Maak 15 - Wëël Jwøk

Kanya Ö Paylati Na Pëëny Jecu

¹ 'Ba na tïme na amöölla cøøn, kwääc laam, ki jaae, ki dïpööye mo ciik Jwøk, ki kwääc løøe bëët, gena cïp piny ki luubö. Ni twöcge Jecu ni bwøthge gø wøk, ni kïthge gø baŋ Paylat.

² Kanyøgø ena pëëny Paylati, ni «?Bee ïïni na nyeny jø Juuth?» Ni løk gø jïre, na «Acaanï na kare.»

³ Ni ö kwääc laammi ni kïthge bääte ki luup mo thööth.

⁴ 'Ba ena cäŋ Paylati pëënynyö, na «?Aŋø, bäŋ gïn løgï? Neen gïïö ni thööth ni kïthge bäätï yøø.»

⁵ 'Ba Jecu bäŋ gïn mo ee løø këët. Kanyøgø nø, Paylat yie athäŋŋö.

Kanya Ö Jecu Na Ŋøli Yi Thøø

⁶ 'Ba kany wø tïme cooth ni ra ajwöm-cam mar cäŋ Cäŋa Pööth Thøøe Yie, Paylat wø pätö jïge ki dhaanhø røk jø wø en øt twöc, ŋat wø pëënyge jaak.

⁷ 'Ba ki røk jø ageem moa en øt twöc, da nyen mo cwøl ni Baraba, ŋat mo onääö ki jiy ra ageem.

⁸ 'Ba lwaak aöö ni pëënyge Paylat ki man tïïc gïn wø tïïe wø bëëde jïge.

⁹ Ni pëëny geni, no «?U manynya aani man päda nyeny jø Juuth jïïu?»

¹⁰ Kiper ajoode ni kwääc laam marge keec na kälge gø.

¹¹ 'Ba kwääc laam, yi lwaak acoonge nee tïme ni Paylat päta Baraba jïge na kar Jecu.

¹² 'Ba gena cäŋ Paylati pëënynyö, na «?Agïnaŋø nø, noo tïïa ki ŋat cwøllu en ni nyeny jø Juuth?»

¹³ Ni cäŋge rëëdö, ni «Gurï bäät jaadha no odëëdö!»

¹⁴ Ni kö Paylati jïge, na «?Aŋø, agïnaŋø na raac ni ee tïïö?» 'Ba kaagø nø, gena put rëëdö døc ni kaala mana dïkwøŋ, ni «Gurï bäät jaadha no odëëdö!»

¹⁵ 'Ba Paylat na many man mïn yi lwaaki, Baraba apän geni, ni wëëk Jecu pwöt ka alaŋŋa, ni cïp gø nee gur bäät jaadha no odëëdö.

Kanya Ö Jø Tøŋŋi Na Buuge Jecu

¹⁶ Ni ö jø tøŋŋi ni bwøthge Jecu yi øtø kany wø bëët jø tøŋŋi yie. Ni cwølge jø tøŋ bëët kanya ciel.

¹⁷ Ni kïthge dëër gø ka abïï ma dïmuur, ni tïïge ka adun koodhi, ni kïthge gø wïïe.

¹⁸ Ni täkge ki man määthge gø, ni «Dëël jööt nø, nyeny jø Juuth!»

¹⁹ Ni pöötge wï gø ko otöök, ni ŋuutge bäät gø ki laaw, ni këëlge cøŋge piny, keda ge wøøra gø.

²⁰ 'Ba na nø buuge gø, abïïna näk dïmuur akälge wøk dëër gø, ni dwøkge abïïge dëëre. Ni bwøthge gø wøk kuna guri bäät jaadha no odëëdö.

Kanya 'Näk Jecu Bäät Jaadha No Odëëdö

²¹ 'Ba kanyøgø, da ŋat mør ma nyï Cayriin mo cäädha jöö mo ööi ka dï paac, mo nyeŋŋe Cayman, na näk wää Alekdhander ki Rupa. Ena mak dïkuye kiper nee jaadha no odëëdö mar Jecu kääre.

²² Ni kïthge Jecu kany mo cwøl na Gølgøtha na näk tiere beeye ni Kar Cuu Wïc.

²³ Ni moocge gø ki køøŋ nyïïomøki mo orwöbö ki gïn mo keec. 'Ba käre jïëö.

²⁴ Ni gurge gø bäät jaadha no odëëdö, ni pääŋge abïïge yïthakicge, ki køør ŋïïce mo wø tïïc ki ri kwääk ki baw, kiper nee mano käl ŋati man nø joot.

