Maak 5 - Wëël Jwøk

Kanya Ö Jecu Na Køny Ŋat Mo Dëëre Da Jwøk Mo Raac

¹ Kanyøgø Jecu ki bääge gena pïï løø Puul Galili, po jø Gadarin.

² 'Ba na nø ö Jecu wøk ki yi jääy, ŋat mør mo dëëre da jwøk mo raac aö baŋe, ni ööi ka bäät bwör,

³ ŋat mo beeta bäät bwör, mo bäŋ ŋat mo maar lønyø jïre ki man twöc gø këët, këël ki tiimme.

⁴ Kiper eni wø di tööyö ki tiimme ko oguudi, 'ba oguudi wø dääde däädö ni cööt tiimme na thäŋi. Ni tïme ni bäŋ dhaanhø mo løny jïre ki man mak gø.

⁵ 'Ba cooth, wärre ki cääŋŋe wø thööre ni rëëdö bäät bwör ki bäät kïte, ni ŋøøra dëëre keere ki kïte.

⁶ 'Ba na joot Jecu ki kany mo bäär ena reŋ baŋ gø ni wøør gø.

⁷ Ni kööe ki dwøl mo päl, na «?Agïnaŋø noo tïïyï ki aani, Jecu, O Jwøa Dwøŋ ni en Maal? Kööŋ ŋëët Jwøk naa ba caarï.»

⁸ Kiper ena köömme, ni «Ï na jwøk mana raac, ö wøk dëër dhaanhø!»

⁹ 'Ba ena pëëny Jecu, ni «?Nyeŋŋï aŋa?» Ni løk gø, ni «Nyeŋŋa Liijan, kiper wa thööth.»

¹⁰ Ni ö eni ni kwaac Jecu døøc, nee geni ba cöör wøk paanøgø.

¹¹ 'Ba kaace da pïïth othur mo dwøŋ mo cämö nyäär thuur.

¹² Ni kwacge eni, ni «Wëëk wa ciin baŋ othuri, ni wëëgï wa ciin dëëtge.»

¹³ Ni wëëk geni wääth. Ni ö juuga reyø ni öge wøk, ni cige dëët othuri. Ni ö pïïth othur mo jïtö ki kar kume ariiø, ni dhoothge ya ageella bäär ni putge pööth yi naam, ni mutge bëët yi naamøca.

¹⁴ Ni ö dïkwääc othuri ni reŋge, ni caange gø paac, ki mïëya en wøk. Ni ö jiyi ni öge kuna neenge gïna tägö.

¹⁵ Ni öge baŋ Jecu, ni jootge ŋata kwøŋ bëëdö ni dëëre da anäge no opï piny kaace, dëëre ka abïï ni wïïe odøø kare. Ni beeye ŋata kwøŋ anäga thööth na cwøl ni Liijan en dëëre. Ni putge lwäyö.

¹⁶ 'Ba jøøa neen gïna tägö dëër ŋata dëëre da anäge ki gïna tägö dëët othuri, mana neenge aputge caan jï jiy.

¹⁷ Ni ö jøøgø ni kwacge Jecu nee aae poge.

¹⁸ 'Ba kanya eth Jecu yi jääy, ŋata kwøŋ bëëdö ni dëëre da anäge, ena kwaaye, nee eni bëëde ki gø.

¹⁹ 'Ba Jecu akweer, ni kööe jïgø, ni «Ci paac baŋ nyïïawäätï, ni caanï gïna dwøŋ na tïïc Kwäärö dëërï jïge, kaa mana ööe na køny ïïni.»

²⁰ Ni aae ni täge ki køp gïna dwøŋ na tïïc Jecu dëëre yïth mïëc Dikapöla. Ni rëëm yïth jiyi bëët.

Luum Nyi Jaayra Ki Dhaaŋŋa Mul Deŋ Abïïn Jecu

²¹ 'Ba kanya ö Jecu na cäŋ døø løøga ki jääy, lwaak mo päl rege acooŋge buute, ni eni ena bäät naam.

