Kwään Jiy 4 - Wëël Jwøk

Thääŋ Tïïc Mar Jø Tuuŋ Libay Mana Cïp Jï Nyïïkwaac Kät

¹ Køøre Wuuö Jwøk acäänö ki Modhe ka Aran, ni kööe,

² ni «Yïthakic jø tuuŋ Libay, kwaan nyïïkwaac Kät ki køør tuŋi moge ki køør dhøk uudi moge.

³ Kwaan cwøw bëët moa näk cwiicge pïëradäk këël pïërabïïc, jøw mo løny jïge ki man cige nee tïï oduŋkaany røømmø tïïcge.

⁴ «Tïïc mano tïïc nyïïkwaac Kät yo oduŋkaany røømmø beeye gwøk japa en kur keerge na perge leth.

⁵ Kany wø tïme na ri tïŋŋö, Aran ki wääte doo dønynya yo oduŋkaara, ni pätge abïï man wø gëëŋ kanya en kur keere na pere leth ki gø, ni kälge gø piny, ni rïëpge gø bäät acanduk man wø nyooth luumma tuut Jwøki ki jiy.

⁶ Ni rïëpge bäät gø ki rëëbi mar pëët lääy mo onyøŋø, ni peerge abïï bäät gø mo kïte caala kït abïcøle, ni rwaakge jer tëër ïth gøøni.

⁷ «Køøre abïï mo kïte caala kït abïcøle opeerge bäät tharabëëta mar muunni moa näk nyuuthe, ni kïthge cäänne ka apät ki kuure bääte, ko ogubääc jëëthe mo kwøŋ; ni muunni mo en bääte cooth bëëdö karge.

⁸ Ni rïëpge bäätge ka abïï mo kwaar, ni rïëpge bäät abïïnögø ki rëëbi mar pëët lääy mo onyøŋø, ni rwaakge jer tëër ïth gøøni.

⁹ «Køøre abïï mo kïte caala kït abïcøle olwørge ni uumge gïn wø bëët lambae bääte, ki lambae, ki gïï wø 'näk maa lambae ki ge, ki cäänne, ki dääk mädhi moe bëët, na näk gïï wø tïïge ki geni;

¹⁰ ni kïthge gïn wø bëët lambae bääte ki jape bëët yo opïr pïën, ni cïpge gø bäät gïr käädö.

¹¹ «Køøre gïn wø waaŋ gïn wø jïye ŋwääi ni met bääte na näk tïïc ka warkey, ouumge ka abïï mo kïte caala kït abïcøle, ni uumge gø ki rëëbi mar pëët lääy mo onyøŋø, ni rwaakge jer tëër ïth gøøni.

¹² «Ni lwørge jap tïïc bëët mo wø tïïö ki geni yi kar lam na en kur keere ni bäcge geni ka abïï mo kïte caala kït abïcøle, ni uumge gø ki rëëbi mar pëët lääy mo onyøŋø, ni cïpge gø bäät gïr käädö.

¹³ «Køøre bur ojøøpge wøk bäät gïn wø cïp olämme bääte, ni rïëpge gø ka abïï ma dïmuur;

¹⁴ ni cïpge jap tïïc moe bëët bäät gø, ni beeye athääk jwëëlli mo wø käär mäc ki ge, ki gïï wø lääm rïŋ wøk ki ge, ka akaape, ki cäänne, ni beege jap tïïc bëët mo gïn wø cïp olämme bääte; ni rïëpge gø ki rëëbi mar pëët lääy mo onyøŋø, ni rwaakge jer tëër ïth gøøni.

¹⁵ «'Ba kanyo ö Aranni ki wääte noo lønyge ki twöc japa en kur keerge mo kar lam na en kur keere, noo tïme na kany wäro tïŋ wääth, wäät Kät doo öö kiper tëër. 'Ba japa en kur keerge ba dege gudö, nee ge ba thøwge. Gïïögø beege gïï käär nyïïkwaac Käti røk japa en yo oduŋkaany røømmø.

