Luk 12 - Wëël Jwøk

Luum Atade Mar Jø Paricith

¹ 'Ba kanyøgø jiy ma kume mo thööth døc rege acooŋge, ni tïmge ni ge nyøra tietge. 'Ba Jecu bääge acäänne, ni kööe, ni «Gwøgu rou ki thøm jø Paricith, na näk atade.

² Bäŋ gïrpiny mo ouumö mo ba cäŋ nyoothø, wala gïrpiny mo okanø, mo ba cäŋ jootø.

³ Gïn mo you caanø yi muudhö ocäŋ wïnynye yi tar. Ni gïn mo you mooŋø yi øtø kur keeru, ocäŋ køpø ki wïth uudi.

Pwöc Kiper Ŋata Doo Lwäärö

⁴ «Nyïïawääta, a cäänna uuni, ni käru nou lwäyö ki jø wø 'näk dëël, ni wø bäŋ gïn mo maarge tïïc køør gø këët.

⁵ 'Ba a nyutha uuni ŋata dou lwäärö. Lwäärru eni, ŋat wø nää, ni jïre da teek ki man cäŋ dhaanhø leeŋ yi maac kar ajäla. Adïëri møn, a cäänna uuni, lwäärru eni.

⁶ ?Aŋø, acøki abïïc bäŋ wø ŋeew ka thariipe ariiø? Ni bäŋ aciel dïge mo wï Jwøk wïl ki gø.

⁷ Këëlla jïëc wïthu okwaanø bëët. Käru lwäär. Uuni, letha peru ka acøki mo thööth.

Luum Ŋato Jïëc Krictø Ki Ŋato Mooŋ Gø

⁸ «'Ba a cäänna uuni, ni jøw bëët mo wø jïëc aani nyïm jiy, ojïëa thuwø, a na Wär Dhaanhø, nyïm nyïïatwiet maal mo Jwøk.

⁹ 'Ba ŋato wäro mooŋ aani nyïm jiy, omooŋ thuwø nyïm nyïïatwiet maal mo Jwøk.

¹⁰ 'Ba jiy bëët mo wø cäänö ki luubö mo raac dëër Wär Dhaanhø, owec. 'Ba ŋato wäro jany Jwïëc Jwøk na en kur keere, mare ba doo wiiø.

¹¹ 'Ba kanyo kïthge uuni baŋ løøk yïth uut acook lam ki nyïm kwääri ki nyïm jøøa näk ocuumö, kär dee gïn lääŋŋu kiper gïno løgu wala gïno caannu.

¹² Kiper Jwïëc Jwøk na en kur keere uuno pwönynye yi caannøca, ki gïno caannu.»

Pwöc Kiper Man Gwøk Røk Ki Päl Cwïny

¹³ 'Ba nyen mør dï lwaak aköö, ni «Dïpööy, kööm coka nee jap wääwa pääŋwa ki gø.»

¹⁴ 'Ba Jecu aköö jïgø, ni «?Nyie, aano tïïya ŋa na dïŋut luup wala dïpääy jïïu?»

¹⁵ Ni kööe jïge, «Caarru wïthu ni gwøgu rou ki bëët päl cwïny bäre. Kiper dhaanhø bäŋ wø kwøw kiper jammi na thööth jïre.»

¹⁶ Ni par luubö mør jïge kaamar leer, ni «Da wää pwödhe mør mo okwär mo pwöthe okännö ki beel mo thööth.

¹⁷ Ni pëëny dëëre keere, na ‹?Agïnaŋø noo tïïa? Kiper bäŋ kany kïtha beega yie.›

¹⁸ Ni kööe, ni ‹Gïno tïïa beeye en, odïïga orieda, ni cäŋa cwääc ki møøk mo døøŋŋø. Kanyøgønø, beega ki japa bëët okïtha yïthge.

¹⁹ Ni köömma raa, ni «Ïïni, jïrï da jammi mo thööth, mo okanø kiper cwiiri mo thööth. Jwöm riï nø, ni cämï ni mädhï, ni iï met.» ›

²⁰ 'Ba Jwøk aköö jïgø, ‹Ï ni bäŋ wïc en. Wääni en, jwïëyï olwør. ?A kanyøgønø, japa jiiŋŋï yøø otïmge na mo ŋa?›

²¹ 'Ba beeye enønø jï ŋat wø känö ki jammi kiper dëëre keere, ni patha okwär nyïm Jwøk.»

