Maak 10 - Wëël Jwøk

Pwöc Mana Caan Jecu Kiper Apääk Mar Nywöm

¹ Køøre Jecu atïŋŋö kaace ni ci yïth mïëc Judia løø Naam Jördan løøga, ni ö lwaae ni cäŋge rege cooŋ buute. Ni cäŋ ge pwönynyö keda man wø bëëde cøøn.

² Ni ö jø Paricithi baŋ Jecu ni pëënyge gø ni ge päänynya gø, ni köge, ni «?Beeye gïn mo beer jï dhaanhø ki man kwier cïïe?»

³ Ni løk gø jïge, na «?Agïnaŋø na køp Modhe jïïu?»

⁴ Ni köge, ni «Modhe dhaanhø ajïëe ki man gööde ki wëël apääk ni kwier cïïe.»

⁵ 'Ba Jecu aköö jïge, «Modhe ciigøgø gööre kaper mana teek cwïnynyu.

⁶ 'Ba ki kanya cak piny, Jwøk jiy ‹acwääe na thwønh ki maath.›

⁷ ‹Kiper manøgønø, dhaanhø wänni ki menni wø wiie wiiø ni dwätge ki cïïe,

⁸ ni ö geni karge riet ni tïmge na dëël aciel.› Kanyøgønø, ge patha ariiø këët, 'ba gena dëël aciel.

⁹ Kiper manøgønø, gïï mo onø dwal Jwøki, kär dee ŋat pää ge.»

¹⁰ 'Ba kanya døøge yi øtø, ena cäŋ bääŋi pëënynyö kiper gïnögø.

¹¹ Ni løk gø jïge, ni «Ŋato wäro kwier cïïe, ni nyöömme ki dhaagø mør, mare luk ki gø.

¹² 'Ba ni näk kweerra dhaagø ki cwøre, ni nywømi ya dïcwøøe mør, mare luk.»

Kanya Ö Jecu Na Gwïëth Obwöre

¹³ Kanyøgø jø møøk akän baŋ Jecu ko obwöre kiper nee ge mule. 'Ba gena jook bääŋi.

¹⁴ 'Ba gïnögø na neeni ya Jecu, cwïnye aränynyö, ni kööe jïge, ni «Weyu obwöre, nee öge baŋa; kär geni mänu. Kiper teeŋ obwöre moøgø nø buc Jwøk a marge.

¹⁵ Adïëri møn, a caana gø jïïu, ni ŋato wäro ba jïëc buc Jwøk kaamar nyilaal, ba doo dønynya yi gø.»

¹⁶ Ni tïŋ geni kööre, ni kïth ceŋŋe bäätge, ni gwïëth ge.

Kanya Ö Nyen Mør Mo Okwär Baŋ Jecu

¹⁷ 'Ba kanya ö Jecu na tïŋ wääth mare, dhaanhø mør areŋ baŋe, ni këël cøŋŋe piny nyïm gø, ni pëëny gø, ni «Dïpööy mana beer, ?agïnaŋø noo tïïa, kiper nee kwøw mana näk adïëri mo bäŋ cuŋŋe jooda?»

¹⁸ 'Ba adwøk Jecu jïgø, na «?Aŋø ni cwølï aani naa beer en? Bäŋ ŋat mo beer, 'ba beeye Jwøk keere.

¹⁹ Gïïa cem ŋäyï, ni ‹Kärï nägö ki dhaanhø. Kärï kännö ki luk. Kärï kwätö. Kärï cäänö ki tööt dëër dhaanhø. Kärï mutö. Wøør wäru ki meru.› »

²⁰ Ni kööe jïgø, ni «Dïpööy, gïïögø bëët yaa gwøø, këël ki mana käla thïnhö.»

²¹ 'Ba jïre aneen Jecu ni mëër ki gø, ni kööe jïgø, ni «Da gïrpiny aciel mo poot kärï tïïö. Ciï ni dwøgï gïïa en jïrï bëët pwödhö, ni mëëgï gwetge jøøa can, ni ööï ni cäädhï køøra, 'ba ïïno jïti ki jap kwär maal.»

²² 'Ba na wïny luummögø, täärnyïme aniduk, ni aae ni cwïnye opädhö. Kiper eni jïre da jammi mo thööth døc.

²³ 'Ba Jecu alwïthö ni kööe jï bääge, «Døny buc Jwøk oteee ki teek mo nyïëdi jï jøø no okwär yøø ki man dønyge yie.»

²⁴ 'Ba bääge yïthge athäŋŋö ki luupe. 'Ba Jecu acäŋ köö jïge, «Obwöre, døny buc Jwøk teee ki teek mo nyïëdi ki man døny yie.

²⁵ Jööta eni jï athïrööl ki man dønye ki waŋ lïlmu ki man ö ŋat mo okwärri ni døny buc Jwøk.»

²⁶ 'Ba yïthge athäŋŋö døc, ni köge jïgø, na «?Aŋa nø, noo maar piem?»

²⁷ 'Ba jïge aneen Jecu ni kööe, ni «Ki jï jiy, gïnögø ba maar lønyø, 'ba paa ki jï Jwøk. Kiper jammi bëët løny jï Jwøk.»

²⁸ 'Ba Piter atägö ki man cään Jecu, ni kööe, ni «Neenï, kawaane waani jammi bëët awiiwa piny, ni caathwa køørï.»

