Luup Dïpööy 11 - Wëël Jwøk

Pwöc Kiper Tïïc Mo Beer

¹ Bëëdï ni iï bäth ki man cïpï, kiper dïcäŋ aciel ï di duunnö.

² Pääŋ jammi moï ki kwöre abïriiø wala kwöre abära, kiper gïn mo raac mo løny ki man täge bäät piny kuyï.

³ Kany wø näk mo maal ogääbö ki pøøl, ge wø puta lööny piny na køth; ni kany wø näk mo jaath opäth jï tier-piny wala jï wï-piny, wø puta bëëtö kanya näk mo eno päth yie.

⁴ Ŋat wø bëëdö ni køya jamø ba pïïdhö, ni ŋat wø bëëdö ni raŋŋa pøøl bäŋ caammi mo kaae.

⁵ Kaawat man bëëdï en ni jöör jamø kuyï ki yi jöö man wø cwääc dhaanhø ec ki gø, kaawat manøgø thuwø ba løny ki man ŋäyï tïïe mo Jwøk, eni na tïïc jammi bëët.

⁶ Piith köödhi moï ka amöölla, ni ba øc dëërï piny ki man pïïdhï ka abøøya thuwø, kiper kuyï ki man näk mo pïïdhö marï thura kare ka amöölla wala abøøya, wala kwörögø tïmö ni beyø bëët kiperï.

⁷ Tar wøp, ni beeye gïn mo beer kiper waŋ ki man neen cäŋ.

⁸ Ni näk mo dhaanhø bëëdö ki cwiiri mo thööth, beerra man ö eni ni mïn yie ki yïth cwiiyøgø bëët. 'Ba beerra man caar wïïe thuwø ki nïr muudhö, kiper nïne mo thööth mo muudhö løny ki man öge. 'Ba jammi bëët moo ööi poot bäŋ tietge.

Pwöc Kiper Dhaanhø Ki Man Caar Wïïe Ki Ŋata Cwääc Gø

⁹ Ï na thiinh, iï mïnne kany poodï niï thiinh en; beerra man mïn cwïnyï yïth nïr thïnhö moï, ni caathï køør jap wø many cwïnyï ki mo wø neetï ki waŋï. 'Ba wär ŋäyï ni Jwøk ï pëënynye pëënynyö kiper japøge bëët.

¹⁰ Kiper manøgønø, män cwïnyï ka acaare mo reyø, ni mänï dëërï ki gïï wø leth. Kiper nïr thïnhö mo bëëtö marï ki nïra beyø mo met ec marï bäŋ tietge.