Mana Nyooth 8 - Wëël Jwøk

Luum Bïriet Möönne Ka Athaa Ma Warkey

¹ Kanyøgø na ö Nyidielli na jap bïriet möönne, maal anibäc ki kany mo jïtö ki thääŋ caa.

² Køøre nyïïatwiet maal abïriiø mo wø cuŋŋi nyïm Jwøk ajooda. Ni ö tuŋi abïriiø ni mëëgi geni.

³ Ni ö nyïïatwiel maalli mør ni ööe ni cuŋŋe buut gïn wø cïp olämme bääte, ni cere da athaa ma warkey. Ni mooi ki gïï wø jïcge ŋwääi ni met mo thööth, nee rwöbe ki lam mar jø Jwøk na aciel na en bäät gïn wø waŋ gïï wø jïcge ŋwääi ni met bääte na näk tïïc ki warkey na en nyïm wälu.

⁴ Ni ö jïc jer wø ŋwääi ni met ni duuŋe cer nyïïatwiel maal manøgø ki lam mar jø Jwøk na aciel nyïm Jwøk.

⁵ Kanyøgø nyïïatwiel maal manøgø athaa alwøre ni pääŋ gø ki maac mana en bäät gïn wø cïp olämme bääte, ni lëëŋ gø bäät piny. Ni tïm køthi ni märö, ni tïm pinynyi ni dïmmi døc, na agaackøth mal, ni piny jäŋŋi.

Luum Tuŋi

⁶ Kanyøgø nyïïatwiet maal moa näk jïge da tuŋi abïriiø, dëëtge ajekge ki man koothge tuŋi.

⁷ Ni ö nyïïatwiel maal mana dïkwøŋ ni kooth tuuŋ mare, ni put piiø ki maac mo orwöbö ki remø öö, ni pänh bäät piny. Ni ö dää thääŋö mar piny ni waaŋe, ni waaŋ dää thääŋö mo jen, ni ö luummi mana marr ni waaŋe ki kare bäre.

⁸ Ni ö riet nyïïatwiet maalli ni kooth tuuŋ mare. Ni ö gïn mørri mo keda kïdi mo dwøŋ mo liel ki maac ni lëëŋi yïth näpa døøŋŋø.

⁹ Ni ö dää thääŋö mo näpa døøŋŋø ni tïmge na remø, ni ö dää thääŋö mo gïïa kwøw yïth näpa døøŋŋø ni thøwge, ni räny dää thääŋö mo jïëth näm.

¹⁰ Ni ö dää nyïïatwiet maalli ni kooth tuuŋ mare. Ni ö cëërö mo dwøŋ døc mo liel keda ameeth ni pänhnhe ki maal, ni pänh bäät dää thäk näm, ki bäät jøøre mo pïï.

¹¹ 'Ba nyeŋ cëëyögø cwøl ni Jaadha Keec. Ni tïm dää thäk pï näm ni keec. Ni thøw jiyi mo thööth ki pïï, kiper na tïmge ni keec.

¹² Ni ö ŋweer nyïïatwiet maalli ni kooth tuuŋ mare. Ni ö dää thääŋö mar cäŋ, ki dää thääŋö mar dwääy, ki dää thääŋö mar ceer ni gøøi, ni tïm dää thääŋö mar tar moge na muudhö. Ni ö dää thääŋö mar dïcäŋöca ni mäni ki man tïme ni leer, ni ö dää thääŋö mar wäär thuwø ni tïïi na enøgønø.

¹³ Kanyøgø aana nëënnö, ni wïnynya dwør coor mo määdö maal ni rëëdö ki dwøl mo päl, no «Oraac, oraac, oraac, jï jø oen bäät piny kiper dööt tuŋi møga moo cäŋ nyïïatwiet maalli moa na adäk koothø kawaane.»