Kwään Jiy 32 - Wëël Jwøk

Luum Ŋöömö Mana Cïp Jï Tuŋi Moa Näk Ariiø

¹ 'Ba kar kaace nyïïkwaac Ruben ki nyïïkwaac Gaat jïge da dhäk mo thööth døc. Køøre kanya ö nyïïkwaac Ruben ki nyïïkwaac Gaat na jootge ŋööm Jadher ki ŋööm Gelät na kany mo orømø kiper dhäk,

² gena ö baŋ Modhe, ki Eliedhar na näk Kwääy Lam Mana Dwøŋ, ki dïbwöthe mo lwaak bäre, ni köge,

^3-4 ni «Ŋöömma dïïm Wuuö Jwøki ki ri lwaa Icriel, ni beege mïëya cøøri na Atharöt, ki Dibön, ki Jadher, ki Nemera, ki Ëcbön, ki Eliyali, ki Cëëbama, ki Nebø, ki Bayan, beege ŋøøm mo orømø kiper dhäk; ni waani, wa na jiyï, jïwa da dhäk.

⁵ 'Ba ni näk mo yiï met ki waani, ŋöömmi en doo mëëga waani, wa na jiyï, nee tïme na marwa. Kär niï kïtha waani løø Naam Jördan løøga.»

⁶ 'Ba Modhe aköö jï nyïïkwaac Gaat ki nyïïkwaac Ruben, na «?Aŋø, nyïïmëëgu doo aa baŋ leny, nou bëëdu kany jaak?

⁷ ?Aŋø, aperŋø na raanynyu cwïny jø Icriel, nee ba cige yi ŋöömma cïp Wuuö Jwøki jïge en?

⁸ Gïnögø caala gïna tïïc wëëgu kiree, kanya jääŋŋa geni ki Kadëc-Bernia nee ŋöömö liewge.

⁹ Kiper kanya cige goor Ëcköl, na nø neenge ŋöömö, cwïny jø Icriel araanyge nee ba cige yi ŋöömma cïp Wuuö Jwøki jïge.

¹⁰ Ni ö Wuuö Jwøki ni wëëre ki geni døc dïcäŋöce, ni kööŋe, ni kööe,

¹¹ ni ‹Ka adïëri møn, røk jøøa ö wøk ki Ijep, moa näk cwiicge pïërariiø këël mo kaala pïërariiø, bäŋ dhaanhø aciel dïge mo joot ŋöömma buua jï Eeberam ki Aydhak ki Jeekap, kiper køøra kärge caadhø ki cwïnyge bäre;

¹² 'ba jø ojoot ŋöömmögø beege Kalëp o Jöpöni nyikwaar jø Kënec, ki Jøcua o Nun keerge, kiper gena bëëdö ni ge caatha køøra, a na Wuuö Jwøk, ki cwïnyge bäre.›

¹³ 'Ba kar kaaca, Wuuö Jwøk awëër døc ki jø Icriel, ni wëëk geni thääyö dï paap ki cwiiri ma pïëraŋween, këël mana thum beenhnhø bäre mana tïïc gïïa reyø nyïm Wuuö Jwøk.

¹⁴ «'Ba ennø, uuna läw kar wëëgu, ni uuna jø raay møøk mo nyärö, nee wëëc Wuuö Jwøk meetu bäät jø Icriel.

¹⁵ Kiper ni näk mou døøa cään ni ba cäädhu køøre, eni thuwø jiy ocäŋ wii dï paap, ni thum jøøi bëët ii ki køøru.»

¹⁶ Køøre gena nyänh buut Modhe, ni köge, ni «Wa doo tïïö ki lwääge kiper lääc paac mowa kany, ni gëëtwa ki päänye thuwø kiper obwöre mowa moa therø.

¹⁷ 'Ba waani, tøøŋi mowa olwørwa ni rewa ewa jiiŋŋø ki man bwøthwa maal nyïm jø Icriel, këël mano kïthwa geni kanyo bëëtge yie. 'Ba nyïïwa moa therø obëëdö yïth päänye mo teek kiper nee ge ba 'näk jiyi moa bëëdö yi ŋöömmi.

¹⁸ Wa ba duu mïëri mowa këël mano ö ŋati man nø ri jø Icriel noo lwør ŋöömö mana näk kure.

¹⁹ Ni wa bäŋ doo jïtö ki ŋöömö mo dööŋ jïwa løø Naam Jördan løøga ki geni na aciel, kiper ŋöömö mano dööŋ na marwa anø ci ceŋwa løø Naam Jördan løøi na en jï løø kur tuul-cäŋ.»