²⁵ 'Ba kar kanyøca beeye kar caae abïŋween ka amöölla na gurge Jecu bäät jaadha no odëëdö.

²⁶ 'Ba luumma kïthge bääte, ogöörö, ni «Nyeny jø Juuth.»

²⁷ 'Ba da jø ageem ariiø ma agurge buute thuwø, na aciel ena bäät cwïïe, ni maya ena bäät caame.

²⁹ 'Ba jø wø pöödhi ki kaace wïthge wø kenyge kenyø, ni marge abuua, ni köge, «Ï na doo nyak Øt Jwøk Mana Dwøŋ ni cäŋi gø geerrø ki nïne adäk,

³⁰ køny riï nø, ni ööï piny ki bäät jaadha no odëëdö.»

³¹ 'Ba ena buu kwääc laammi thuwø, ni ge cäänö yïthakicge ki dïpööye mo ciik Jwøk ni ge köö, ni «Eni wø kønya jø møøk, ba dëëre ba maar køny.

³² Wär eni na Krictø na näk nyeny jø Icriel ö piny ennø ki bäät jaadha no odëëdö, nee neenø ni jïëø.» 'Ba jøøa näk ogurö ki eni, ena buuge thuwø.

Luum Thøø Mar Jecu

³³ 'Ba na tïme na caae apaar kurriiø ki dïcäŋ, piny atïmö na muudhö bäre këël caae adäk ka abøøya.

³⁴ 'Ba na tïme na caae adäk, Jecu aköök ki dwøl mo päl, ni «?Elöi, Elöi, lama cabakthani?» na näk tiere beeye, ni «?Jwøa, Jwøa, aŋø ni weyï aani en?»

³⁵ 'Ba jø møøk røk jøøa cuŋŋö kaace, na wïnyge gøøni, gena köö, ni «Neennu, eni cwøla Ilaaja.»

³⁶ Ni ö dhaanhe acielli ni reŋe, ni cøt lïïpa yi køøŋ nyïïomøki mo wac, ni coom gø wï otöök, ni rwaak gø baŋ gø nee maadhe, ni kööe, ni «Weyu nee neenø nee Ilaaja ööa kuna käl gø piny.»

³⁷ 'Ba Jecu aköök døc, ni jwïëe ka aŋuudi.

³⁸ 'Ba kanyøgø nø, abïïna näk ogëëŋö mar Øt Jwøk Mana Dwøŋ aput jeeø ki dïëre, ni tägi ka maal ni këët piny.

³⁹ 'Ba kwääy dïkuye ma dïpa mo cuŋŋö ni dïët ki eni, na joot gø, ni ena jwïëy ka aŋuudi na enøgønø, ena köö, na «Adïëri møn, ŋati en beeye O Jwøk.»

⁴⁰ 'Ba kaace thuwø da mään mo nëënö ka kany mo bäär, ni Meeri Magdalin, ki nyaan ma Calöme, ki Meeri mii Jeemeth mana thiinh ki Jöce, ena dïge,

⁴¹ ni beege määr wø cäädhi køør Jecu kanya en yi Galili, ni tïnynya eni. 'Ba da mään møøk thuwø mo thööth mo oöö yi Jerucalem ki eni na aciel.

Kanya Pïël Jecu Yi Bwörö

⁴² 'Ba kanya tïm pinynyi na abøøya, kiper mana tïme ni beeye cäŋ jiiŋ røk ni jøw bunna cäŋ jwömö,

⁴³ Jocep nyï Arimathia, ŋata ŋäc ni bëëtö mare beer ki røk kwääc løøe, mo bëëdö ni køya buc Jwøk ki dëëre, cwïnye amaae ni ci baŋ Paylat, ni kwac dëër Jecu.

⁴⁴ 'Ba Paylat yie arëëm ki man näk mo Jecu onø thøø. 'Ba na cwøl kwääy dïkuye ma dïpa, apëënynye ki man näk mo Jecu onø thøø.

⁴⁵ 'Ba na wïny gø baŋ kwääy dïkuye ma dïpa ni eno nø thøø, dëër gø awëëk Jocep.

⁴⁶ Ni ö Jocepi ni ŋëëe ka abïïn koony, ni käl dëër Jecu piny, ni bøøny gø ka abïïnögø, ni pïël gø yi bwöya näk mare, e na Jocep, na näk onø løøt yi kïdi. Ni ŋïël kïdi mør dhi bwöyögø.

⁴⁷ 'Ba Meeri Magdalin ki Meeri mii Jöce kanya kani yie aneenge.