Mana Nyooth 19 - Wëël Jwøk

¹ Køør gïïögøøni dwøl mør mo päl awïnynya maalø mo keda dwør lwaak mo päl, ni ge köö, ni «Alëluya! Pïëm man piem jiy ki gø, ka ajiem, ki teek, beege mo Jwøk marø.

² Kiper ŋøl mare beeye adïëri ni näk kare. Ni eni kääpa dwøŋ na raany piny ki käp mare aŋøl wøk, ni cool kwör remø mar laage dëër gø.»

³ Ni cäŋge köö, ni «Alëluya! Jïye bëëdö ni duuŋ këël na bäre bäre.»

⁴ Ni ö jaae moa näk pïërariiø kurŋween ki gïïa kwøw karge ŋweeni ni leeŋge røkge piny ni wøørge Jwøk, eni na en bäät wälu, ni köge, ni «Enøgønø. Alëluya!»

⁵ Ni ö dwølli mør ki bäät wälu mo köö, ni «Pwøyu Jwøk marø, u na laage bëët, u jø wø lwäär gø, ni beege moa therø ki moa døøŋŋø.»

Luum Cam Nywöm Nyidiel

⁶ Kanyøgø dwøl mør awïnynya mo keda dwør lwaak mo päl, ni caala lwöc pïï mo thööth, ni caala dwør køth mo märö døc, ni köö, ni «Alëluya! Kiper Kwäärö Wuuö Jwøk, eni na Jwøk marø na en teeki jïre, beeye Nyeya man wø bëënni.

⁷ Yïthø mïnge ni kanynyø ni jiemø eni, kiper nywöm mar Nyidiel apïï, ni dhaagø thiinh mare dëëre ee nø jiiŋŋø.

⁸ Ni ena wëëk man kïth dëëre ka abïï mo pøøth, mo tar ni tøŋ.» 'Ba abïïnögø ni pøøth enø beeye gïïa beyø na tïïc jø Jwøki.

⁹ Ni ö nyïïatwiel maal manøgø ni kööe jïra, «Göör gïn: Gwïëth en jï jøøa cwøl baŋ cam nywöm mar Nyidiel.» Ni kööe jïra, ni «Moi beege luup Jwøk na näk adïëri.»

¹⁰ Kanyøgøøni aana päth tiete nee wøøra. 'Ba ena köö jïra, ni «Gïnögø kär tïïyï, kiper aana laŋŋø ki ïïni na aciel ki nyïïmeru, ni beege jø wø en gïr Jecu cwïnyge. Wøør Jwøk.» Kiper gïr Jecu wø køp beeye luup wø køp nyïïkuk Jwøki thuwø.

Luum Ŋat Mo Oŋäädhö Ni Näk Adïëri

¹¹ Kanyøgø maal aneena ni ŋaam, ni neena okweeny mo tar. 'Ba ŋata en bääte cwøl ni Ŋat mo oŋäädhö ni näk Adïëri. Ni näk mare ŋøl luubö wala tïïya leny, moe beege adïëri.

¹² Ni nyeŋŋe caala maac mo liel, ni wïïe da adude mo thööth. Ni nyeŋŋe na näk ogöörö, bäŋ ŋat mo ŋäc gø, 'ba beeye eni keere.

¹³ Ni eni käära abïï mo ocøt yi remø. 'Ba nyeŋŋa cøøri ki gø beeye Dwør Jwøk.

¹⁴ Ni ö jø lenynyi mo maal na käär abïïe mo pøøth, mo tar ni tøŋ, ni caathge køøre ni ena bäät okwëënyi mo tar.

¹⁵ Ni ö opëëllö mo beth ni bëëde ni ööa wøk ki dhee, mano gøøc mïëri ki gø, ni dïïm geni ka athøny nywïënyö. 'Ba eni buur wø biic nyïïomøki mar wëëc Jwøk na en teeki jïre, wëëya dwøŋ døc, onyøøne.

¹⁶ 'Ba ra abïïne ki ya awaye ogöönnö ki nyeŋ, ni köö, ni «Nyeny nyeye ni näk Kwääc kwääri.»

¹⁷ Kanyøgø nyïïatwiel maal aciel ajooda ni cuŋŋa bäät cäŋ, ni cwøl weny bëët mo wø määdö maalø ki dwøl mo päl, ni «Ööu, ni cooŋŋu dëëtu kiper cam mana dwøŋ na näk mar Jwøk,

¹⁸ kiper nee rïŋ nyeye ki rïŋ kwääri, ki rïŋ jøøa kwörge døøŋŋø, ki rïŋ okwëënyi ki mo jøøa en bäätge, ki rïŋ jiy bëët, jøøa bëëdö ki wïthge ki laaŋe bëët, këël moa therø ki moa døøŋŋø, nee cammu.»

¹⁹ Ni jooda Lääy ki nyec piny ki jø leny moge ni dëëtge ege cooŋø, nee këëtge ki ŋata en bäät okweeny ki jø leny moe.

²⁰ Ni ö Lääyi ni maai, ge ki nyikuŋ jwøk mana näk patha adïëri, ŋata tïïö nyïme ki ŋïïce moa cøøk jøøa dëëtge jïtö ki ŋïï mar Läänögø, ki jøøa wøør gïna näk ocwääö na caal kïte. Gïïögø karge riet gena leeŋ yi naama liel ki maac mo jïye keec ni lïëth døc ni ge poot kwøw.

²¹ Ni ö møga ni nägi ya opëël ŋata en bäät okweeny, opëëlla bëëdö ni ööa wøk ki dhee. Ni ö wenynyi bëët ni jäŋge døc ki rïŋge.