Mathiew 10 - Wëël Jwøk

Kanya Ö Jecu Na Jier Bääŋi Apaar Kurriiø

¹ Ni ö Jecu ni cwøl bääge baŋe moa na apaar kurriiø, ni mooc ge ki teek bäät juuga reyø, nee riemge wøk; ni mooc ge ki teek ki man kønyge teeŋ täwe ki ŋwiili bëët.

² 'Ba nyeŋ nyïïatwieli moa na apaar kurriiø beege ii; mana dïkwøŋ beeye Cayman na cwøl ni Piter, ki coki ma Andaru, ki Jeemeth o Dhebedi, ki coki ma Jøøn,

³ ki Pilip, ki Barthølömu, ki Tøma, ki Mathiew ŋat ajwäk, ki Jeemeth wär Alpia, ki Thadia,

⁴ ki Cayman ŋat Keena, ki Juudac Ickarïët, ŋata cïp Jecu ceŋ nyïïmänne.

Kanya Ö Jecu Na Jääŋ Nyïïatwiete Wøk

⁵ Kanyøgø jøøgø na apaar kurriiø yøø gena jääŋ Jecu wøk, ni kööm geni, ni «Kär dee kany cou yie dï juurre, ni ba cou po jø Cameria.

⁶ 'Ba cou baŋ jø Icriel ni wø caal dïëk mo orwäänyö.

⁷ Cou ni køpu luum Jwøk, ni kööu, ni ‹Buya käl maal kare acäännö.›

⁸ Ni kønynyu jiy moa tuu, ni wëëgu jiy moa no othøw kwøw, ni dwøgu dëët jøøa näk dëëtge da dhøøbø karge, ni riemu anäge wøk. Muuy manøgø awëëk u jaak. 'Ba wär cïpu jaak thuwø.

⁹ Kär dee warkey, wala gwel-bïrö, wala thariipa mo kääru ki yïth kïïce mou,

¹⁰ ni bäŋe opïri mo kääru kiper wääth maru, wala abïïe oriewi, ki war, ki laŋkaace. Kiper ŋat tïïc cam mare wø joode baŋ ŋata tïnynye.

¹¹ 'Ba paano wäro cou yie jaak, ni näk mo dwøŋ wala thiinh, wäru määnyu ki ŋat mo beer ni bëëdu buute këël mano tïŋŋu.

¹² 'Ba kanyo dønynyu øtø, wäru määthu.

¹³ 'Ba noo näk mo jø paac mo beer, bëët-mëër maru wär wëëgu bëëtö yie. 'Ba noo näk mo ba beer, bëët-mëër maru wär duu baŋu.

¹⁴ 'Ba ni näk da ŋat mou ba pänhnhe ni ba wïny luupu, kanyo aayu ødøca wala paanøca, tør tietu wär teeŋu yie.

¹⁵ Adïëri møn, a cäänna uuni, noo tïmö ni theemma ajäl Cødam ki Gømöra ka ajäl paanøca dïcäŋo ŋøl luup yie.

Pwöc Kiper Caannø

¹⁶ «Neennu, aani, a jääŋŋa u wøk kaamar dïëk mo ena dï kwäänynye. Kiper manøgønø, bëëdu ni nyeŋŋu reegø kaamar thwöre nou mwöl kaamar akuyi.

¹⁷ Gwøgu rou ki jiy. Kiper uuno kïthge kwör løøe, ni pöötge uuni yïth uut acook lam moge.

¹⁸ Ni peege uuni nyïm kwääri ki nyeye mo juurre kiper nyeŋŋa, nou køpa gïra nyïmge ki jø poge.

¹⁹ 'Ba kany wäro kïthge uuni kwör løøe, kär dee gïn lääŋŋu kiper gïno caannu wala uuno cäänu nidïï. Kiper gïno caannu ocïp jïïu yi caannøca.

²⁰ Kiper paa uuni noo cäänö, 'ba beeye Jwïëc Wääu ni en maal noo cäänö dhøgu.

²¹ 'Ba cöögö coki okïth yi thøø, ni ö wuue ni kïth nyaare yi thøø. 'Ba obwöre rege othïïŋge ri jøøa nywøl ge, ni kïthge ge yi thøø.

²² Ni ö jiyi bëët ni mänge ki uuni kiper nyeŋŋa. 'Ba ŋato jïëny gïïögø këël aŋuunne, opiem.

