Mana Nyooth 18 - Wëël Jwøk

Luum Räny Babiløn

¹ Køør gïïögø nyïïatwiel maal mør aneena ni ööa piny ki maal, ni jïre da cuum mo dwøŋ døc. Ni ö pinynyi ni tïme ni tar døc ka ajieme.

² Ni kööe ki dwøl mo päl døc, ni «Babiløn na dwøŋ apädhö ki pädhö mo ba thiinh, ni tïme na kar bëëtö jï anäge, na kar bëët teeŋ juuga reyø bëët, ki teeŋ weny moa reyø bëët na mänö ki geni.

³ Kiper mïëri bëët amädhö ki køøŋø mar käp mare, ni ö nyec pinynyi ni käpge ki gø, ni ö jø wø dääbö ki japge piny ni kwärge ki køør käp mare na raac døc.»

⁴ Kanyøgø dwøl mør awïnynya ni ööi ki maal, ni kööe, «Ööu wøk yie, u na jiya, kiper nou ba kuutu ki eni yïth raay moe, nee jap räny piny moo ö bääte nee ba nywaagu.

⁵ Kiper raay moe rege alöörge ni këëtge maalø, ni ö Jwøki ni par wïïe ki rääye.

⁶ Cool kwör dëëre, keda mana kwøŋ tïïc ki dëëre. Ni coolï kwör dëëre kwöre ariiø na kar moa tïïe. Ni jääpï athöönhnha näk ee jääbö jïre ki kwöre ariiø.

⁷ Ni caannï eni ni wëëgï gø kïmmö, ni röömi ka ajieme na jiem dëëre keere ni eno røm piny. Kiper eni wø köö ki cwïnye, na ‹A bëëdö ni aana gwanynyø, naa patha cï thøø, ni kïmmö ba jooda bäre bäre.›

⁸ Kiper manøgø nø, jap räny piny moo ö bääte, oööi ki yi cäŋ aciel, teeŋ ka thøø, ki kïmmö, ki meel. Ni ö eni ni waaŋi ki maac. Kiper Kwäärö Wuuö Jwøk na jääl gø dwøŋŋa eni.»

⁹ 'Ba nyec piny na käbö ki gø ni tuukge ki gø, geno jwöŋi ni gööge ko oduuru kipere, kanyo neenge jïye noo waaŋe.

¹⁰ 'Ba geno cuŋŋi kany mo bäär ni ge lwäära caannø mare, ni köge, ni «Wui, wui, paana dwøŋ, ïïna ränynyö. Wui, ï na Babiløn na teek, ränynyö marï apïï ki yi caa aciel!»

¹¹ Ni tïm jø wø gädhö ki jammi piny ni ge jwöŋö ni ge kïmmö ki gïre, kiper mana tïme ni bäŋ ŋat mo ŋëëö ki japge,

¹² teeŋ ka warkey, ki gwet-bïrö, ki nyeŋ kïte ma wøpe mo perge leth, ki tii, ka abïïe mo pøøth, ki dïmuurri, ka arïïdi, ki mo kwaar, ki teeŋ jenni bëët moa näk riie, ki lak lïëy bëët mo otieŋø, ki gïïa näk otieŋø bëët ri jenni moa gätge teek, ki jwëëlli, ki nywïëny, ki kïte mo otieŋø,

¹³ ki wïth jer wø kïth yi kadø, ki gïï wø jïcge ŋwääi ni met, ki teeŋ mädhi mo wø ŋwääi ni met, ki kwøk nyïïomøki, ki mädhi, ki muunni ma twaye, ki beel, ki dhäk, ki dïëk, ko okwëënyi, ki jïëthe mo wø tut okwëënyi, ki laaŋe, këël jwïëc jiy.

¹⁴ 'Ba jø gath oköö jïre, «Gïïa beyø na lääŋŋï ki cwïnyï anø aay dëërï; jap kwär marï ki jap meeŋ marï arwäänyö jïrï, ni ba cäŋ jootø këët na bäre bäre.»

¹⁵ 'Ba jø wø daap gïïögø, jøøa kwär ree, geno cuŋŋi kany mo bäär ni ge lwäära caannø mare, ni ge jwöŋö ni ge guyö døc,

¹⁶ ni «Wui, wui, paana dwøŋ aränynyö, na käär abïïga pøøth, ki dïmuurri, ki mo kwaar, ni dëëre ee tïïö ni mïërö ki warkey ki nyeŋ kïte mo perge leth, ki tii.

¹⁷ Kwärö manøgø bäre aränynyö ki yi caa aciel.» Ni ö kwääc jïëthe mo näpa døøŋŋø bëët ki jø wø cäädhi ki jïëthe, ki dïkïïwe, ki jø gath mo wø cäädhi ki jïëth näm, ni cuŋge kany mo bäär,

¹⁸ ni rëëtge kanya jootge jïye na waaŋe, ni köge, na «?A paana ŋø na caal paanø ni dwøŋ enø?»

¹⁹ Ni jøøpge tør wïthge kanya jwöŋge, ni ge guyö døc, ni «Wui wui, paana dwøŋ aränynyö, paana ö jøøa jïge da jïëthe bëët yïth näpa døøŋŋø na kwärge ki køør kwär mare. Ena ränynyö ki yi caa aciel.»

²⁰ 'Ba ï na maal, yiï mïnne nø ki gïre, ki u na jø Jwøk, ki nyïïatwieli, ki nyïïkuk Jwøk, kiper kwöri mou acool Jwøki dëër paanøgø.

²¹ Kanyøgø nyïïatwiel maal mør mo teek døc, akwänynyö ki kïdi mo caala kïn guur mo dwøŋ døc, ni leeŋ gø yi naama dwøŋ, ni kööe, ni «Paana dwøŋ na näk Babiløn ogøø piny ni raac døc na enønø, ni ba joodi këët.

²² Ni ö dööt jø thøme, ki jø wø wär ki dudi, ki jø opele, ki jø tuŋi, ni ba wïnynyi yiï këët. Ni bäŋe dïcwäc jammi mo joot yiï këët. Ni bäŋe dwør kïdi mo gudö mo wïnynyi yiï këët.

²³ Ni bäŋe däär lamba mo liel yiï këët. Ni bäŋe dwør cø nyakøø ki dhaagø thiinh mo wïnynyi yiï këët. Kiper jø gath moï beege na kwörge døøŋŋø piny na wara bëëde, ni ö mïëri bëët ni cøøgi ki køør thïëth marï.

²⁴ Ni beeye eni na joot rem nyïïkuk Jwøk ki mo jø Jwøk yie, ki mo jøøa 'näk bëët bäät piny.»