Kwään Jiy 36 - Wëël Jwøk

Luum Nywöm Kiper Mään Mo Owëënnö Ki Ŋøøm

¹ 'Ba kar kanyøgø, wïth dhøk uudi mo nyïïkwaac Gelät o Makir, ni beeye o Maneeca, jøøa käl ri dhøk uudi mo nyïïkwaac Jocep, aöö ni cäänge nyïm Modhe ki nyïm dïbwöthe bëët moa näk wïth dhøk uudi mo Icriel,

² ni köge, ni «Kanya ö Wuuö Jwøki na kööm ïïni, ï na kwääcwa en, nee ŋøøm pääŋŋï jï jø Icriel ki køør ŋïïce mo wø tïïc ki ri kwääk ki baw, nee dööŋe na moge, ïïna köömme thuwø nee kur owääwa ma Dhilöpat nee mëëgi nyïïe.

³ Ennø, ni näk geno nywøm jiyi mo ena yi tuuŋ mør ri jø Icriel, ŋöömö mana mëëk geni na kurge okäl wøk ki ri mo wëëkwa, ni dwali ri mo tuuŋ cwøwge moa nywøm geni. Køøre thääŋ ŋöömö mana mëëk waani na marwa di kälö.

⁴ Køøre kanyo ö cwiin wø cwøl ni Jubili ni wø gwøk jø Icrielli, ni beeye cwiin wø dwøk ŋøøm baŋ wëëkge, ŋöömö marge dwala bäät mo tuŋi mo cwøw moa nywømge. Ni ö ŋöömö marge ni käli wøk ri mana dööŋ jï tuuŋ kwäcwa.»

⁵ Køøre Modhe jø Icriel aköömme ki køør mana caan Wuuö Jwøki, ni kööe, ni «Gïna caan nyïïkwaac Jocepi beeye kare.

⁶ Man beeye mana caan Wuuö Jwøki kiper nyïï Dhilöpat. Ena köö, ni ‹Løny jï ŋati man nø ki man nywømi ŋata manynye jaak; 'ba wär näk ge nywømma dhi øt tuuŋ wääge keere.

⁷ 'Ba ki røk ŋøøpo dööŋ jï jø Icriel, doo bäŋ ŋøøm mo lwør baŋ tuuŋ mør ni mëëgi tuuŋ maya, kiper ŋat Icriel man nø ŋöömö mar tuuŋ wëëkge dee gwøø.

⁸ Dhaagø jaak mo owëënnö ki ŋøøm yïth tuŋi mo Icriel doo nywøm dïcwøø mo käla ri tuuŋ wänni, nee ŋat Icriel man nø nee ŋöömö mana wec tuuŋ wänni nee bëëde na mare.

⁹ Bäŋ ŋöömö mo doo lwørø baŋ tuuŋ mør ni mëëgi tuuŋ maya, kiper tuuŋ man nø ri jø Icriel ŋöömö mana wec jïre dee gwøø.› »

¹⁰ Køøre nyïï Dhilöpat gïnögø aputge tïïc, kaawat mana ö Wuuö Jwøki na kööm Modhe.

¹¹ Ni ö nyïï Dhilöpat, ni beege Maala, ki Tirja, ko Okila, ki Milka, ki Nöa, ni putge jïtö ki cwøw røk uut wëëkge,

¹² ni ge nyöömma dhøk uudi moa käl røk nyïïkwaac Maneeca na näk o Jocep, ni ö ŋöömö mana wec jïge na marge ni put dööŋŋö na mar dhi øt tuuŋ wääge.

¹³ 'Ba moøgø bëët beege ciik moa cïp Wuuö Jwøki jï jø Icriel ki ri Modhe, kanya enge pwöl Möap na en deŋ Naam Jördan na dïët ki Jerikö.