²⁰ 'Ba Modhe aköö jïge, ni «Ni näk mo gïn tïïyu tïïö, ni jiiŋŋu dëëtu kiper leny ki køør dwør Wuuö Jwøk,

²¹ ni ö jiyi bëët moa näk dëëtge ege jiiŋŋø kiper leny ni kaathge Jördan ni ge cäädhi ki køør dwør Wuuö Jwøk, këël kanyo ö Wuuö Jwøki noo riem nyïïmän moe bëët,

²² ni dïïm ŋöömmögø bäre; køøre kar kaace nø, uuno duui, ni tïmu ni bäŋ gïn mo many Wuuö Jwøki manynyø bäätu këët; këël jø Icriel tïmö ni bäŋ gïn mo manyge bäätu thuwø. Ni ö ŋöömmi en ni tïme na maru nyïm Wuuö Jwøk.

²³ «'Ba ni näk mo ba tïïyu, u bääyö dëër Wuuö Jwøk; 'ba wär ŋäyu ni raay mou keeru røma rou.

²⁴ Geerru päänye kiper obwöre mou moa therø, ni tïïu ki lwääge thuwø kiper dïëk mou, ni tïïyu gïna buugu.»

²⁵ 'Ba nyïïkwaac Gaat ki nyïïkwaac Ruben gena köö jï Modhe, ni «Gïnögø otïïcwa, wa na jiyï, kaawat mana caanï, ï na kwäärö marwa.

²⁶ Waani, nyïïwa ki määrwa, ki dïëk, ki dhäk mowa bëët odööŋ kany yïth päänye mo Gelät.

²⁷ 'Ba waani, wa na jiyï, wa na näk dëëtwa ewa jiiŋŋø kiper leny, waano ŋut løøga ni cääthwa ki køør dwør Wuuö Jwøk, kaawat mana caanï, ï na kwäärö marwa.»

²⁸ Køøre Modhe acïpö ki dwøl kiper jøøgø jï Eliedhar na näk Kwääy Lam Mana Dwøŋ, ki Jøcua o Nun, ki jï wïth dhøk uudi bëët mo tuŋi moa näk apaar kurriiø mo jø Icriel.

²⁹ Ni kö Modhe jïge, ni «Nee jiy bëët moa näk rege ege jiiŋŋø kiper leny moa en ri jø tuuŋ Gaat ki jø tuuŋ Ruben ŋuta løø Naam Jördan løøga ki uuni ki køør dwør Wuuö Jwøk, këël mano mayu ŋöömmögø; køøre nø, ŋööm Gelät wär mëëgu geni na marge.

³⁰ 'Ba ni näk mo dëëtge ba jiiŋge kiper leny ni pööthge ki uuni na aciel, ge doo jïtö ki kurge ki ri ŋööm Keenan, kaamar jø tuŋi møga.»

³¹ Ni dwøgi ya nyïïkwaac Gaat ki nyïïkwaac Ruben, ni «Gïnögø tïïcwa tïïö kaawat mana nø caani ya Wuuö Jwøki jïwa, wa na jiyï.

³² Waani, dëëtwa ojiiŋwa kiper leny ni ŋutwa løøga yi ŋööm Keenan ni wa cäädhi ka køør dwør Wuuö Jwøk, ni ŋöömö mana mëëk waani løø Naam Jördan løøi odööŋ na marwa.»

³³ 'Ba Modhe ŋöömö aput cïp jï nyïïkwaac Gaat ki nyïïkwaac Ruben, ki thääŋ tuuŋ Maneeca o Jocep, ni beeye ŋööm Cëëwön nyeny jø Amör, ki ŋööm Ög nyeny jø Baacan, ki päänye moge moa døøŋŋø ki moa therø, këël ŋøøm bëët moa en deŋ päänye moøgø.

³⁴ Ni ö nyïïkwaac Gaati ni cäŋge Dibön geerrø, ka Atharöt, ka Aröör,

³⁵ ka Atharöt-Cöpan, ki Jadher, ki Jögebiya,

³⁶ ki Bëëth-Nimera, ki Bëëth-Aaren, na päänye mo ege geerø ni teek; ni tïïge ki lwääge kiper dïëk thuwø.

³⁷ Ni ö nyïïkwaac Ruben ni cäŋge Ëcbön geerrø, ki Eliyali, ki Kiriatayim,

³⁸ ki Nebø, ki Baal-Miyön, ki Cebama; ni cakge nyeŋ päänye moa geerge ki nyeŋ møøk.

³⁹ Ni ö nyïïkwaac Makir o Maneeca ni cige Gelät ni macge gø, ni riemge jø Amör moa en kaace.

⁴⁰ Ni ö Modhe ni cïp ŋööm Gelät jï nyïïkwaac Makir o Maneeca, ni bëëtge kaace.

⁴¹ 'Ba Jayer nyikwaar Maneeca aay ni mac atude mo Gelät moa therø bëët, ni cwøl ge na Mïëc Jayer.

⁴² Ni ö Nöba ni aae ni mac Kënat ka atude moa therø na en deŋŋe bëët, ni cwøl gø ri nyeŋŋe ni Nöba.