Luk 3 - Wëël Jwøk

Luum Løk Cwïny Mana Køp Jøønni

¹ 'Ba kanya tïm cwiic Taybiria Cidhar na apaar kurbïïc yi kwär, na bëët Pøntia Paylat na kwäärö Judia, ni Galili bëënna Eerat, ni ö mïëya cwøl na Ituria ki Tarakønita na bëën owänni ma Pilip, ni ö paana cwøl na Abilin na bëën Lithania,

² ni beeye kanya bëët Anna ki Keepa na Kwääc Laam, dwør Jwøk aö baŋ Jøøn wär Dhekaraya ŋää paac.

³ Ni ö eni ni caath bäät Naam Jördan bäre, ni køpa luum lwøk jiy na nyuudhi na en ri løk cwïny kiper raac jiy nee wec Jwøki.

⁴ Keda mana näk ogöörö yi wëël luup nyikuŋ Jwøk ma Aydheea, ni «Da dwør dhaanhø mo cwödö ŋää paac, ni ‹Jiiŋŋu jöör Wuuö Jwøk, ni tïïyu uutjïëthe moe ni thïïŋ.

⁵ 'Ba aguule bëët othør, ni ö kïte ki thuuri bëët ni dwøgi piny. 'Ba kwöro näk mo oköömmö, otiir, ni ö uutjïëthe mo ogwalli ni tïïi ni pøøth,

⁶ 'ba jiy bëët pïëm mar Jwøk oneenge.› »

⁷ Kiper manøgønø, Jøøn wø köö jï lwaae mo wø ö wøk baŋe nee lwøe na nyuudhi, ni «?U na nyïï thwöre en, aŋa na kööm uuni ni bwøgu ki wëër mano ööi?

⁸ 'Ba bëëdu ki bëëtö man wø rømi ki løk cwïny, ni ba tägu ki man cäänu ki cwïnynyu, nou köö, ni ‹Eeberam beeye na kwarwa.› Kiper a cäänna uuni, ni Jwøk jïre da teek ki man jïte ki jiy jï Eeberam røk kïte moi ii.

⁹ 'Ba këël kawaane ennø, ley onø cïp tiet jenni. Kiper manøgønø, jenni bëët mo wø ba nywøl ki nyïëdi mo beyø, ŋøda piny ni leeŋi maac.»

¹⁰ 'Ba eni wø pëëny lwaae pëënynyö, na «?Agïnaŋø noo tïïcwa nø?»

¹¹ Ni løk gø jïge, «Ŋato jïre da abïïe ariiø, wär pääŋŋe ki ŋato jïre bäŋgø. Ni ö ŋato jïre da cam, ni mooc ŋato näk jïre bäŋgø thuwø na enønø.»

¹² 'Ba jø ajwäk aö baŋe thuwø nee ge lwøk na nyuudhi, ni köge jïgø, ni «?Dïpööy, agïnaŋø noo tïïcwa?»

¹³ Ni kööe jïge, ni «Kär jap ajwäk meetu ni kaala moa caan jïïu.»

¹⁴ Ni ö jø tøŋŋi thuwø ni pëënyge eni, ni köge, «?A waani nø, agïnaŋø noo tïïcwa?» Ni kööe jïge, ni «Kär dee jap ŋat mo lwørru ki teek jaak, ni ba kïthu bäät dhaanhø ki luubö mo patha adïëri. 'Ba rømu ki japu mo wø magu.»

¹⁵ 'Ba kanya bëët jiyi ni lääŋŋa gïno tägi, ni ge cara gïr Jøøn ki cwïnyge, ni kanymør beeye eni na Krictø,

¹⁶ Jøøn mare acaane jïge bëët, ni kööe, ni «Aani, dëëtu lwøa ka pïï na nyuudhi, 'ba da ŋat mo dwøŋŋa eni ki aani mo öö, mo thøøth waye ba doo mïërö jïra ki man päda ge wøk. Eni uuno lwøe na nyuudhi ki Jwïëc Jwøk na en kur keere ki maac.

¹⁷ 'Ba kwödi mare ena cere, ni jwieya kar kwönne, nee beel kïth yo odiie. 'Ba lethø owaaŋe ki maac mo ba maar jwöc.»

¹⁸ Ni ö eni ni køp luumma nyään na met jï jiy ni köömma geni ki luup møøk mo thööth.

¹⁹ 'Ba Eerat na bëën paaci, kany wø jälli ya Jøønni kiper Eerödia na näk cï owänni, ki raay bëët moa tïïc Eerati,

²⁰ raay moøgø bëët acäŋ meetø ki mana mak Jøøn ni kïth gø øt twöc.

Kanya Lwøk Jecu Na Nyuudhi

²¹ 'Ba kanya lwøk jiy na nyuudhi, Jecu alwøk thuwø; 'ba na ö Jecu na läme, maal ree ajabe,

²² ni ö Jwïëc Jwøki na en kur keere ni ö bääte ki maal ki dëël mo caala dëër akuuru, ni put dwølli ö ki maal, mo köö, ni «Ïïna Wääda na mëëra ki gø, na met yia ki marï.»

Luum Kwäre Mo Jecu Krictø

²³ 'Ba kanya täk Jecu ki tïïc mare, cwiiye jïtö ki pïëradäk, ni bëëdö ni keda o Jocep, ki køør acaara mar jø møøk. 'Ba Jocep ena wär Eeli,

²⁴ Eeli o Mathat, Mathat o Libay, Libay o Melki, Melki o Janay, Janay o Jocep,

²⁵ Jocep o Matathia, Matathia wär Eema, Eema o Neeyam, Neeyam wär Eecli, Eecli o Nagay,

²⁶ Nagay o Maath, Maath o Matathia, Matathia o Cemien, Cemien o Jöcek, Jöcek o Juuda,

²⁷ Juuda o Jöwaanan, Jöwaanan o Reeca, Reeca o Dherubabel, Dherubabel o Cieltiel, Cieltiel o Neeri,

²⁸ Neeri o Melki, Melki wär Adi, Adi o Cöcam, Cöcam wär Elmadam, Elmadam wär Er,

²⁹ Er o Jecu, Jecu wär Eliedhar, Eliedhar o Jörim, Jörim o Mathat, Mathat o Libay,

³⁰ Libay o Cimien, Cimien o Juudac, Juudac o Jocep, Jocep o Jönam, Jönam wär Eliekim,

³¹ Eliekim o Meleea, Meleea o Menna, Menna o Matatha, Matatha o Neethan, Neethan o Deebit,

³² Deebit o Jeci, Jeci wär Obet, Obet o Böweeth, Böweeth o Calman, Calman o Nacøn,

³³ Nacøn wär Aminadap, Aminadap wär Admin, Admin o Ram, Ram wär Eedharan, Eedharan o Peereth, Peereth o Juuda,

³⁴ Juuda o Jeekap, Jeekap wär Aydhak, Aydhak wär Eeberam, Eeberam o Teera, Teera o Neeyör,

³⁵ Neeyör o Ceeruk, Ceeruk o Reew, Reew o Pelek, Pelek wär Eber, Eber o Ceela,

³⁶ Ceela o Keenan, Keenan wär Arpakat, Arpakat o Cem, Cem o Nöa, Nöa o Lamek,

³⁷ Lamek o Mathucala, Mathucala wär Inøk, Inøk o Jaret, Jaret o Maalalel, Maalalel o Keenan,

³⁸ Keenan wär Inø, Inø o Ceth, Ceth wär Adam, Adam o Jwøk.