¹⁶ «'Ba tïïc mar maar lamba, ki tïï gïn wø jïye ŋwääi ni met, ki tïï muuce mo beel mo wø cïp cooth, ki tïï maar rööny ni wø judö ki gø, otïmö ni ena cer Eliedhar wär Aran na näk Kwääy Lam Mana Dwøŋ. Beeye eni noo gwøk oduŋkaara mana näk kar bëëtö mar Wuuö Jwøk ki japo en yie bëët, ni beeye kar lam mana en kur keere.»

¹⁷ Ni kö Wuuö Jwøki jï Modhe ka Aran,

¹⁸ ni «Kär nou wëëga nyïïkwaac Kät ränynyö dï jø tuuŋ Libay.

¹⁹ 'Ba gïna dou tïïö kiperge nee ge bëëtge ni kwøw, nee bäŋe thøø mo pïï dëëtge kany wäro nyänhge buut japo en kur keerge beeye en; Aran ki wääte geno døny yo oduŋkaara ni nyoothge tïïc jï ŋati man nø ki gïno kääre.

²⁰ 'Ba kär näk wäät Kät dønynya yie ki man neenge japa en kur keerge, këël ki nyi kany mo thiinh, nee ge ba thøwge.»

Thääŋ Tïïc Mar Jø Tuuŋ Libay Mana Cïp Jï Nyïïkwaac Gërcön

²¹ Køøre Wuuö Jwøk acäŋ cäänö ki Modhe, ni kööe,

²² ni «Kwaan nyïïkwaac Gërcön thuwø ki køør tuŋi moge ki køør dhøk uudi moge.

²³ Kwaan cwøw bëët moa näk cwiicge pïëradäk këël pïërabïïc, jøw mo løny jïge ki man cige nee tïï oduŋkaany røømmø tïïcge.

²⁴ «Nyïïkwaac Gërcön tïïc marge ki gïïo käärge beege

²⁵ rëëbi mana en bäät kar bëëtö mar Wuuö Jwøk, ki rëëbi mar oduŋkaara, ki rëëbi mana en bääte, ki rëëbi mar pëët lääy mo onyøŋø na en bäät moøgø, ka abïï man wø gëëŋ dho oduŋkaara ki gø.

²⁶ Ni käärge abïïe mo kal na en lak oduŋkaara ki gïn wø cïp olämme bääte, ka abïï man wø gëëŋ dhi karøgø, ki thøøli mo wø mäk piny ki ge bëët, këël jammi bëët mo wø manynyi kiper tïïc mar gïïögø; ni gïï wø manynyi bëët kiper tïïc japøgø dege tïïö.

²⁷ Tïïc bäre mar nyïïkwaac Gërcön, këël luup gïï wø käärge, ki tïïe moge bëët wär tïme ni caana Aran ki wääte jïge; ni nyuunhnhu ŋati man nø ki tëëre na dee käärö, ni wiiu gø cere.

²⁸ Manøgø beeye tïïc mar dhøk uudi mo nyïïkwaac Gërcön yo oduŋkaany røømmø; ni ö tïïci marge ni en cer Itamer wär Aran, ni beeye Aran na näk Kwääy Lam Mana Dwøŋ.

Thääŋ Tïïc Mar Jø Tuuŋ Libay Mana Cïp Jï Nyïïkwaac Mërari

²⁹ «Kwaan nyïïkwaac Mërari thuwø ki køør tuŋi moge ki køør dhøk uudi moge.

³⁰ Kwaan cwøw bëët moa näk cwiicge pïëradäk këël pïërabïïc, jøw mo løny jïge ki man cige nee tïï oduŋkaany røømmø tïïcge.

