Luup Dïpööy 3 - Wëël Jwøk

Gïrpiny Man Nø, Da Caa Kipere

¹ Da caae mo ocïp piny kiper jammi bëët. Tïïe bëët mo wø tïïc tier maal piny kany, man nø da caa kipere.

² Da caa mar nyöödö, ki caa mar thøø. da caa man piith jammi yie, ki caa man puth ge wøk yie.

³ Da caa mar 'näk, ki caa man wëëk jiy kwøw yie; da caa man toor uudi piny yie, ki caa man geer uudi yie.

⁴ Da caa mo dhaanhø jwöŋö yie, ki caa mo dhaanhø ŋeethø yie; da caa ma mar kïmmö, ki caa ma mar meeŋ.

⁵ Da caa man leeŋ kïte wøk yie, ki caa man cooŋ geni yie; da caa man gääm dëël yie ki mëër, ki caa man ba gääm dëël yie.

⁶ Da caa man many gïrpiny yie, ki caa man cwat eci yie ni ba joot; da caa man gwøk gïrpiny yie, ki caa man leeŋi wøk yie.

⁷ Da caa ma abïï di jeeyø yie, ki caa man kwøy yie; da caa mar lïŋŋö, ki caa mar cäänö.

⁸ Da caa mar mëër, ki caa mar män; da caa mar leny, ki caa mar bëët-mëër.

⁹ ?Aŋø, agïnaŋø nø, noo joot ŋat tïïci ki køør öölö mare?

¹⁰ Aani, ajooda ki man näk mo da tïïc mo teek mo okïth Jwøki bäät jiy na baa bäätge.

¹¹ Jwøk jammi bëët ee tïïö ni beyø ki yïth caae moge. Ni eni thuwø dhaanhø ee mooø ka acaara man ŋäc bëëtö mo bäŋ cuŋŋe, 'ba poot bäŋ gïn mo kwany dhaanhe kiper tïïe mo Jwøk moa tïïe ki mana täge wïlöölö këël mano këët ya aŋuudi.

¹² Aani, ajooda ni bäŋ gïn mo beerra eni kiper dhaanhø mo kaala man mïn yie, ki man tïïe ki gïn mo beer yïth nïr kwøw moe.

¹³ Ŋati man nø doo cämö ni mädhe ni mïn yie ki køør japa tïïe bëët ki öölö mare, ni manøgø beeye muuy mana cïp Jwøki.

¹⁴ Aani, ŋääa ni jammi mo wø tïïc Jwøki bëëdö na bäre bäre; ni bäŋ gïrpiny mo løny man meedi bäätge wala mo käla wøk ki rege, kiper jammi moa tïïc Jwøki beeye kiper nee jiy lwäärge ki eni.

¹⁵ Gïï no onø tägö ii ki moo cäŋ tägö yi nyïm beege japa tägö dïkwøŋ, kiper poot na japøge ni wø cäŋ Jwøki tïïyö nee täkge.

Ŋøl Ma Kare Ki Jammi Moo En Yi Nyïm Ŋäya Jwøki

¹⁶ Aani thuwø gïn mør mo yaa cäŋ jootø tier cäŋ piny kany bee en; kanya doo naa kar ŋøl luup ma kare, atïmö ni nuta rääö yie, ni ö kanya doo naa kar ŋøl luup ma adïëri ni tïme thuwø ni nuta rääö yie.

¹⁷ Aani, aana cädö ki cwïnya ni kööa, ni «Jwøk luup jiy bëët moa bëëtge tiir, ki moa bëëtge raac, ŋøle ŋølø na kare, kiper jammi bëët ki tïïe bëët da caa marge mo öö.»

¹⁸ Ni cäŋa cädö ki cwïnya ni kööa, ni «Ka adïëri møn, Jwøk jiy apäänynye nee joot jiyi ki man näk mo ge röömi ki lääy.»

¹⁹ Kiper gïn wø tägi dëër dhaanhø ki gïn wø tägi dëër lääy poot na teeŋ gïrpiny aciel. Dhaanhø thøw ni lääy thøw thuwø; ni ge bëët dëëtge da jwïëy ma teeŋ aciel, ni ba løny ki man cät dhaanhe ni pöödha eni ki lääy, kiper bëëtö bäŋ tiere kiperge bëët.

²⁰ Geni bëët, dëëtge cøøa kanya aciel; ni ge bëët ge käla yi tør, ni ge poot døøa yi tør bëët.

²¹ ?Aŋa ni ŋäc gø ki man näk mo jwïëc dhaanhø cøøa maal ni jwïëc lääy cøøa tiet ŋøøm?

²² 'Ba aani, ajooda ni bäŋ gïn mo beerra eni kiper dhaanhø mo kaala man mïn yie ki køør jammi moe mo wø tïïe, kiper beeye gïna dööŋ jïre na kure. Kiper kanyo thøøe ba løny ki man duue ni joot japa tägö køøre.