Mana Nyooth 10 - Wëël Jwøk

Luum Nyïïatwiel Maal Ki Wëëlö Mana Thiinh

¹ Kanyøgø nyïïatwiel maal mør mo teek ajooda ni ööa piny ki maal, no oboony pöölö, ni wïïe da daanø, ni täärnyïme caala cäŋ, ni tiete caala jøøde mo liel ki maac.

² Ni cere da wëëlö mo thiinh mo ojabø. Ni ööe ni këël tier cwïïe yi naama dwøŋ, ni këël tier caame dï piny wøk.

³ Ni cwöte ki dwøl mo päl mo caala dwør ŋuu mo määr. 'Ba na cwöte, køth amäär kwöre abïriiø.

⁴ 'Ba määc køth moø na abïriiø yøø na määrge, ni marge cäänö, aana tïmö naa manynya göör. 'Ba dwøl mør awïnynya mo ööi ki maal ni kööe, ni «Mwön gïïa køp määc køthi karge bïriet, ni ba göörï ge.»

⁵ Ni ö nyïïatwiel maal na neena ni tiere ee këël yi naama dwøŋ, ni tiere maya ee këël dï piny wøk, ni tïŋ cer cwïïe maal,

⁶ ni kööŋ ŋëët ŋat wø bëëdö ni kwøw këël na bäre bäre, eni na cwääc maal ki piny ki gïïa en yïthge bëët, ki näpa døøŋŋø ki gïïa en yïthge, ni kööe, ni «Doo bäŋ gaalø këët,

⁷ 'ba gïna näk tiere okwøŋ Jwøki kan doo wëëga thur kare yïth nïro ö bïriet nyïïatwiel maalli noo kooth tuuŋ, keda mana caan gø jï laage ma nyïïkuk Jwøk.»

⁸ Kanyøgø dwøl mana kwøŋa wïnynyö na öö ki maal acäŋ cäännö ki aani ni kööe, ni «Ciï ni lwørï wëëlö mana no ojabø enøce cer nyïïatwiel maal manø ni tiere aciel en yi naam enø, ni tiere maya ena wøk dï piny.»

⁹ Ni cøøa baŋ nyïïatwiel maal manøgø ni luumma gø nee wëëlö manø ni thiinh enø mëëk aani. Ni kööe jïra, ni «Lwørï ni camï gø. 'Ba otïmö ni keec yiï, 'ba ki dhiï, ŋweeth kaamar maar kïc.»

¹⁰ Ni lwøra wëëlla thiinh cer nyïïatwiel maal, ni cama gø. Ni ŋweeth døc dhaa keda maar kïc. 'Ba na nø cama gø, yia atïïe ni keec.

¹¹ Ni kööm aani, ni «Gïr jiy mo thööth mo poot ena nyïm ki gïr mïëri, ki gïr dhøgi, ki gïr nyeye, ocäŋï køpø.»