Kwään Jiy 3 - Wëël Jwøk

Luum Wäät Aran

¹ Man beeye luum nyïïkwaac Aran ki Modhe kanya ö Wuuö Jwøki na cääne ki Modhe bäät Kïn Caynay.

² Nyeŋ wäät Aran beege Nadap na näk kaa, ka Abiyu, ki Eliedhar, ki Itamer.

³ Moøgø beege nyeŋ wäät Aran, moa røøny na wïïr ki maaw na dïlämme, nee tïï dïlämme tïïcge.

⁴ 'Ba Nadap ka Abiyu athøw nyïm Wuuö Jwøk dï paap Caynay, kanya kïthge maac nyïm Wuuö Jwøk ki jöö mo patha kare. Ni thøwge ni poot bäŋ obwöre jïge. Køøre Eliedhar ki Itamer tïï dïlämme atïïcge yïth nïr kwøw mar wääge ma Aran.

Kanya Caan Tïïc Mar Jø Tuuŋ Libay

⁵ Køøre Wuuö Jwøk aköö jï Modhe,

⁶ ni «Käl jø tuuŋ Libay ni cïbï geni nyïm Aran na näk Kwääy Lam Mana Dwøŋ kiper nee eni tïnyge.

⁷ Ni ö geni ni tïnyge Aran ki jø Icriel bëët nyïm oduŋkaany røømmø, ni ge tïïya tïïc mar oduŋkaanynyøgø na näk kar bëëtö mara, a na Wuuö Jwøk.

⁸ Jammi bëët moa en yo oduŋkaany røømmø otïmö ni ena ceŋge, ni tïïge kiper jø Icriel, ni ge tïnynya kar bëëtö mar Wuuö Jwøk.

⁹ Jø tuuŋ Libay wär cïpï jï Aran ki wääte, kiper ki røk jø Icriel gena jiy mo doo cïbö jïre na bäre.

¹⁰ 'Ba Aran ki wääte wär thïïŋï, ni ö geni ni gwøkge tïïc marge na näk tïï dïlämme; 'ba noo näk da dhaanhø mør jaak mo nyänhnha buut oduŋkaara wala manynya tïïc manøgø nee tïïe, wär eni 'näk.»

¹¹ Ni kö Wuuö Jwøki jï Modhe,

¹² «Neenï, aani jø tuuŋ Libay alwøra dëët jø Icriel na kar kaai moo lwaar määr jø Icriel ki ge. Jø tuuŋ Libay geno tïmö na 'moa,

¹³ kiper kaai bëët beege 'moa. Dïcäŋa nääa kaai bëët yi ŋööm Ijep, kaai bëët mo jø Icriel, ni beege jiy ki lääc paac, acïba kur keerge na 'moa, ni putge bëëtö na 'moa. Man beeye aani na Wuuö Jwøk na nut cøøn noo bëëdö.»

¹⁴ Ni ö Wuuö Jwøki ni cääne ki Modhe dï paap Caynay, ni kööe,

¹⁵ ni «Kwaan jø tuuŋ Libay ki køør dhøk uut wëëkge ki tuŋi moge. Kwaan cwøw bëët moa näk jïge da dwäde oceele këël mo kaala dwäde oceele.»

¹⁶ Køøre Modhe jøøgø akwaane ki køør luum Wuuö Jwøk, kaawat mana kööm eni.

¹⁷ 'Ba nyeŋ wäät Libay beege Gërcön ki Kät ki Mërari.

¹⁸ Ni nyeŋ wäät Gërcön ki køør dhøk uudi moge beege Löbeni ki Cimiy.

¹⁹ Ni nyeŋ wäät Kät ki køør dhøk uudi moge beege Amram ki Icaar ki Keeprön ko Udhiel.

²⁰ Ni nyeŋ wäät Mërari ki køør dhøk uudi moge beege Maali ki Muci. Moøgø beege dhøk uudi mo jø tuuŋ Libay.

²¹ 'Ba ki røk wäät Gërcön beege dhi øt Löbeni ki dhi øt Cimiy; moøgø beege dhøk uudi mo wäät Gërcön.

²² Kwään cwøw bëët moa näk jïge da dwäde oceele këël mo kaala dwäde oceele beege jiy ma kume abïriiø ki dïpe abïïc.

²³ Jø dhøk uudi mo nyïïkwaac Gërcön twïër marge tïïcge tïïö töök oduŋkaara jï løø kur pänh-cäŋ.

²⁴ 'Ba Eliacap wär Lael beeye dïbwödhi mar nyïïkwaac Gërcön.

