Mana Nyooth 9 - Wëël Jwøk

¹ Ni ö bïï nyïïatwiet maalli ni kooth tuuŋ mare, ni jooda cëërö mør mo opänh piny ki maal. Ni muktää mar buura näk bäye bäŋ cuŋŋe omëëk eni.

² Ni jap dhi buura näk bäye bäŋ cuŋŋe. Ni ö jïrö wøk ki dhi buur manøgø, mo caala jïc maac mo päl døc. Ni ö maalli ki cäŋ ni døøyi muudhö ki jïyögø na ö wøk ki dhi buurögø.

³ Kanyøgøøni bäänyö aö piny ki yi jïyögø, ni dhøkge odøøc mo leth ni caala leth dhøk agarapi mo piny.

⁴ Ni köömmi ni kär luum mar piny raanyge wala gïn mo otuy wala jaath, 'ba beeye jiy keerge moa näk täärnyïmge bäŋ ŋïï mar Jwøk noo raanyge.

⁵ Ni wëëgi man caange geni ki dwäde abïïc, 'ba paa per man 'näk geni. 'Ba caannø mano caarge geni ki gø, leth mare caala leth dha agarap kany wø kac dhaanhø.

⁶ 'Ba yïth nïrögø jiy thøø omanyge ni ba jootge gø. Ni parge thøø, 'ba thøø oreŋi buutge.

⁷ 'Ba bäänyö manøgø nëëni keda okwëënyi mo ojiiŋŋø kiper leny. Ni wïthge da gïï mo nëëni keda adude mo warkey. Ni täärnyïmge keda täärnyïm dhaanhø.

⁸ Ni jïëcge keda jïëc dhaagø. Ni lakge keda lak ŋuuwe.

⁹ Ni dëëtge da kwök mo nëëni keda kwöt nywïënyö mar käw. Ni lwöc bwöpge caala lwöc dööt jïëth leny mo wø tut okwëënyi mo thööth mo reŋŋa baŋ leny.

¹⁰ Ni jïpge caala jïp agarapi, ni ge kää, ni teek marge man caarge jiy ki gø ki dwäde abïïc ena jïpge.

¹¹ 'Ba nyeya marge beeye nyïïatwiel mar buura näk bäye bäŋ cuŋŋe, ni nyeŋŋe ki dhi Ibaru cwøl na Abadøn, 'ba ki dhi Gïrïïk cwøl ni Apølïën, na näk tiere beeye Dïräänyi.

¹² Gïna raac mana dïkwøŋ apöödhö nø. 'Ba poot da ariiø mo öö.

¹³ Ni ö bïcier nyïïatwiet maalli ni kooth tuuŋ mare. Ni wïnynya dwøl mo ööi ka yïth tuŋi karge ŋweeni mo gïn wø waŋ gïï wø jïcge ŋwääi ni met bääte na näk tïïc ki warkey na en nyïm Jwøk,

¹⁴ ni köömma bïcier nyïïatwiet maal na en tuuŋŋi cere, ni «Pät nyïïatwiet maal moa näk aŋween na näk otwöö bäät Naam Upareeti na dwøŋ.»

¹⁵ Kanyøgø nyïïatwietøgø karge ŋweeni gena pät, geni na näk ojiiŋŋø kiper yi caannøca, ki dïcäŋöca, ki dwäänöca, ki cwiinøca, nee dää thäk jiy 'näkge røk jø bäät piny bëët.

¹⁶ 'Ba kwään jø leny mo wø cäädhi ki bäät okwëënyi thööth døc, ni beege miilïënni ma dïpe ariiø. Ni wïnynya kwäänge.

¹⁷ 'Ba man en beeye gïna jooda kanya neena okwëënyi ki yi lääk. Ni jøøa en bäätge ge käära kööt käw mo kïtge caala maac mo kwaar, ni caala kït abïcøle ki kïdö ma abäga. 'Ba wïth okwëënyi caala wïth ŋuuwe, ni maac, ki jïrö, ki jïrö mør mo keec ni lïëth døc bëëdö ni ööa wøk ki dhøkge.

¹⁸ Ni ö dää thäk jiyi moa en røk jø bäät piny bëët ni nääi ki gïïo na jap räny piny moø na adäk yøø, ni beeye maac, ki jïrö, ki jïrö maya mana keec ni lïëth døc na bëëdö ni ööa wøk ki dhøkge.

¹⁹ Kiper 'näk mar okwëënyi atïmö ni ena dhøkge ki jïpge. 'Ba jïpge caala thwöre ni da wïdhi, ni ge räänyö ka ge.

²⁰ 'Ba jøøa dööŋ, na näk kär thøw ki jap räny piny moøgø, cwïnyge kärge løø ki man wecge wøør gïïa tïïcge ki ceŋge, ni ba wecge wøør anäge, ki gïï wø lam mo warkey, ki gwet-bïrö, ki jwëëlli, ki kïdi, ki jaath, gïï wø bäŋ gïn mo maarge raŋ, ni ge ba wïnyö, ni ge ba cäädhi.

²¹ Ni cwïnyge kärge løø ki 'näk marge man wø 'näkge jiy, wala thïëth marge, wala käp marge, wala käw marge.