Mana Nyooth 11 - Wëël Jwøk

Luum Lïŋŋe Moa Näk Ariiø

¹ Kanyøgø aana mooc ki thiir ma mar røøm, ni kööm aani, ni «Ö maal ni rømï Øt Jwøk Mana Dwøŋ, ki gïn wø cïp olämme bääte, ni kwaanï jø wø lämö kaace.

² 'Ba kär niï røma yi kal mar Øt Jwøk Mana Dwøŋ. Wec kanyøce nee dööŋ wøk. Kiper owëëk juurre. 'Ba geni paana en kur keere na näk mar Jwøk oraanyge ki dwäde ma pïëraŋween kurriiø.

³ 'Ba aani lïŋŋe 'moa moa na ariiø owëëga teek man køpge dwør Jwøk ki yïth nïne ma kuma aciel ki dïpe ariiø ki pïërabïciel, ni ge käära keece na abïïe.»

⁴ Lïŋŋe moøgø na ariiø yøø beege jer wø cwøl ni ølip karge riet ki tëëde mo lambae karge riet ni wø cuŋŋi nyïm Kwäärö mar piny.

⁵ 'Ba kany wø näk da ŋat mo manynya man raany geni, maac wø ööa wøk ki dhøkge ni dïïr wïth jø wø män ki geni. Kiper manøgø nø, ŋat wø many man raany geni, cuŋ mare beeye thøø.

⁶ Ni jïge da teek ki man mänge pöölö nee køth ba pädhe yïth nïro køpge dwør Jwøk. Ni jïge da teek bäät pïï ki man døøcge geni remø, ki teek man raanyge piny ki teeŋ jap räny piny bëët, kany wø manyge gø.

⁷ 'Ba noo nø thöörge gïrge na køpge, Lään wø ö wøk ki yi buura näk bäye bäŋ cuŋŋe, okëëdi ki geni ni bööt geni, ni 'näk geni,

⁸ ni ö rïŋ dëëtge ni bëëtge no opäänhnhö waŋjöör paana dwøŋ, na näk nyeŋŋe obaaŋ ri Cødam ki Ijep, kanya 'näk Kwääcge yie bäät jaadha no odëëdö.

⁹ 'Ba jiy oööi ki røk tuŋi, ki wïth juurre, ki dhøgi, ki yïth mïëri, ni neetge dëët jøøgø na näk othøw ki nïne adäk ki thääŋö, ni kwierge geni ki man kïth geni yi kää.

¹⁰ Ni ö jø wø bëëdö bäät piny ni mïn yïthge ki gïrge, ni kanyge, ni moocge dëëtge ki muuce, kiper nyïïkuk Jwøk moø na ariiø yøø na bëëtge ni caara jøøa bëëdö bäät piny.

¹¹ 'Ba køør nïrögø na adäk ki thääŋö yøø, jwïëc kwøw aöö ki baŋ Jwøk ni ci dëëtge, ni öge maal ni cuŋge ki tietge. Ni jït cwïny jøøa neen geni ki lwär mo päl.

¹² Kanyøgø dwøl mo päl awïnyge ni ööi ki maal, ni kööe jïge, ni «Ööu maal kany.» Ni aage maal ki yi pöölö, ni neet nyïïmänge neetø.

¹³ Kanyøgø piny atïmö ni jäŋŋi døc yi caannøca. Ni ö paac thääŋ päänynyi ni pädhe. Ni ö jiyi ma kume abïriiø ni nääi ki dïjäŋ piny, ni ö moa dööŋŋi ni lwäcge døc, ni jiemge Jwø maalø.

¹⁴ Riet gïïa reyø yøø apöödhö nø. 'Ba dää gïïa reyø laara öö.

Luum Bïriet Tuŋi

¹⁵ Ni ö bïriet nyïïatwiet maalli ni kooth tuuŋ mare. Ni jït maalli ki dööti mo døøŋŋø, mo cäänö, ni «Buc piny atïmö na buc Kwääyø ma Jwøk, eni ki Krictø na røønye. 'Ba eno bëënni këël na bäre bäre.»

¹⁶ Ni ö jaae moa näk pïërariiø kurŋween na en bäät wäle moge nyïm Jwøk, ni päthge ki nyïmge ni wøørge Jwøk.

¹⁷ Ni köge, ni «Wui Kwäärö Wuuö Jwøk na en teeki jïre, wa dwøga met ec jïrï, ï ni nut en, ni nudï cøøn, kiper na lwørï teegï na dwøŋ, ni tägï ki man bëën ïïni.

¹⁸ 'Ba mïëri abëëdö ni wëëyö. 'Ba wëëyï apïï, ki kanya di luum jøøa näk othøw ŋølø, ki kanyo ŋat laagï yie ma nyïïkuk Jwøk ki jø Jwøk, ki jø wø lwäär ki nyeŋŋï, moa døøŋŋø ki moa therø, ni beeye kanyo raany jøøa raany piny.»

¹⁹ Kanyøgø Øt Jwøk Mana Dwøŋ maalø ajap, ni ö acanduki mar luumme na tuude ki jiy ni neeni yi Øt Jwøk Mana Dwøŋ. Ni tïm agaackøthi ni mal, ni piny dïmmi døc, ki køth mo märö, ki dïjäŋ piny, ki piiø mo päl.