²⁹ Ni kö Jecu, na «Adïëri møn, a caana gø jïïu, ni dhaanhø mo paac ee wiiø, wala nyïïmenni, wala wänni ki menni, wala obwöre, wala pwöth, kiper nyeŋŋa ki luumma nyään na met,

³⁰ eno mooc ki jammi mo thööth yi pinyi ennø, ni kaala moa dïkwøŋ, teeŋ ka uudi, ki nyïïmëëe, ki mëëe, ko obwöre, ki pwöth, këël ki caannø thuwø. 'Ba piny mano ööi beeye kwøw mana näk adïëri na bäŋ cuŋŋe.

³¹ 'Ba jiy mo thööth mo en nyïm ennø, odøø cään, ni ö mo en cään ennø, ni pööthge maal.»

Kanya Ö Jecu Na Cäŋ Thøø Mare Caannø Jï Bääge

³² 'Ba kanya ö Jecu ki bääge na cääthge jöö ni ge cøøa yi Jerucalem, ni Jecu beeye na bwödhö nyïmge, bääge yïthge athäŋŋö, ni lwäc jøøa läp køørge. 'Ba Jecu, bääge na näk apaar kurriiø acäŋ lwørrø, ni täge ki man caan gïno tägi dëëre jïge.

³³ Ni kööe, ni «Neennu, ø cøøa yi Jerucalem. 'Ba Wär Dhaanhø ocïp ceŋ kwääc laam ki dïpööye mo ciik Jwøk. 'Ba eno ŋølge yi thøø, ni cïpge gø ceŋ juurre.

³⁴ Ni ö geni ni buuge gø, ni ŋuutge bäät gø ki laaw, ni pwötge gø ni 'näkge gø. 'Ba køør nïne adäk eno ö maal.»

Kanya Ö Jeemeth Ki Jøøn Na Kwacge Jecu Kiper Pïïn Kar Ajiem Mare

³⁵ Kanyøgø Jeemeth ki Jøøn, ge na wäät Dhebedi, gena pööth nyïm baŋ Jecu, ni köge jïgø, ni «Dïpööy, wa manynya ïïni nee gïno pëënywa ïïni ki gø en nee tïïyï jïwa.»

³⁶ Ni kööe jïge, na «?Agïnaŋø ni manynyu nee tïïa jïïu?»

³⁷ Ni köge jïgø, ni «Wëëk wa pïïn kar ajiemï, ni dhaanhø aciel ena bäät cwïïï, ni ö maya ni en bäät caamï.»

³⁸ 'Ba Jecu aköö jïge, no «U pëënynya gïn mo kuyu. ?Maara lønyø jïïu ki man mäthu ka athöönhnho mätha ki gø? ?Wala dëëtu di lwøø ki lwøk dëël mano lwøk a ki gø?»

³⁹ Ni köge jïgø, ni «Løny jïwa.» 'Ba Jecu aköö jïge, na «Athöönhnho maadha, omaathu møn, ni lwøk dëël mano lwøk aani ki gø, uuno lwøk ki gø.

⁴⁰ 'Ba pïïn bäät cwïïa wala bäät caama, ba en jïra ki man cïba gø, 'ba ocïp jï jøøa jiiŋ gø kiperge.»

⁴¹ 'Ba na wïnynyi ya bääge moa näk apaar, gena tägö ki man gootge ki Jeemeth ki Jøøn.

⁴² Ni ö Jecu ni cwøl geni baŋe, ni kööe jïge, ni «Ŋäyu, ni jø wø näk kwääri bäät juurre, dëëtge ege cuumö bäät jiy moge, ni ö jøøa kwörge døøŋŋø dïge ni nyoothge teekge bäät jiy moa en tietge.

⁴³ 'Ba ba doo tïmö na enønø ki baŋu. 'Ba ŋato wäro many man tïme ni dwøŋŋa kare dïïu, wär tïme na ŋat mo tïnynya uuni.

⁴⁴ Ni ŋat wäro many man tïme ni ena nyïm dïïu, wär dëëre døøc ma laŋŋø jï jiy bëët.

⁴⁵ Kiper Wär Dhaanhø thuwø kär öö nee tïnynyi, 'ba ööi kaper nee jø møøk tïnynye, ni cïpa jwïëye na wïïdi kiper jiy mo thööth.»

Kanya Ö Jecu Na Jap Nyeŋ Bartimia

⁴⁶ Kanyøgø Jecu ki bääge gena ö Jerikö. 'Ba kanya tïŋŋe Jerikö ki bääge ki lwaak mo päl døc, nyen ma cwør mo cwøl ni Bartimia wär Timia ajootge no opï piny thääŋ jöö ni kwääö.

⁴⁷ 'Ba na wïny gø ni manøgø beeye Jecu nyï Nadhareth, ena tägö ki rëëdö, ni «Jecu Nyikwaar Deebit, køny canna!»

⁴⁸ Ni joogi ya jiyi mo thööthi ni ge caana gø jïre, nee lïŋe. 'Ba beeye mana rëëde døc nø, ni «Nyikwaar Deebit, køny canna!»

⁴⁹ Ni cuŋ Jecu, ni kööe, ni «Cwøllu eni.» Ni ö geni ni cwølge ŋata näk cwør, ni köge jïgø, «Mak cwïnyï! Ö maal! Ïïna cwøle.»

⁵⁰ Ni ö eni ni put koonhnhe leeŋ piny, ni päny maal ni ö baŋ Jecu.

⁵¹ Ni kö Jecu jïgø, na «?Agïnaŋø ni manynyï nee tïïa jïrï?» Ni ö cwønøgø ni kööe jïgø, «Dïpööy, wëëk nyeŋŋa døø karge.»

⁵² Ni kö Jecu jïgø, «Ciï nø; ŋäädhe marï dëërï adwøk kare.» Ni put nyeŋŋe døø kare, ni läp køør Jecu øtjöö.