³¹ Ni tïïc mano cïp ceŋge yo oduŋkaany røømmø beeye käär opämi mo oduŋkaara na näk kar bëëtö mar Wuuö Jwøk, ki cööthe, ki gïï wø cwöth tietge yïthge, ki läämme,

³² ki jer kal, ki gïï wø cwöth tietge yïthge, ki dïnööy, ki thøøli, ki jap wø tïïö ki ge bëët. Këël jammi bëët mo wø manynyi kiper tïïc mar gïïögø poot ena ceŋge thuwø. Ni cïpu jammi mo wø käär ŋati man nø ni you kwaanø ki køør nyeŋŋe.

³³ Manøgø beeye tïïc mar dhøk uudi mo nyïïkwaac Mërari yo oduŋkaany røømmø, ni ö tïïci marge ni en cer Itamer wär Aran na näk Kwääy Lam Mana Dwøŋ.»

Kanya Kwaan Jø Tuuŋ Libay

³⁴ Køøre Modhe ka Aran ki dïbwöthe mo lwaae nyïïkwaac Kät akwaange ki køør tuŋi moge ki køør dhøk uudi moge,

³⁵ ni beege cwøw bëët moa näk cwiicge pïëradäk këël pïërabïïc, jøw moa cøø nee tïï oduŋkaany røømmø tïïcge;

³⁶ ni kwään jøøgø ki køør dhøk uudi moge beege jiy ma kume ariiø ki dïpe abïriiø ki pïërabïïc.

³⁷ Moøgø beege kwään cwøw bëët mo nyïïkwaac Kät moa tïïö yo oduŋkaany røømmø, na kwaan Modhe ka Aran ki køør mana caan Wuuö Jwøki ki dhi Modhe.

³⁸ Køøre nyïïkwaac Gërcön akwaan ki køør tuŋi moge ki køør dhøk uudi moge,

³⁹ ni beege cwøw bëët moa näk cwiicge pïëradäk këël pïërabïïc, jøw moa cøø nee tïï oduŋkaany røømmø tïïcge;

⁴⁰ ni kwään jøøgø ki køør tuŋi moge ki køør dhøk uudi moge beege jiy ma kume ariiø ki dïpe abïciel ki pïëradäk.

⁴¹ Moøgø beege kwään cwøw bëët mo nyïïkwaac Gërcön moa tïïö yo oduŋkaany røømmø, moa kwaan Modhe ka Aran ki køør mana caan Wuuö Jwøki.

⁴² Køøre nyïïkwaac Mërari akwaan ki køør tuŋi moge ki køør dhøk uudi moge,

⁴³ ni beege cwøw bëët moa näk cwiicge pïëradäk këël pïërabïïc, jøw moa cøø nee tïï oduŋkaany røømmø tïïcge;

⁴⁴ ni kwään jøøgø ki køør tuŋi moge ki køør dhøk uudi moge beege jiy ma kume adäk ki dïpe ariiø.

⁴⁵ Moøgø beege kwään cwøw bëët mo nyïïkwaac Mërari, moa kwaan Modhe ka Aran ki køør mana caan Wuuö Jwøki ki dhi Modhe.

⁴⁶ Moi beege kwään jø tuuŋ Libay, moa kwaan Modhe ka Aran ki dïbwöthe mo jø Icriel, ki køør tuŋi moge ki køør dhøk uudi moge.

⁴⁷ Cwøw bëët moa näk cwiicge pïëradäk këël pïërabïïc moa cøø kiper tïï tëër ki tïïe møøk yo oduŋkaany røømmø,

⁴⁸ kwäänge beege jiy ma kume abära ki dïpe abïïc ki pïërabära.

⁴⁹ 'Ba ŋati man nø anyuunhnhi ki tïïc mana dee tïïö ki tëër mana dee käärö ki køør mana caan Wuuö Jwøki ki dhi Modhe. Jøøgø bëët akwaan Modhe, kaawat mana ö Wuuö Jwøki na kööm eni.