Mana Nyooth 22 - Wëël Jwøk

¹ Kanyøgøøni naam pï kwøw anyoodhe jïra, mo tøŋ døc keda wïlli, ni kwönni ka ri wäl Jwøk ge ki Nyidiel,

² ni muuli ka dï waŋjöör paanøgø. 'Ba bäät ageel moe karge riet thuwø, jaadha näk jaath kwøw ena yie, ni bääte da nyïïe apaar kurriiø ma teeŋi, ni nyïïe nywøle ka yïth dwäde bëët. 'Ba bøøge beege wø køny mïëri ki ŋwiitge.

³ 'Ba kaace bäŋ gïrpiny aciel këët mo ocienø, 'ba wäl Jwøk ge ki Nyidiel beeye noo en yie, ni ö laage ni wøørge eni.

⁴ Geni täärnyïme oneenge, ni ö nyeŋŋe ni en täärnyïmge.

⁵ Ni bäŋe wäär këët. Ni bäŋ däär lamba mo manyge wala tac cäŋ, kiper Kwäärö Wuuö Jwøk tïmö na tar marge. 'Ba geno bëënni këël na bäre bäre.

Ööny Jecu Kare Cään

⁶ Ni köö nyïïatwiel maal jïra, ni «Luupi ii beege luup mo oŋäädhö ni näkge adïëri. Ni beeye Kwäärö Wuuö Jwøk na näk Jwø jwïëc nyïïkuk Jwøk na jääŋ nyïïatwiel maal mare kun nyuth laage gïïo laar tägö.»

⁷ 'Ba Jecu aköö, «Neenï, aano laar öö. Gwïëth en jï ŋat wø gwøk luupögø ni en yi wëëlli en ni køp gïï mo poot ena nyïm.»

⁸ Aana Jøøn, ŋata wïny gïïögø ni neen geni. 'Ba na wïnynya ge ni neena geni, aana päth tiet nyïïatwiel maal manøgø, ŋata nyooth ge jïra, nee wøøra.

⁹ 'Ba ena köö jïra, ni «Gïnögø kär tïïyï, kiper aana laŋŋø ki ïïni na aciel ki nyïïmeru na näk nyïïkuk Jwøk, ki jø wø gwøk luupögø ni en yi wëëlli en. Wøør Jwøk.»

¹⁰ Ni kööe jïra, ni «Kär niï mwöna luupögø ni en yi wëëlli en ni køp gïï mo poot ena nyïm. Kiper kanya wäŋŋi kare acäännö.

¹¹ Wec ŋat wø tïïc raay nee bëëde ni tïïya raay, ni ö ŋat wø bëën rääö ni bëëde ni tïïya gø, ni ö ŋat wø beer ni bëëde ni tïïya gïno beer, ni ö ŋat wø en kur keere na mar Jwøk ni bëëde ni ena kur keere na mar Jwøk.»

¹² Ni kö Jecu, «Neenï! Aani, a laara öö, naa käära japo cunna jiy ki ge, ni ŋati man nø cunna ka køør gïna tïïe.

¹³ Aana Alpa ni näga Omëëga, ni näga dïkwøŋ ni näga aŋuudi, ni näga wïlöölö ni näga cuŋŋe.

¹⁴ «Gwïëth en jï jø wø penya abïïkge, kiper nee marge beere ri jaadha näk jaath kwøw, ni dønyge yi paanøgø ki dhøk kiir.

¹⁵ 'Ba guu, ki jø thïëth, ki kääpe, ki dïnäk jiy, ki jø wø lam juu møøk, ki jø wø mëër ki caan tööt oen wøk.

¹⁶ «Aana Jecu na jääŋ nyïïatwiel maal mara baŋu ki gïïögø nee køp jï acook Jwøk. Aana lweet Deebit ni näga kunhnhe, na cëëc øw na tar.»

¹⁷ 'Ba Jwïëc Jwøk ki Dhaagø thiinh ge cäänö, ni «Ööï.» Ni ŋat wø wïny gø wär kööe, ni «Ööï.» Ni ŋato dëëre da riew wär ööe, ni ŋato many man lwöte ri pï kwøw wär lwöte jaak ni bäŋ ŋïëw.

¹⁸ 'Ba a köömma jiy bëët moo wïny luupögø ni en yi wëëlli en ni køp gïï mo poot ena nyïm, ni ni näk da ŋat mo meeta geni, jap räny piny moi no ogöör yi wëëlli en omeet Jwøki bääte.

¹⁹ 'Ba ni näk da ŋat mo känna wøk ri luupögø ni en yi wëëlli en ni køp gïï mo poot ena nyïm, kure ni en ri jaadha näk jaath kwøw ki mana en yi paana en kur keere no ogöörö yi wëëlli en, okäl Jwøki wøk.

²⁰ 'Ba ŋata køp gïï aköö, na «A laara öö møn.» Enøgønø. Wui Kwäärö Jecu, wärï ööï.

²¹ Met ec mar Kwäärö ma Jecu bëëde bäät jø Jwøk bëët. Enøgønø.