²³ 'Ba kany wäro caange uuni yi paac aciel, wär reŋŋu yi paac mør. Kiper adïëri møn, a cäänna uuni ni mïëc Icriel bëët ba dou thöörö ki caath, ni Wär Dhaanhø poot kär öö.

²⁴ «Ŋat mo di pwönynyö ba dwøŋŋa eni ki dïpööy mare, ni ŋat tïïc ba dwøŋŋa eni ki kwääye.

²⁵ 'Ba orømø ki man tïm ŋat mo di pwönynyö ni caala dïpööy mare, ni tïm ŋat tïïci ni caala kwääye. ?Kiper ni näk wää øtø ege cwølø ni Bieldhebap, jø paare okääŋge nidïï ki man cwølge ge thuwø?

Pwöc Kiper Ŋata Doo Lwäärö

²⁶ «Kiper manøgønø, käru nou lwäyö ki jiy. Kiper bäŋ gïrpiny mo ouumö mo ba cäŋ nyoothø, wala gïrpiny mo okanø, mo ba cäŋ jootø.

²⁷ Gïn mo yaa caanø jïïu yi muudhö, wär køpu yi tar. Ni gïn mo you wïnynyö ni di mooŋø, cäŋu køpø ki wïth uudi.

²⁸ Ni käru nou lwäyö ki jø wø 'näk dëël ni ba løny jïge ki man 'näkge jwïëy. 'Ba beerra man lwäärru ŋat wø løny jïre ki man raany jwïëy ki dëël karge riet yi maac kar ajäla.

²⁹ ?Aŋø, acøki ariiø bäŋ wø ŋeew ka thariipa? Ni bäŋ aciel dïge mo päth piny ni näk ba kö Wääu ni en maal.

³⁰ 'Ba këël jïëc wïthu okwaanø bëët.

³¹ Kiper manøgønø, käru lwäär. Letha peru ka acøki mo thööth.

³² 'Ba jiy bëët mo wø jïëc aani nyïm jiy, ojïëa thuwø nyïm Wära ni en maal.

³³ 'Ba ŋat wäro mooŋ aani nyïm jiy, omooŋa thuwø nyïm Wära ni en maal.

Pwöc Kiper Man Mëërö Ki Jecu Ni Kaala Jiy Bëët

³⁴ «Kär caarru naa ööi naa käla bëët-mëër bäät piny. A kär öö naa käla bëët-mëër, 'ba a ööi naa käla opëëllö.

³⁵ Naa ööi naa wëëga « ‹dhaanhø apääk ki wänni, ni ö nyakøøe ni pääge ki menni, ni ö cï nyeyi ni pääge ki waŋi.

³⁶ Ni tïm dhaanhe ni nyïïmänne beege jø wø en paare kiree.›

³⁷ 'Ba ŋato mëër ki wänni wala menni ni kaala mëër man mëëre ki aani, ba rømi ki man tïme na dhaanhnha. Ni ŋato mëër ki wääde wala nyaare ni kaala mëër man mëëre ki aani, ba rømi ki man tïme na dhaanhnha.

³⁸ Ni ŋat wø ba lwør jaadhe na näk odëëdö ni cäädhe køøra, ba rømi ki man tïme na dhaanhnha.

³⁹ Ŋat wø gwøk jwïëye, onyääe. 'Ba ŋato nyääk jwïëye kiper nyeŋŋa, ojoode.

Pwöc Kiper Ŋat Mo Rømø Ki Man Cunni

⁴⁰ «'Ba ŋat wø jïëc uuni, jïëya aani. Ni ŋat wø jïëc aani, jïëya eni na jääŋ aani.

⁴¹ Ni ŋat wø jïëc nyikuŋ Jwøk kiper mana näk ena nyikuŋ Jwøk, omooc ki gïn wø mëëk ŋat ma nyikuŋ Jwøk. Ni ŋat wø jïëc ŋat mo beer kiper mana näk ena ŋat mo beer, omooc ki gïn wø mëëk ŋat mo beer.

⁴² 'Ba ŋat wäro mooc dhaanhø aciel mo kare thiinh røk bääŋi 'moa, ni eni cïpi kaper mana näk mo bääŋ manøgø ena bääŋ mara, këël ŋatøgø cïpa pïï mo ŋec ki ya athöödhi cøøn, ka adïëri møn, a caana gø jïïu, ni gïno mëëk eni ba doo kääŋö.»