Luup Dïpööy 8 - Wëël Jwøk

¹ ?Aŋø, aŋa ni rööm ŋati ni wïïe leer en? ?Aŋø, aŋa ni ŋäc jammi bëët ki man pät tietge? Leec wïc täärnyïm dhaanhø døøye mo leer, ni wiila cøl nyïm.

Pwöc Ki Man Gwøk Luum Nyeya

² Aani, a cäänna ïïni, «Gwøk luum nyeya kiper kööŋ mana kööŋï ki gø nyïm Jwøk.

³ Kärï läädö ki man paanyï dëërï buut nyeya. Kärï dwätö ki jiy mo tïïya gïn mo raac, kiper løny jï nyeya ki man tïïc gïna met yie ki gø jaak.»

⁴ Kiper mana näk mo dwør nyeya teek, ?aŋa ni løny jïre ki man kööe jïgø, na «Agïnaŋø ni tïïyï en?»

⁵ Ŋat wø gwøk dwør nyeya bäŋ gïn mo leth mo tïïc dëëre, ni ŋat mo wïïe leer da caa ma kare mo ŋääe ki man tïïc gïrpiny yie ki jöö ma kare.

⁶ Kiper këël ni bëëde ni jiy oööl jaak en, da caa ma kare ki man tïïc gïrpiny man nø yie ki jöö ma kare.

⁷ Kaawat man bëëde en ni bäŋ dhaanhø mo ŋäc jap nyïm, ?aŋa nø, noo caan japo tägi yi nyïm jï dhaanhø?

⁸ Bäŋ dhaanhø mo jïre da teek bäät jamø ki man jook gø, ni bäŋ dhaanhø mo løny jïre ki man män ree ki thøø dïcäŋ thøø mare. Ni bäŋ ŋat leny mo wec kwääy lenynyi nee aae jaak kany wø näk ri leny, ni gïn mo leth ba kääŋi ki man täge dëët jø wø tïïc gïï mo reyø.

⁹ Aani, gïnögø bäre ajooda, kanya cäda bäät jammi moi bëët ni wø tïïc tier cäŋ piny kany en, ni da jiy mo geno ö maal bäät jø møøk ni ge caara ge.

Luup Moa Caan Kiper Jøøa Bëëtge Beyø Ki Jøøa Bëëtge Reyø

¹⁰ Maya thuwø, aana jïtö ki jø raay mo othøw, ni di koonyø no owøørø, ni beege jøøa wara bëëdö ni ge dønynya Øt Lam mana en kur keere ni ge duua wøk ki yie, ge na wara jïtö ka ajiem yi pääny kanya wara tïïge ki raay. 'Ba manøgø thuwø poot na gïn mo bäŋ tiere.

¹¹ 'Ba kany wø bëëde ni luum ŋat mo otïïö ki gïï mo reyø kär laar ŋøl, cwïny jiy bëëdö ni päŋ ki man tïïge ki gïï mo reyø thuwø.

¹² 'Ba këël ŋat raay doo bëëdö ni tïïö ki gïï mo reyø ki kwöre ma dïpa ni poot bëëdö ni kwøw ki cwiiri mo thööth jaak, aani, ŋääa ni jø wø lwäär Jwøk ki cwïnyge na adïëri poot beerra marge.

¹³ 'Ba kiper ŋat wø tïïc gïn mo raac ni wø bëëdö ni ba lwäär ki Jwøk, tïmö ni ba beer kipere. Eni nïr kwøw moe tïmö kaamar tïpö ni wø ba ruu ki kany mo bäär.

¹⁴ 'Ba da gïn mør thuwø mo bäŋ tiere mo wø tägö bäät piny kany en, ni gïnaca bee en. Da jiy mo bëëtge beyø mo gïïa doo tägö dëët jøøa bëëtge reyø tïmö ni täga dëëtge, ni ö gïïa doo rømø ki man täkge dëët jøøa bëëtge reyø ni tïme ni täga dëët jøøa bëëtge beyø. 'Ba manøgø thuwø a caana ni poot na gïn mo bäŋ tiere.

¹⁵ 'Ba aana köö ni dhaanhø doo bëëdö ki met ec, kiper bäŋ gïrpiny mo beerra eni kiper dhaanhø tier cäŋ piny kany, ni näk mo patha man cäme, ni mädhe ni mïn yie. 'Ba eno bëëdö no ojøl met eci ri tïïc mare na teek ki yïth nïr kwøw moe bëët moa cïp Jwøki jïre tier cäŋ piny kany.

¹⁶ 'Ba kanya cäda ki cwïnya ki man kwanya tier leec wïc nee tïïe moi ni wø tïïc bäät piny en nee jooda, ni jooda gø ni dhaanhø ba buti ki waŋcäŋ ki wäär ki køør tïïc man wø tïïe,

¹⁷ køøre aani, tïïc bäre mar Jwøk aputa joot; ni puta gø ŋäc ni bäŋ dhaanhø mo løny jïre ki man kwany tiet jammi moi bëët ni wø tïïc tier cäŋ piny kany en. Këël dhaanhø doo ŋäbö ki man joot gø, dhäthö jïre. Këël ŋat mo wïïe leer doo köö, ni «Aani, ŋääa,» ba løny ki man ŋäc gø.