Luk 24 - Wëël Jwøk

Kanya Tïŋ Jecu Maal Ki Yi Thøø

¹ 'Ba na tïme na täk tïïc ka amöölla cøøn, mään aci bäät bwörö, ni ge käära mäth wïïr mo wø ŋwääi ni met na jiiŋge.

² Ni jootge kïdi no oŋiel wøk ki dhi bwörö.

³ 'Ba na cige yie, dëër Kwäärö ma Jecu kärge joodø.

⁴ 'Ba kanya cuŋge ni yïthge othäŋŋö kiper gïnögø, jiy ariiø acuŋŋö buutge, mo dëëtge da abïïe mo ŋwaŋŋi.

⁵ Ni putge bwøk, ni kuulge wïthge piny yïth ŋøøm. 'Ba jøøgø aköö jïge, na «?Aŋø ni cayu ŋat mo kwøw dï jøøa no othøw en?

⁶ Eni tøør kany. Ena tïŋ maal. Caarru wïthu ki luumma caane jïïu kanya poode yi Galili,

⁷ ni ‹Wär Dhaanhø ocïp ceŋ jø raay, ni guri bäät jaadha no odëëdö, 'ba noo tïme na dää nïne eno ö maal.› »

⁸ Ni putge wïthge par ki luupe,

⁹ ni aacge bäät bwörö, ni køpge gïïögø bëët jï nyïïatwieli moa näk apaar kurciel, ki bääge møga bëët.

¹⁰ 'Ba jøøa køp gïïögø jï nyïïatwieli beeye Meeri Magdalin, ki Jöwaana, ki Meeri mii Jeemeth, ki mään møga moa cøø ki geni.

¹¹ 'Ba luupögø atïmö keda waac jaak ki jïge, ni kärge marge jïëö.

¹² 'Ba Piter aö maal ni reŋ bäät bwörö. 'Ba na gääŋe ni neena yi bwörö, abïïk koony ajoode no odööŋ keerge. Ni aa paac ni yie othäŋŋö kiper gïna tägö.

Luum Gïna Tägö Øtjöör Imeeya

¹³ 'Ba dïcäŋögø kiree, jiy ariiø dïge aay ni ge cøøa paac mør mo cwøl ni Imeeya, mo yaakicge ki Jerucalem jïtö ki kiïlömethërri apaar kurciel,

¹⁴ ni ge cara gïïa tägö yøø bëët.

¹⁵ 'Ba kanya pootge ni ge cäänö ni ge løøŋŋa dhøkge ki luummögø, Jecu ki dëëre anyänh buutge, ni cäädhe ki geni na aciel.

¹⁶ 'Ba nyeŋge omänö ki man ŋecge gø.

¹⁷ Ni kööe jïge, na «?A luupa ŋø cøøn ni caru yïthakiyu nou cäädhö en?» Ni cuŋge, ni nyeŋge okwätö.

¹⁸ Kanyøgø aløk dhaanhe acielli jïgø mo cwøl ni Kilöpa, ni «?Bee ï keerï na wëëllö yi Jerucalem na kuc gïïa tägö kaace yïth nïri ii?»

¹⁹ Ni dwøk gø jïge, na «?A gïïa ŋø cøøn?» Ni köge jïgø, ni «Gïr Jecu nyï Nadhareth, ŋat ma nyikuŋ Jwøk na pöö ki pwöc mo met, na tïïö ki tïïe mo døøŋŋø nyïm Jwøk ki nyïm jiy.

²⁰ Eni, ena mak kwääc laammi mowa ki jaae ni cïpge gø nee ŋøl yi thøø, ni nääge gø bäät jaadha no odëëdö.

²¹ 'Ba ewa ŋäädhö ni beeye eni na doo wïïl jø Icriel wøk. 'Ba ennø thuwø, anø tïmö na nïne adäk ki mana täk gïïögø.

²² 'Ba da mään møøk dïwa, mo yïthwa ege thääŋö. Kiper ka amöölla cøøn, geno møøl bäät bwörö,

²³ ni kärge dëër gø joodø, ni duuge, ni köge, ni da nyïïatwiet maal mo ege neenø, mo ocaan gø, ni ena kwøw.

²⁴ 'Ba jø møøk dïwa gena ci bäät bwörö, ni jootge gø keda mana caani ya määnni. 'Ba eni kärge joodø.»

²⁵ Kanyøgø Jecu aköö jïge, «U ni bäŋ wïdhi en, ni cwïnynyu teek ki man jïëyu moa car nyïïkuk Jwøki bëët!