Pwöc Kiper Man Ba Lääŋ Jap Piny

²² Kanyøgø Jecu aköö jï bääge, «Kiper manøgønø, a cäänna uuni, ni kär dee gïn lääŋŋu kiper jwïëyu, ki gïïo cammu, ni ba lääŋŋu dëëtu, ka abïïe moo røøu dëëtu.

²³ Letha per jwïëy ki cam, ni letha per dëëlli ka abïïe.

²⁴ Caarru weny ni wø ba pïïdhö, ni ge ba kääö, ni wø jïge bäŋ uudi mo känge yïthge, wala odek. 'Ba Jwøk wø poot caama geni. ?Aŋø, ba letha peru døc ki weny?

²⁵ ?Na aŋa dïïu ni løny jïre ki man meet nïr kwøw moe ki mo thenh keerge kiper mano lääŋ gø?

²⁶ 'Ba nee ba maar lønyø jïïu ki man tïïyu gïn mo thiinh mo caala manøgø, ?aŋø ni lääŋŋu møga ii?

²⁷ Caarru pïth mar apiite, ni wø ba ööl dëëtge, ni ge ba cwääö ka abïïe kiper dëëtge. 'Ba a cäänna uuni, ni këël Cølöman ka ajieme bäre, mïërö mar abïïe moe ba caal mïëy aciel dï gïïögø.

²⁸ ?'Ba ni näk Jwøk luum ni wø marr yi pwödhö dïcäŋi ni leeŋi maac diøø ee døøc mo mïërö, a uuni, u ba dee gø gwøø nidïï, u ni ŋäädhe maru thiinh en?

²⁹ Käru bëëdö ni cwïnynyu ena køør gïï wø cammu, ki gïï wø maathu, ni ba bëëdu nou lääŋŋa ge ki cwïnynyu.

³⁰ Kiper juurre mo bäät piny bëët ge caya gïïögø. 'Ba ŋäc Wääu ni en maal nou can ki ge.

³¹ 'Ba beerra man manynyu bura mare. Køøre nø, gïïögø bëët owëëk uuni thuwø.

Luum Kwärö Mar Maal

³² «Käru lwäär, u na pïïth mo thiinh en. Kiper Wääu yie met ki man wëëk bura uuni.

³³ Dwøgu japu pwödhö ni cïpu jammi moøgø jï jøøa can. Ni mooyu dëëtu ko opïri mo ba jøøl, ni beege jammi mo okanø maal, ni wø nut karge cooth, kany wø bäŋ kuu mo ci baŋge, ni bäŋe alweela mo räänyö.

³⁴ Kiper kanyo kanu japu yie, cwïnynyu oen kanyøca thuwø.

Luum Laaŋe Mo Ge Koora Ööny Kwääyge

³⁵ «Bëëdu na abïïgu you kïth dëëtu, ni lambae mou liel,

³⁶ nou caala jiy mo koora kwääyge mo duuö ki kar nywöm, kiper nee øtø laarge jap jïgø, kanyo ööe noo dööŋe.

³⁷ 'Ba laaŋe mo wø nwän kwäärö marge ni ge nëënö kany wø ööe, gwïëth oen bäätge. Adïëri møn a caana gø jïïu, dëëre okïthe ka abïï tïïc, ni wëëk ge pïïn kar cam ni tïny geni.

³⁸ 'Ba ni näk mo ööa ri riet jø koor, wala dääge, ni nwän geni na enønø, laagøgø gwïëth oen bäätge.

³⁹ 'Ba ŋäyu gïn, no onää wää øtø caa mano ö kuuwi yie ee ŋääö, eni øde ba dee wëëk toor.

⁴⁰ 'Ba uuni thuwø bëëdu ni rou you jiiŋŋø. Kiper Wär Dhaanhø öö ri caa mo käru dïëdö.»

Luum Laŋŋø Mana Beer Ki Mana Raac

⁴¹ 'Ba Piter aköö jï Jecu, «?Kwäärö, luummögø ni keda leer enø, ï cäänna wa keerwa, wala jï jiy bëët?»

