Luup Dïpööy 1 - Wëël Jwøk

Jammi Bëët Bäŋ Tietge

¹ Moi beege luup Dïpööy ma o Deebit, ni beeye Dïpööy mana bëëdö na nyeya yi Jerucalem.

² Dïpööy aköö, ni «Bëëtö bäŋ tiere! Bëëtö bäŋ tiere! Bëëtö bäŋ tiere na bäre! Jammi bëët bäŋ tietge!»

³ ?Agïnaŋø ni wø joot dhaanhe ki yïth tïïe moe bëët ni bëëde ni ree ee öölö ki tïïc tier cäŋ piny kany en?

⁴ Beenhnhe di nywølø ni ge pöödhö, ba piny poot bëëdö ni nut kare na bäre bäre.

⁵ Cäŋ wø tuulö ni pädhe, ni laar døø køøre kanya tuule ki yie.

⁶ Jamø wø kwöta tier-piny, ni cäŋ ree løgø ni kwöt wï-piny; ni bëëdö ni piny jøøye jøøyø ni cäŋa døø kanya täge ki yie.

⁷ Näm bëët ge bëëdö ni ge kwöta yi naama dwøŋ, 'ba naama dwøŋ poot bëëdö ni ba päŋ. Pïï bëëdö ni ge døøa tiet näm, ni ge wø cäŋa kwönnö.

⁸ Jammi bëët mo wø tïïc duua öölö bäät jiy, ni beeye öölö mo opöödhö mo ba løny ki caan ki dhøk. Waŋ bëëdö ni ba jäŋ ki raŋ, ni ïth bëëdö ni ba päŋ ki luup mo wø wïnynye.

⁹ Japa tägö ya acääŋŋe cäŋ ka jootø ni tägö, ni japa tïïc ya acääŋŋe cäŋ ka tïïyö; bäŋ gïrpiny mo nyään tier cäŋ piny kany.

¹⁰ ?Aŋø, da gïrpiny mo løny man cään dhaanhe kipere, ni «Raŋï, man beeye gïn mo nyään»? Gïnögø kee oløny ni nut piny kany kanya poode ni ø poot kär cwääö.

¹¹ Wïc ba par ki jiy moa bëëdö ya acääŋŋe, ni këël beenhnhe moo ööi yi nyïm, jø wø caath køørge wïthge ba parge ki geni.

Leec Wïc Mar Dhaanhø Bäŋ Tiere

¹² A na Dïpööy, aana bëëdö na nyeya yi Jerucalem bäät jø Icriel.

¹³ Aani, jammi moi bëët ni wø tïïc tier maal piny kany en, aana cädö kiperge ni raŋa ge døøc, ni kwaana ge ki køør leec wïc. 'Ba beeye tëër mo peek døc na kïth Jwøki bäät jiy nee jwørge!

¹⁴ 'Ba na raŋa jammi bëët moi ni wø tïïc tier cäŋ piny kany en, ka adïëri møn, gena tïmö bëët ni bäŋ tietge, ni caala man many jamø nee mak.

¹⁵ Gïn mo omeenø ba døø kare; ni gïn mo bäŋgø ba løny ki kwaan.

¹⁶ Aani, aana cädö ki cwïnya, ni kööa, ni «Ka adïëri møn, ŋeth mara adøøŋŋø ni cääth maal ki leec wïc mo kaala leec wïc mar jiy bëët moa kwøŋ Jerucalem käärö naa poodi; aani, jammi mo thööth mo leec wïc ki kwänynyö ajooda.»

¹⁷ Køøre aana cädö nee tier leec wïc kwanya, këël bøøl, ki bäŋ acaara thuwø, 'ba moøgø thuwø, acäŋa jootø ni caala man many jamø nee mak.

¹⁸ Kiper leec wïc mo dwøŋ duua pänh cwïny mo dwøŋ; ni ki man meet kwänynyö, meeta cooyø.