²⁶ ?Aŋø, paa gïïögø na doo pïï dëër Krictø ki man jwør gïï mo leth, ni ci ya ajieme na enønø?»

²⁷ Ni par luup bëët jïge moa en yïth weet Jwøk na näk ocaanø kipere, ni tääe ka luup Modhe këël mo nyïïkuk Jwøk bëët.

²⁸ 'Ba na tïm karge ni cään ki paana cige yie, Jecu atïmö keda pöötha nyïm.

²⁹ 'Ba ena kwacge, ni köge, ni «Bëëdï ki waani, kiper piny anø tïmö na abøøya, ni cäŋ onø tïmö ni thiinh.» Kanyøgø ena cøø ni bëëde ki geni.

³⁰ 'Ba kanya en kar cam ki geni, ena lwötö ki møø, ni gwïëth gø, ni pøt gø, ni mëëk gø geni.

³¹ Ni ö nyeŋge ni putge rege jap, ni ŋecge gø. 'Ba kanyøgønø, ena put rwäänyö jïge.

³² Ni cäänge keerge, ni köge, na «?Aŋø, kärø joodø ki cwïnynyø møn ya adïëti kanya cään øøni øtjöö, na par luup weet Jwøk jïïø?»

³³ Ni putge ö maal yi caannøce kiree ni døøge yi Jerucalem, ni nwänge nyïïatwieli na näk apaar kurciel ni dëëtge ege cooŋø, ge ki jøøa en buutge.

³⁴ Ni köge, ni «Kwäärö aduu wøk ki yi thøø møn, ni nyuth dëëre Cayman.»

³⁵ Kanyøgø, gïïa tägö waŋjöö akøpge, ki mana ŋecge gø ki ri møø na pøte.

Kanya Ö Jecu Na Nyooth Ree Jï Bääge

³⁶ 'Ba kanya pootge ni ge cara gïïögø, Jecu ki dëëre acuŋŋö dïge, ni kööe jïge, ni «Bëët-mëër bëëde bäätu.»

³⁷ 'Ba gena bwøk ni lwäcge, ni ege caarø ni ge joota tïpö.

³⁸ Ni kööe jïge, na «?Aŋø ni ö wïthu ni kierge rege en? ?Na aŋø ni cäänu ki cwïnynyu en?

³⁹ Neennu ceŋŋa ki tieta. Beeye aani ki dëëra. Mullu aani, nee jootu, kiper tïpö bäŋ dëël ni bäŋ cuu teeŋ kaawat man en dëëra ni neennu en.»

⁴⁰ 'Ba na nø caan gïnögø ceŋŋe ki tiete anyuth geni.

⁴¹ Ni mïn yïthge døc, ni yïthge othäŋŋö. 'Ba yïthge poot teek. Kanyøgø ena köö jïge, «?Jïïu da gïn cam?»

⁴² Ni moocge gø ki thääŋ rëëö mo obulö.

⁴³ Ni lwør gø ni cam gø nyïmge.

⁴⁴ Kanyøgø ena köö jïge, ni «Moi beege luupa na caana jïïu kanya pooda naa bëëdö ka uuni, ni luup bëët moa näk ogöörö kipera ri ciik Modhe, ki mo nyïïkuk Jwøk, ki moa en yi Dut Pwøc thura karge.»

⁴⁵ Ni par wïthge nee luup moa en yïth weet Jwøk kwanyge.

⁴⁶ Ni kööe jïge, «Beeye mana näk ogöörö, ni ‹Krictø gïï mo leth ojwøre, 'ba noo tïme na dää nïne, eno ö maal ki yi thøø,

⁴⁷ ni ö løk cwïny ki wec raac jiy ni købi ki nyeŋŋe yïth mïëri bëët, ni tägi ka yi Jerucalem.›

⁴⁸ Ni bee uuni na neen gïïögø.

⁴⁹ 'Ba kawaane, a wëëga gïna buuk Wära uuni. 'Ba bëëdu paani, këël mano jïtu ki teek mano ööi ki maal.»

Kanya Døø Jecu Maal

⁵⁰ Kanyøgø gena käle këël mana pïïcge Bethani. Ni tïŋ ceŋŋe maal ni gwïëth geni.

⁵¹ 'Ba kanya bëëde ni gwïëtha geni, ena aay buutge ni kïthi maal.

⁵² Ni ö bääge ni døøge yi Jerucalem ni yïthge met døc.

⁵³ Ni putge bëëtö Øt Jwøk Mana Dwøŋ cooth, ni ge pwøya Jwøk.