Maak 8 - Wëël Jwøk

Kanya Ö Jecu Na Caam Jiy Ma Kume Aŋween

¹ 'Ba yïth nïrögøøni Jecu buute acäŋ jïtö ki lwaak mo päl ni bäŋ gïn camge. Ni ö eni ni cwøl bääge ni kööe jïge,

² ni «Aani cwïnya apädhö ki gïr lwaaøgø, kiper nïne adäk ennø ni ge bëëdö ka aani, ni bäŋ gïn mo camge.

³ 'Ba ni näk ge wëëga wääth mïëcge ni dëëtge da käc, ge bup jöö, kiper møøk ööi ka kwör mo bäyö.»

⁴ Ni løgi ya bääge jïre, ni «?Dhaanhø a dee jït kaa ki muunni dï paap kany mo caam jøøi ki ge?»

⁵ Ni pëëny geni, na «?A muunni adïï ni en jïïu?» Ni köge, na «Abïriiø.»

⁶ Ni kööm lwaak ni pïge piny. Ni lwør muuga näk abïriiø; 'ba kany nø dwøk met ec, apøte, ni mëëk ge bääge nee cïïmge nyïm jiy. Ni ö geni ni pääŋge ge jï lwaak.

⁷ 'Ba jïge da rec mo nøk mo thenh thenh. 'Ba na nø ö Jecu na gwïëth ge, bääge aköömme, ni gïï thuwø doo cïïmmö nyïm jiy.

⁸ Ni cämge ni jäŋge. Ni ö bääge ni kwaanyge thäŋi moa näk opøtø na dhäthö, ni pääŋge yïth gupe abïriiø.

⁹ 'Ba jøøa cämö jïtö ki kar kume aŋween. Køøre Jecu jøøgø awëëk wääth,

¹⁰ ni put ci yi jääy ki bääge, ni ci po jø Dalmanutha.

Jø Paricith Manynya Ŋïï

¹¹ 'Ba jø Paricith aöö ni täkge ki pïëm ki Jecu, ni ge manynya ŋïï baŋe mo ööi ki maal, ni ge päänynya gø.

¹² Ni ö Jecu ni jwïëe døc ki yie bäre, ni kööe, na «?Aŋø ni ö beenhnhø man ni many ŋïï en? Adïëri møn a caana gø jïïu, bäŋ ŋïï mo nyooth jïge.»

¹³ Ni wec geni ni cäŋ døø yi jääy, ni ci løøga.

Pwöc Kiper Thøm Jø Paricith

¹⁴ 'Ba kanyøgøøni bääŋi wïthge awïl ki man käätge ki muunni. 'Ba beeye møø aciel keere na en jïge yi jääy.

¹⁵ Ni ö Jecu ni kööm geni døc, ni «Japu nyeŋŋu, ni gwøgu rou ki thøm jø Paricith, ki thøm Eerat.»

¹⁶ Ni løøŋge dhøkge yïthakicge keerge, ni ge köö, ni «Beeye kiper mana näk jïïø bäŋ muunni.»

¹⁷ 'Ba aŋäc Jecu ni kööe jïge, na «?Aŋø ni løøŋŋu dhøgu en, ni jïïu bäŋ muunni? ?Poot ba jootu en, ni kwanynyu tiere? ?Aŋø, cwïnynyu poot teek ni bëëdu en?

¹⁸ ?Jïïu da nyeŋ, nou ba nëënö? ?Ni jïïu da ïdhi, nou ba wïnyö? ?Uuni, wïthu ba parru?

¹⁹ ?Kanya pøta muuga näk abïïc jï lwaaa näk kume abïïc, a yïth gupe adïï na kwanynyu na päŋ ki thäŋi moa näk opøtø?» Ni köge jïre, na «Apaar kurriiø.»

²⁰ Ni cäŋ köö, ni «?Kanya pøta muuga näk abïriiø jï lwaaa näk kume aŋween, a yïth gupe adïï na kwanynyu na päŋ ki thäŋi moa näk opøtø?» Ni köge jïre, na «Abïriiø.»