²² 'Ba kanyøgø dhaanhø aciel dï kwääc øt acooŋ lam mo nyeŋŋe cwøl ni Jaayra aöö. 'Ba na joot Jecu, dëëre aleeŋ piny tiet gø.

²³ Ni kwac gø, ni kööe, «Nyaara mo thiinh ena um thøø. Ööï ni kïthï ceŋŋï bääte, kiper nee dëëre jöönne ni kwøe.»

²⁴ Ni cige ki gø. Ni ö lwaaki mo päl ni läpge køør Jecu, ni ge rïïya bääte.

²⁵ 'Ba kanyøce da dhaagø mo dëëre bëëdö ni cwïër ki remø ki cwiiri apaar kurriiø.

²⁶ 'Ba dhaaŋŋøgø, ena ööl døc køør akïïme mo thööth, ni thöör jammi moa en jïre bëët, 'ba dëëre kär jöönnö man thiinh en, 'ba atïmö ni kadhø ni raac.

²⁷ 'Ba gïï Jecu wø cari awïnynye, ni ööe ki dï lwaak ki ŋää gø, ni mul abïïn gø.

²⁸ Kiper ena köö, ni «Këël maa guta abïïge keerge, dëëra jöönnö.»

²⁹ 'Ba kanyøgø remø aput cöö. Ni put gø ŋäc ki dëëre, ni dëëre adøø kare.

³⁰ 'Ba na ö Jecu na ŋäc gø ki dëëre keere ni da teek mo oaay dëëre, ree aput løø baŋ lwaak ni kööe, na «?Aŋa na gut abïïga?»

³¹ Ni kö bääge jïre, ni «Ŋäyï ni lwaak rege ege diil buutï. Ï doo cäŋa köö, na ‹?Aŋa na gut aani?› »

³² 'Ba Jecu jiy araŋe bëët kiper nee ŋata gut gø joode.

³³ 'Ba dhaaŋŋøgøøni na ŋäc gïna tïïc dëëre, ena öö ki lwär ni dëëre kwanynyi, ni leeŋ dëëre piny nyïm Jecu, ni køp jammi bëët jïgø.

³⁴ Kanyøgø Jecu aköö jïgø, «Nyaara, ŋäädhe marï dëërï awëëk jöönnö. Ciï nø ki met ec. Ŋwellï ba duu dëërï këët.»

³⁵ 'Ba kanya poode ni Jecu poot cäänö, jiy møøk aöö ki po kwääy øt acooŋ lam, ni köge, ni «Nyaarï anø thøw. ?Aŋø ni poot öölï dïpööy en?»

³⁶ 'Ba na ö Jecu na wïny gïna caange, ena köö jï kwääy øt acooŋ lam, ni «Kärï lwäyö, 'ba ŋäc ŋäädhe keere.»

³⁷ Ni ö eni ni män jiy bëët ki køøre, ni jïëc Piter ki Jeemeth ki Jøøn na näk cöök Jeemeth.

³⁸ 'Ba na öge po kwääy øt acooŋ lam, jiy ajoode ni ge lweelli ni ge jwöŋö, ni ge göö ko oduuru døc.

³⁹ 'Ba na døny yi øtø, ena köö jïge, na «?Aŋø ni lweellu nou jwöŋö en? Nyilaari kär thøw, 'ba mare niine.»

⁴⁰ Ni ö geni ni ŋeethge bäät gø. 'Ba gena riem wøk bëët, ni lwør wää nyilaalli ki menni ki bääge adäk moøgø, ni dønyge øtø kanya en nyilaalli yie.

⁴¹ Ni mak cer nyilaal ni kööe jïgø, ni «Talitha kumi,» na näk tiere beeye, ni «Nya, nyilaal, a cäänna ïïni, ö maal.»

⁴² Ni put nyilaarøgø ö maal, ni cäädhe. 'Ba cwiic dööŋŋe beege cwiiri apaar kurriiø. Ni put yïthge thäŋŋö døc.

⁴³ Ni ö Jecu ni kööm geni døøc, ni bäŋe ŋat mo ŋäc gïn; ni caan gø jïge, ni moocge nyilaal ki gïn came.