Mathiew 16 - Wëël Jwøk

Pwöc Kiper Ŋïï

¹ 'Ba jø Paricith ki jø Cajucith gena öö ni ge päänynya Jecu. Ni pëënyge gøøni, kiper nee ge nyuunhnhe ki ŋïï mo käla maal.

² 'Ba adwøk Jecu jïge, ni «Kany wø näk abøøya, u wø köö, ni ‹Piny tïmö ni leer diøø, kiper na kwaar maalli.›

³ 'Ba ni näk ma amöölla u wø köö, ni ‹Piny jïtö ka atuunna dïcäŋi, kiper maal kwaar ni da pöölö mo odhïŋ.› 'Ba uuni, bëët maal wø laaru ka ŋec, 'ba tiet ŋïïce mo nïri ii ba ŋeyu.

⁴ Jø pinyi ni reyø ii ni wø kwier luum Jwøk en, ge manynya ŋïï. 'Ba bäŋ ŋïï mo nyooth jïge. Beeye ŋïï mar Joona keere noo nyooth jïge.» Køøre Jecu jøøgø awiie ni aae.

Pwöc Kiper Thømmø Mar Jø Paricith Ki Jø Cajucith

⁵ 'Ba na pïïc bääŋi løøga, wïthge awïl ki man käätge ki muunni.

⁶ 'Ba Jecu aköö jïge, ni «Japu nyeŋŋu ni gwøgu rou ki thøm jø Paricith ki jø Cajucith.»

⁷ Ni ö bääge ni løøŋge gïnögø yïthakicge keerge, ni ge köö, ni «Beeye kiper na kärø käädö ki muunni.»

⁸ 'Ba Jecu kanya ŋäc gïnögø, ena köö, ni «?U ni ŋäädhe maru thiinh en, aŋø ni løøŋŋu gïnögø yïthakiyu keeru en, ni jïïu bäŋ muunni?

⁹ ?Aŋø, u poot ba kwänynyi en? ?Wïthu awïl ki muuga näk abïïc na pääŋŋi jï jøøa näk kume abïïc? ?A gupe adïï na yïthge päŋ ki thäŋi moa kwanynyu?

¹⁰ ?A wïthu awïl ki muuga näk abïriiø na pääŋŋi jï jøøa näk kume aŋween? ?A gupe adïï na yïthge päŋ ki thäŋi moa kwanynyu?

¹¹ ?Aŋø, tiere ba kwanynyu gø aperŋø, man näk mo aani, a ba cäänö kaper møø? 'Ba ennø, gwøgu rou ki thømmø mar jø Paricith ki jø Cajucith.»

¹² Kanyøgønø, aput ci cwïnyge ni Jecu ba cään ge ki man gwøkge rege ki thømmø mar møø, 'ba cäänö kiper pwöc mar jø Paricith ki jø Cajucith.

Kanya Ö Piterri Na Caan Gø Ni Jecu Beeye Krictø

¹³ 'Ba kanya ö Jecu dï mïëc Cecaria Pilipay, bääge apëënynye, ni «?Jiy wø köge ni Wär Dhaanhø aŋa?»

¹⁴ Ni løkge gø, ni «Møøk wø köö, ni ‹Beeye Jøøn na näk dïlööy na nyuudhi,› ni kö møøki, ni ‹Beeye Ilaaja.› 'Ba møøk wø köö, ni ‹Beeye Jeremaya wala nyikugö aciel dï nyïïkuk Jwøk.› »

¹⁵ 'Ba Jecu aköö jïge, «?A uuni, u wø kööu ni aana ŋa?»

¹⁶ Ni dwøgi ya Cayman Piter, ni «Ïïna Krictø, O Jwøa kwøw.»

¹⁷ Ni dwøgi ya Jecu jïre, ni «Ïïna gwïëth, Cayman o Joona. Kiper paa dhaanhø na nyooth luummögø jïrï, 'ba beeye Wära ni en maal na nyooth gø jïrï.

¹⁸ 'Ba a caana gø jïrï, ni nyeŋŋï beeye Piter, ni bäät kïdi man en acooŋ Jwøk mara otïïa bääte. Ni ba løny jï teek kar bëët jwïëc jøøa näk othøw ki man bööt gø.

¹⁹ 'Ba kulpïïe mo buya käl maal omëëga ïïni. Ni gïn wäro twöyï piny, onø twöc maal, ni gïn wäro jïëyï piny, onø jïëc maal.»

²⁰ Kanyøgø bääge aköömme døc, nee bäŋe ŋat caange gø jïgø ni ena Krictø.

Kanya Ö Jecu Na Caan Luum Thøø Mare Jï Bääge

²¹ Ki mana täge kar kaace nø, Jecu atägö ki man cään bääge ni eni cøøa Jerucalem ni jwør gïï mo thööth ceŋ jaae ki kwääc laam ki dïpööye mo ciik Jwøk, ni nääi, ni cäŋi tïŋ maal ri dää nïne.

²² 'Ba ena kïth Piterri wøk, ni täge ki man jook gø, ni kööe, ni «Kwäärö, gïna caanï enø omän Jwøki. Gïnögø ba tägi dëërï na bäre bäre.»

²³ 'Ba Jecu alwïthö ni kööe jï Piter, ni «Daak riï ŋääa, Ceethan! Bee ïïni ni cwany tieta en. Kiper acaara marï ba en løø Jwøk, 'ba ena løø jiy.»

²⁴ Kanyøgø Jecu bääge aluumme ni kööe, ni «Nee da dhaanhø mo manynya man ö køøra, eni dëëre wär taae, ni käär jaadhe na näk odëëdö, ni caath køøra.

²⁵ Kiper ŋato wäro many man gwøk jwïëye, nyääga gø. Ni ŋato wäro nyääk jwïëye kiper nyeŋŋa, ojoode.

²⁶ ?Kiper agïnaŋø noo beer noo duui jï dhaanhø, ni näk mo piny bäre oci jïre, ni nyääk jwïëye? ?Wala agïnaŋø noo cïp dhaanhe ni wiila jwïëye?

²⁷ Kiper Wär Dhaanhø öö ki nyïïatwiet maal moe ka ajiem wänni. Kanyøgønø, jiy bëët ocunne ki køør gïïa tïïcge.

²⁸ Adïëri møn, acaana gø jïïu, ni da jø møøk mo cuŋŋö kany en, mo thøø ba jootge, ni Wär Dhaanhø poot kärge neenø ni öö ki bura mare.»