man twöö kïn guur mo dwøŋ døc ŋute, ni leeŋi yi naama dwøŋ kany mo päŋ.

Pwöc Kiper Gïï Wø Wëëk Dhaanhø Bääyö

⁷ «Otïmö ni raac jï jø piny kiper gïï wø wëëk dhaanhø bääyö. Kiper gïï wø wëëk dhaanhø bääyö tägö møn, 'ba otïmö ni raac jï ŋato öge ki køøre.

⁸ 'Ba ni näk cerï wala tierï beeye wø wëëk ïïni bääyö, ŋul wøk, ni wetï gø. Kiper beerra eni ki man ciï yi kwøw na dïbat ciel wala ïïna ŋwøl, ki mana di ï leeŋ yi maaa näk bäŋ cuŋŋe kar ajäla ki ceŋŋï riet wala tietï riet.

⁹ 'Ba ni näk waŋï beeye wø wëëk ïïni bääyö, göön wøk ni wetï gø. Kiper beerra eni jïrï ki man ciï yi kwøw ki waŋ aciel ki mana di ï leeŋ yi maac kar ajäla ki nyeŋŋï riet.

Pwöc Kiper Nyidiel Mo Orwäänyö

¹⁰ «Gwøgu rou døc, nee bäŋe nyilaal aciel røk moi ni therø ii mo taagu. Kiper a cäänna uuni, ni nyïïatwiet maal moge wø bëëdö ni neeta waŋ Wära cooth ni en maal.

¹² «?Agïnaŋø ni caarru? ?Ni näk mo dhaanhø jïre da dïëk ma dïpa, ni rwääny acielli dïge, eni pïërabïŋween ka abïŋween ba dee wiia karge bäät kïdi, ni ci kuna cac diel mana näk orwäänyö?

¹³ 'Ba adïëri møn a cäänna uuni, ni näk mana no orwäänyö joode joodø, yie mïnnö døc ki gø ni kaala mana di yie mïnnö ki moa näk pïërabïŋween ka abïŋween na näk kär rwäänyö.

¹⁴ Kaawat manøgøøni thuwø, Wära ni en maal ba cac man rwääny acielli dëët obwöre moi ni therø ii.

Pwöc Kiper Mana Doo Tïïö Kiper Cöögö Mo Obääyö

¹⁵ «Ni näk coku obääyö dëërï, ciï ni caanï gïna baae jïre, yïthakiyu u keeru. 'Ba ni näk marï wïnynye wïnynyö, beeye niï tïïya coku nou døøu kanya ciel ki eni.

¹⁶ 'Ba ni näk marï ba wïnynye, lwötï ki dhaanhø aciel wala jiy ariiø, kiper nee ‹luubö tïme na kare ki køør gïna caan jiyi ariiø wala adäk moa tïïc gïnögø buutge.›

¹⁷ 'Ba ni näk mo coku kweer ki man wïny dööt jøøgø, caanï jï jø acooŋ Jwøk. 'Ba ni näk mo eni kweer ki man wïny dwør acooŋ Jwøk thuwø, wär eni tïme ni caala jur mør wala ŋat ajwäk ki jïrï.

¹⁸ Adïëri møn, a cäänna uuni, ni gïn wäro twöyu piny, onø twöc maalø. Ni gïn wäro jïëyu piny, onø jïëc maalø.

¹⁹ A cäŋa u cäännö, ni näk mo jiy ariiø dïïu cwïnyge ege dwalø pinyi en kiper gïn mo pëënyge pëënynyö, Wära ni en maal gïnöca tïïe tïïö jïge.

²⁰ Kiper kany wø näk da jiy ariiø wala jiy adäk mo dëëtge ege cooŋø ki nyeŋŋa, a ena dïge kaace.»

Pwöc Kiper Man Wëën Dhaanhø

²¹ Kanyøgø Piter aö baŋ Jecu, ni kööe jïgø, ni «?Kwäärö, a kwöre adïï noo bääc coka dëëra, ni wëënna wëënnö? ?Beeye këël kwöre abïriiø kiree?»

²² 'Ba Jecu aköö jïre, ni «Ba daa caanø jïrï, ni kwöre abïriiø. 'Ba a doo köö, ni beeye pïërabïriiø kwöre abïriiø.

²³ «Kiper manøgønø, buya käl maal løny ki man pääri ki nyeya mana many man cwøl jammi moe moa en bäät jø tïïc moe.

²⁴ 'Ba kanya täge ki man cwøl jammi moa manynye bäät jø tïïc moe, ŋat tïïc aciel akäl nyïme mo bääte da gwel ma kume apaar.

²⁵ 'Ba kanya dhäthe jï ŋat tïïc manøgø ki man cool gwetøgø, nyeya aköö ni eni ŋeew, ki cïïe, ki nyïïe, ki jammi bëët moa en jïre, kiper nee japa en bääte coole ki ge.

²⁶ «Kanyøgø ŋat tïïc manøgø apäth tiete ni kööe, ‹Wui nyeya, cïp cwïnyï piny ki aani. Jammi bëët coola coolø jïrï.›

²⁷ «'Ba nyeya cwïnye apädhö ki gïr ŋatøgø, ni pät gø, ni wec jammi moa en bääte.

²⁸ «'Ba ŋat tïïc manøgø ki dëëre na aa wøk, ena røømmø ki ŋat tïïc aciel røk jø tïïc mo wø tïïö ki eni ciel, ni tïme ni manynya gwete ma dïpa bäät ŋat tïïc manøgø. Ni mak nyenøgø ki cwaak gø, ni kööe, ni ‹Cool gweta moa en bäätï.›

²⁹ «Kanyøgø ŋat tïïc manøgø apäth tiete ni kööe, ni ‹Cïp cwïnyï piny ki aani. Gwetï coola coolø.›

³⁰ 'Ba ena kweer, ni cøøe, ni kïth gø øt twöc këël mano cool pïïdö bäre.

³¹ «'Ba kanya ö jø tïïci møga mo wø tïïö ki eni ciel na neenge gïna tägö, cwïnyge aränynyö døc; ni cige, ni caange gïïa tägö bëët jï nyeya marge.

³² «Kanyøgø nyeya aööt baŋe, ni kööe jïgø, ni ‹Ï na ŋat tïïc mo raac en. Japa en bäätï bëët awëëga ïïni kiper na kwaayï aani.

³³ ?Aŋø, cwïnyï ba diï dwøga piny ki gïr ŋat tïïc mana tïïö ki ïïni ciel, kaawat mana dwøga cwïnya piny ki ïïni?›

³⁴ Ni ö nyeya ni cïp gø ceŋ jø wø töö, nee twöc, këël mano cool jammi bëët moa en bääte.

³⁵ «Kaawat manøgø, ni näk mo nyïïmëëgu ba wëënnu ni käla yïth cwïnynyu, Wära ni en maal teeŋ gïnögø otïïe dëëtu na enøgønø thuwø.»