²¹ Ni kööe jïge, «?Tiere poot ba kwanynyu nø?»

Kanya Ö Jecu Na Jap Nyeŋ Ŋat Ma Cwør

²² Ni öge yi Betheeda. 'Ba jø møøk akän bäŋ Jecu ki dhaanhø ma cwør, ni kwacge gø nee mule.

²³ Ni mak cer ŋata näk cwør, ni kïth gø wøk ŋää paac. 'Ba na nø ŋuut nyeŋ gø ki laaw, ni kïth ceŋŋe bäät nyeŋ gø, ena pëënynye, ni «?Da gïn mo nëënö jïrï?»

²⁴ Ni tïŋ wïïe maal ni nëënne, ni kööe, na «A neeta jiy, 'ba ge keda jenni mo cäädhö.»

²⁵ Ni ö Jecu ni cäŋ ceŋŋe kïth nyeŋ gø, ni put nëënnö døc, ni døø nyeŋŋe karge, ni neen jammi bëët na wøpe.

²⁶ Ni wëëk gø ciin kar bëëtö mare, ni kööe, ni «Kärï ci dï paac.»

Kanya Ö Piterri Na Caan Gø Ni Jecu Beeye Krictø

²⁷ 'Ba Jecu apööth mïëc Cecaria Pilipay ki bääge. 'Ba na jöökge øtjöö, bääge apëënynye, ni «?Jiy wø köge, ni aana ŋa?»

²⁸ Ni caange gø jïre, ni «Ge wø köö, ni ïïna Jøøn na näk dïlööy na nyuudhi; ni kö møøki, ni ïïna Ilaaja. 'Ba møøk wø köö, ni ïïna nyikugö aciel dï nyïïkuk Jwøk.»

²⁹ Ni pëëny geni, «?A uuni, u wø kööu, ni aana ŋa?» Ni løgi ya Piterri jïre, ni «Bee ïïni na Krictø.»

³⁰ Ni kööm geni ni kär eni caange jï ŋat mør.

Kanya Ö Jecu Na Caan Thøø Mare Jï Bääge

³¹ Køøre Jecu atägö ki man pwöny bääge, ni Wär Dhaanhø gïï mo leth mo thööth ojwøre, ni kwieri ya jaae, ki kwääc laam, ki dïpööye mo ciik Jwøk, ni nääi, ni cäŋi ö maal ri dää nïne.

³² Ni gïnögø caane ni wïnyö jaak. 'Ba ena kïth Piterri wøk, ni täge ki man jook gø.

³³ 'Ba na løk ree ni neen bääge, Piter ajwøe, ni kööe, ni «Daak riï ŋääa, Ceethan! Kiper acaara marï ba en løø Jwøk, 'ba ena løø jiy.»

³⁴ Ni cwöl lwaak baŋe ki bääge ni kööe jïge, ni «Nee da dhaanhø mo manynya man ö køøra, eni dëëre wär taae, ni käär jaadhe na näk odëëdö, ni caath køøra.

³⁵ Kiper ŋato wäro many man gwøk jwïëye, nyääga gø. Ni ŋato wäro nyääk jwïëye kiper nyeŋŋa ki luumma nyään na met, gwøga gø.

³⁶ ?Kiper agïnaŋø ni beer noo duui jï dhaanhø ki man ci pinynyi bäre cere, ni nyääk jwïëye?

³⁷ ?Kiper agïnaŋø noo maar dhaanhe cïp ni wiila jwïëye?

³⁸ 'Ba ŋato wäro wïïe laay ki nyeŋŋa, ki luupa, dï beenhnhø man ni wø kwier luum Jwøk, na jø raay en, Wär Dhaanhø wïïe olaay ki gø thuwø, kanyo ööe ki nyïïatwiet maal moa en kur keerge ka ajiem wänni.»