⁴² Ni kö Kwäärö, na «?A laŋŋø mane nø, ni wïïe leer mo maar ka ŋääth, ŋat mo doo cuum kwääye bäät laaŋe bëët paare, nee caapge wø pääŋŋe jïge kany wø näk ma kare?

⁴³ 'Ba laŋŋø mano nwän kwääye ni tïïö na enøgønø kanyo ööe, gwïëth oen jïre.

⁴⁴ Adïëri møn, a cäänna uuni, ni jape bëët owii cer ŋatøgø.

⁴⁵ 'Ba ni näk laŋŋøgø köö ki cwïnye, ni ‹Kwääya aruu ki man ööe,› ni täge ki man pwöt laaŋe møga moa näk cwøw ki mään, ni tïme ni cämö, ni mädhö, ni meeyø,

⁴⁶ kwääy laŋŋøgø oööi ki waŋcäŋ mo käre dïëdö, ki yi caa mo kuue, ni pwöt gø ki pöödö mo teek døc, ni kïth gø røk jøøa ba maar ŋääth.

⁴⁷ 'Ba laŋŋo ŋäc mana many kwääye, ni käre ree jiiŋŋø, ni käre moa many kwääye tïïö, opwöt ki pöödö mo dwøŋ.

⁴⁸ 'Ba ŋata kuc mana dee tïïö, ni tïïc gïï mo rømi ka pöödö, opwöt ki pöödö mo thiinh. 'Ba jiy bëët moo näk omooø ki mo thööth, mo thööth opëënynyi baŋge. Ni ŋato wäro wëëk jammi mo thööth, mo thööth omanynyi baŋe.

Luum Apääk Man Wø Tägi Ki Køør Luum Jwøk

⁴⁹ «Aani, a ööi naa lëëŋa maac bäät piny, ni doo beer onää onø nyep.

⁵⁰ Aani da gïn mo leth mo jwøra jwørø, ni cwïnya lääŋŋa gø døc, këël mano thur kare.

⁵¹ ?Aŋø, you caarø naa ööi naa käla bëët-mëër bäät piny? Jïre bäär. 'Ba a cäänna uuni, naa käla apääk.

⁵² Kiper køør man nø, øtø aciel ojïti ki jiy abïïc mo rege ege pääŋŋö. Na adäk oen kur keerge, ni ö ariiwi ni enge kur keerge.

⁵³ Geni, røkge opääŋge, ni wuuö opääy ki wäädö, ni ö wäädö ni pääe ki wänni, ni ö mïïe ni pääe ki nyaare, ni ö nyeyi ni pääe ki menni, ni ö waŋe ni pääe ki cï nyaare, ni ö cï nyeyi ni pääe ki waŋø.»

Pwöc Kiper Man Ŋec Tiet Nïne Moi

⁵⁴ 'Ba kanyøgø thuwø, Jecu aköö jï lwaak, ni «Kany wø neennu pöölö ni cwää ki jï løø pänh-cäŋ, u wø laara köö, ni ‹Køth pädhö.› Ni beeye kare.

⁵⁵ Ni kany wø jootu jamø ni kwönni ki jï løø tier-piny, u wø köö, ni ‹Cäŋ rieny ni kwaar døc.› Ni beeye kare.

⁵⁶ U na jø atade! Bëët pinyi en, ki bëët maal wø laaru ka ŋec. ?'Ba aŋø nø ni ba ŋäyu man ŋeyu tiet nïri ii?

Pwöc Kiper Døøn Kanya Ciel Ki Dhaanhø

⁵⁷ «?Aŋø nø, ni ba ŋøllu mano beer ki dëëtu keeru?

⁵⁸ 'Ba ni näk miï aay ki ŋat mo manynya løøk ki ïïni, nou cøøa nyïm kwäärö, beerra man thöörï luubö ki eni kanyo poodu waŋjöö, kiper nee ï ba peee nyïm dïŋut luup, ni ö dïŋut luupi ni cïp ïïni cer kwääy øt twöci, ni ö kwääy øt twöci ni leeŋ ïïni øt twöc.

⁵⁹ Aani, a cäänna ïïni, niï bäŋ doo ööa wøk na bäre bäre këël mano coolï mïlïïn mana näk odööŋ.»