Luup Dïpööy 6 - Wëël Jwøk

Ki Man Ŋääth Jap Piny Beeye Gïn Mo Bäŋ Tiere

¹ 'Ba da gïn ma ajooda mo raac døc tier cäŋ piny kany, ni beeye gïn mo jiy ee öölö døc.

² Jwøk løny ki man mooc dhaanhø ki jap kwär, ki gwel, ki dööŋ kar, nee dhaanhø bëëde ni bäŋ gïn cane røk jammi bëët mo wø manynye ki cwïnye; 'ba Jwøk ŋatøgø ba tïïe nee yie mïnne ki japøge, kiper beeye ŋat mo path noo yie mïnni ki japøge. Manøgø beeye gïn mo bäŋ tiere ni beeye rääm mo raac døc.

³ Dhaanhø løny ki man näk mo jïre da obwöre ma dïpa, ni ö eni ni bëëde ki cwiiri mo thööth ni eni kwøw; 'ba këël cwiiri moa beede doo thööth, ni näk mo yie kär mïnnö ki japa beyø na joode, ni eni ba koony ki koony ma kare, aani, a doo köö, ni «Beerra dhaanhø mo obwön wøk ni kaala eni.

⁴ Kiper dhaanhø mo obwön wøk caala gïn mo bäŋ tiere ni pöötha yi muudhö; ni ö nyeŋŋe ni put nibäc yi muudhö.

⁵ Eni na bwön wøk enø, cäŋ ba neene, ni bäŋ gïn mo ŋääe na bäre. 'Ba eni, beerra mare ki dhaanhø maya.

⁶ Këël dhaanhø doo bëëdö ni kwøw ki cwiiri ma kuma kwöre ariiø, ni näk mo yie kär mïnnö ki japa beyø na joode, ?aŋø, jiy bëët ba ci kaagø na aciel enø?»

⁷ Öölö mar dhaanhø ki tïïc, beeye kiper yie; 'ba eni poot bëëdö ni ba jäŋ.

⁸ ?Aŋø, ŋat mo wïïe leer beere nidïï ni kaala ŋat mo wïïe bäŋ acaara? ?Agïnaŋø ni duue dëër ŋat mo can ki man tïïc bëëtö mare ni beer nyïm jiy?

⁹ Beerra gïn mo oneenø ki waŋ ni kaala gïn mo di parø ki cwïny. Manøgø thuwø poot na gïn mo bäŋ tiere ni caala man many jamø nee mak.

Beeye Jwøk Keere Ni Ŋäc Jammi Bëët

¹⁰ Gïn wø nut, nyeŋŋe oløny ni ŋäc, ni dhaanhø oløny ni ŋäc ki man näk mo ena dhaanhø. 'Ba dhaanhø ba løny jïre ki man pïëme ki Jwøk na teek na näk kaala eni.

¹¹ Kiper da luup mo thööth mo wø di carø ni bäŋ tietge. ?'Ba agïnaŋø noo duue nø dëër dhaanhø?

¹² ?Kiper, aŋa ni wø ŋäc gïna beer kiper dhaanhø kany wø poode ni kwøw ki yïth nïrögø ni nøk yøø ni wø bäŋ tietge? Nïrögø wø laara pöödhö kaamar tïpö. ?Kiper aŋa ni løny jïre ki man caan gïno tägi køør thøø mar dhaanhø tier cäŋ piny kany?