Mana Nyooth 13 - Wëël Jwøk

Luum Lääya Näk Ariiø

¹ Ni neena Lääy mør mo ööa maal ki dï naama dwøŋ, mo wïthe abïriiø, ni wïthe da tuŋi apaar, ni wïth tuge da adude apaar, ni nyeŋ mo raac døc mo janynya Jwøk ogöör wïthe.

² 'Ba Läänögø na jooda enø caala kwac, ni ö tiete ni caal tiet cwieny mør mo dwøŋ mo lweete beth døc, ni ö dhee ni caal dhi ŋuu. 'Ba thwöl teek mare ki wälu mare ee wëëk Läänögø, ki cuum mo dwøŋ døc.

³ 'Ba Läänögø wïïe aciel nëëni kede da ŋwellø mo cööpa ri thøø. 'Ba ŋwelle na doo cööp ri thøø ocaŋŋø, ni ö jø bäät pinynyi bëët ni caathge køør Läänögø, ni yïthge orëëm.

⁴ Ni ö jiyi ni wøørge thwöl, kiper mana wëëk cuum mare Läänögø. Ni wøørge Läänögø, ni köge, na «?Aŋa ni caal Lääni? ?Na aŋa ni maar lønyø jïre ki man këëde ki gø?»

⁵ 'Ba Läänögø omooø ki dhøk mo cara luup atöör ki luup mo reyø døc mo janynya Jwøk. Ni eno wëëk man cääne ki cuum mare ki dwäde ma pïëraŋween kurriiø.

⁶ Ni jap dhee ni car luup mo reyø døc dëër Jwøk, ni jany nyeŋ gø ki kar bëëte, ki mo wø bëëdö maal.

⁷ Ni eno wiiø ki man këëde ki jø Jwøk thuwø nee jø Jwøk bööte. Ni eno mooø ki teek bäät wïth tuŋi bëët, ki wïth juurre bëët, ki bäät teeŋ dhøgi bëët, ki tiet mïëri bëët.

⁸ 'Ba eno wøør jø wø bëëdö bäät piny, ni beege jiy bëët moa näk nyeŋge kär göör yi wëël kwøw mar Nyidiel na bëëdö no onää ki kanya poot pinynyi ni kär caa.

⁹ Ŋat mo jïre da ïth, beerra man cek ïthe.

¹⁰ Ni näk da ŋat mo dëëre da weny peec ri leny, eni put ka peec. 'Ba ni näk da ŋat mo dëëre da weny thøw opëëllö, eni di nääö ko opëëllö. Man nø, manynya jïëny gïï mo leth ki ŋäädhe mar jø Jwøk.

¹¹ Kanyøgø Lääy mør aneena mo ö wøk ki yïth ŋøøm, mo wïïe da tuŋi ariiø keda nyidiel, ni cäänö keda thwöra caal nyaaŋ.

¹² Eni tïïö ki køør cuum mar Lääna dïkwøŋ, ni eni wø cäänö buut gø, ni tïïc piny ki jøøa bëëdö yie ni wøøra Lääna dïkwøŋ, Lääna ŋwelle caŋŋø, na doo cööp ri thøø.

¹³ Ni eni wø tïïö ki ŋïïce mo døøŋŋø døc, mo këëlla maac wëëge ööny piny ki maal ni nëënö jï jiy.

¹⁴ Ni eni wø cøøga jø wø bëëdö bäät piny ki køør ŋïïce na näk owëëk eni nee tïïe buut Läänögø. Ni kööm geni ni cwääge ki kït Lääna näk dëëre da ŋwel opëëllö, na kwøw.

¹⁵ Ni eno wëëk man mooc kït Läänögø na näk ocwääö ki jwïëy, kiper nee kït Läänögø tïme ni cäänö, nee jø wø ba wøør kït Läänögø 'näk.

¹⁶ Ni wëëk ceŋ cwïc jiy bëët mooc ki ŋïï wala täärnyïmge, ni beege moa therø ki moa døøŋŋø, ki moa näk okwär ki moa can, ki moa bëëdö ki wïthge ki laaŋe,

¹⁷ kiper nee bäŋe ŋat mo maar lønyø jïre ki man dääbe wala ŋëëö ni näk dëëre bäŋ ŋïï, ni beeye nyeŋ Läänögø, wala göör man wø göör kwään nyeŋŋe ki gø.

¹⁸ 'Ba gïn manynya acaara. Ŋato wïïe leer beerra man caar wïïe kiper tier kwäänö mar nyeŋ Läänögø, kiper beeye kwäänö ma mar dhaanhø. Ni kwäänö mar nyeŋŋe beeye dïpe abïciel ki pïërabïciel ka abïciel.