Kwään Jiy 34 - Wëël Jwøk

Luum Nyeŋ Keee Mo Ŋöömmo Ci Jï Jø Icriel

¹ Køøre Wuuö Jwøk jø Icriel aköömme ki køør dwøl mana caane jï Modhe, ni kööe,

² ni «Kanyo dønynyu yi ŋööm Keenan, ni beeye ŋöömö mano dööŋ jïïu na maru, nyeŋ keee mo ŋöömmögø beege ii.

³ «Aŋuun ŋøøm mou moa en jï løø tier-piny otägi ki dï paap Dhïn na näk kïïö ka ŋööm Ëdöm. 'Ba dëër waŋkeew maru kiree tägi ka aŋuun Naam Acäbö løøa en bäät caam jï løø kur tuul-cäŋ,

⁴ ni cør thuur Akirabim, ni pöödhe ni coonya paap Dhïn, ni pääny Kadëc-Bernia ee wii bäät cwiic. Køøre ocäŋ aay ni pöödhe ki buut Adhar-Adar ni coonya Acimön.

⁵ Køøre odøø bäät cwïïc mëëth, ni päth yi waŋ Ijep, ni ŋuude yi naama dwøŋ.

⁶ «'Ba waŋkeew maru ki jï løø kur pänh-cäŋ otïmö na naama dwøŋ ki deŋŋe bäre. Manøgø otïmö na waŋkeew maru ki jï løø kur pänh-cäŋ.

⁷ «'Ba waŋkeew maru ki jï løø wï-piny wär kiiwu ni tägi ka naama dwøŋ këël Kïn Öör;

⁸ ni cäŋ tägö ki Kïn Öör këël mano pïïe jöör wø ci Amath. Køøre waŋkeew oaay këël Cidat,

⁹ ni cør nyïm Dhiparön, ni ŋuude Adhar-Enan. Manøgø otïmö na waŋkeew maru ki jï løø wï-piny.

¹⁰ «'Ba waŋkeew maru mana en jï løø kur tuul-cäŋ wär kiiwu ni tägi ka Adhar-Enan këël Cepama.

¹¹ Ni ö waŋkeewi ni cäŋ aay ki Cepama ni coonya Ribala, na Ayn ee wii bäät cwiic, ni put pöödhö ki bäät thuuri mo wø en jï løø kur tuul-cäŋ ki naam Kinërët.

¹² Køøre waŋkeew ocäŋ aay ni lwøra Naam Jördan cooth, këël mano päth Naam Acäbö. 'Ba ŋöömö manøgø bäre otïmö na maru ki køør nyeŋ keee moe bëët.»

¹³ Køøre Modhe jø Icriel aköömme, ni kööe, ni «Manøgø beeye ŋöömö mano pääŋŋu yïthakiyu ki køør ŋïïce mo wø tïïc ki ri kwääk ki baw, ni beeye ŋöömma näk onø caan Wuuö Jwøki nee pääŋŋi jï tuŋi abïŋween ki thääŋ tuuŋ Maneeca;

¹⁴ kiper nyïïkwaac tuuŋ Ruben ki tuuŋ Gaat ki thääŋ tuuŋ Maneeca onø jïtö ki ŋøøm ki køør dhøk uudi mo kwäcge.

¹⁵ Tuŋi moøgø na ariiø yøø ki thääŋ tuuŋ Maneeca onø jïtö ki ŋøøm løø Naam Jördan jï løø kur tuul-cäŋ, na dïët ki Jerikö.»

Nyeŋ Jiy Moo Pääŋ Ŋøøm

¹⁶ Køøre Wuuö Jwøk acäänö ki Modhe, ni kööe,

¹⁷ ni «Nyeŋ jiy moo pääŋ ŋøøm jï jø Icriel, nee tïme na moge, beege Eliedhar na näk Kwääy Lam Mana Dwøŋ, ki Jøcua o Nun.

¹⁸ 'Ba ï na Modhe, ï doo lwötö ki dïbwödhi aciel ri tuuŋ man nø, nee kunynye ki pääŋ ŋøøm moo pääŋŋi jï jø Icriel nee tïme na moge.

¹⁹ 'Ba nyeŋ jøøgø beege ii: «Ki røk jø tuuŋ Juuda beeye Kalëp o Jöpöni.

²⁰ «Ki røk jø tuuŋ nyïïkwaac Cimien beeye Cemuel wär Ammiyut.

²¹ «Ki røk jø tuuŋ Benjamen beeye Elidat o Kicilön.

²² «Ki røk jø tuuŋ nyïïkwaac Daan, dïbwödhi beeye Buki o Jögili.

²³ «Ki røk jø tuuŋ nyïïkwaac Maneeca o Jocep, dïbwödhi beeye Aniel o Ëëput.

²⁴ «Ki røk jø tuuŋ nyïïkwaac Ipariem o Jocep, dïbwödhi beeye Këmuël o Cipitan.

²⁵ «Ki røk jø tuuŋ nyïïkwaac Dhebulan, dïbwödhi beeye Elicapan o Peranak.

²⁶ «Ki røk jø tuuŋ nyïïkwaac Icakar, dïbwödhi beeye Paltiel wär Adhan.

²⁷ «Ki røk jø tuuŋ nyïïkwaac Acer, dïbwödhi beeye Akiyut o Cëlömi.

²⁸ «Ki røk jø tuuŋ nyïïkwaac Naptali, dïbwödhi beeye Pedael wär Ammiyut.»

²⁹ Moøgø beege jiy moa kööm Wuuö Jwøki nee ŋööm Keenan pääŋge jï jø Icriel nee dööŋe jïge na marge.