²⁵ Tïïc mar nyïïkwaac Gërcön yo oduŋkaany røømmø beeye ki man gwøkge oduŋkaara na näk kar bëëtö mar Wuuö Jwøk, ki rëëbi mare, ka abïï man wø gëëŋ dhee,

²⁶ ka abïïe mo kal mana en lak oduŋkaara ki gïn wø cïp olämme bääte, ka abïï man wø gëëŋ dhi karøgø, ki thøøli mo wø mäk piny ki ge bëët. Këël tïïe bëët mo wø manynyi kiper gïïögø poot ena ceŋge thuwø.

²⁷ Ki røk wäät Kät beege dhi øt Amram ki dhi øt Icaar ki dhi øt Keeprön ki dhi øt Udhiel; moøgø beege dhøk uudi mo wäät Kät.

²⁸ Kwään cwøw bëët moa näk jïge da dwäde oceele këël mo kaala dwäde oceele beege jiy ma kume abära ki dïpe abïciel. 'Ba tïïc mar nyïïkwaac Kät beeye koor japa en kur keerge moa en yo oduŋkaara.

²⁹ Jø dhøk uudi mo nyïïkwaac Kät twïër marge tïïcge tïïö jï løø tier-piny ko oduŋkaara.

³⁰ 'Ba Elicapan wär Udhiel beeye dïbwödhi mar nyïïkwaac Kät.

³¹ 'Ba tïïc marge beeye gwøk acanduk mar Wuuö Jwøk, ki tharabëëta, ki lamba, ki gïn wø cïp olämme bääte, ki gïn wø waaŋ gïn wø jïye ŋwääi ni met bääte, ki jap wø en kur keerge mo wø tïï dïlämme ki ge, ka abïï man wø gëëŋ kanya en kur keere na pere leth ki gø. Këël tïïe bëët mo wø manynyi kiper gïïögø poot ena ceŋge thuwø.

³² Ni ö Eliedhar wär Aran na näk Kwääy Lam Mana Dwøŋ ni tïme na wïth jøøa näk dïbwöthe mo jø tuuŋ Libay, ni jø wø gwøk oduŋkaara mana en kur keere ena cere.

³³ Ki røk wäät Mërari beege dhi øt Maali ki dhi øt Muci; moøgø beege dhøk uudi mo wäät Mërari.

³⁴ Kwään cwøw bëët moa näk jïge da dwäde oceele këël mo kaala dwäde oceele beege jiy ma kume abïciel ki dïpe ariiø.

³⁵ Dïbwödhi mar jø tuuŋ Mërari beeye Dhuriel wär Abikael. Twïër marge tïïcge tïïö jï løø wï-piny ko oduŋkaara.

³⁶ 'Ba tïïc mar nyïïkwaac Mërari beeye gwøk opämi mo oduŋkaara, ki cööthe, ki gïï wø cwöth tietge yïthge, ki läämme, ki jap wø tïïö ki ge bëët, këël tïïe bëët mo wø manynyi kiper gïïögø;

³⁷ ki jer kal ki gïï wø cwöth tietge yïthge, ki dïnööy ki thøøli mo wø mäk piny ki ge bëët.

³⁸ 'Ba Modhe ka Aran ki wäät Aran, twïër marge tïïcge tïïö nyïm oduŋkaany røømmø na näk kar bëëtö mar Wuuö Jwøk, jï løø kur tuul-cäŋ; ni tïïe bëët mo wø tïïc yo oduŋkaara kiper jø Icriel ena ceŋge. 'Ba ni näk da dhaanhø mør jaak mo nyänhnha buut oduŋkaara wala manynya tïïc manøgø nee tïïe, eni doo nääö.

³⁹ Ki køør mana ö Wuuö Jwøki na kööm Modhe ka Aran, geni jø tuuŋ Libay akwaange ki køør dhøk uut wëëkge; ni kwään cwøw moa näk jïge da dwäde oceele këël mo kaala dwäde oceele beege jiy ma kume ma pïërariiø kurriiø.

Kanya Lwør Jø Tuuŋ Libay Na Kar Kaai Mo Jø Icriel

⁴⁰ 'Ba Wuuö Jwøk aköö jï Modhe, ni «Kwaan kaai bëët moa näk cwøw mo jø Icriel, moa näk jïge da dwäde oceele këël mo kaala dwäde oceele, ni göörï nyeŋge piny.

⁴¹ Ni lwørï jø tuuŋ Libay na 'moa na kar kaai bëët mo jø Icriel, ni lwørï lääc paac mo jø tuuŋ Libay thuwø na 'moa na kar kaai bëët mo lääc paac mo jø Icriel. Man beeye aani na Wuuö Jwøk.»

⁴² Køøre Modhe kaai bëët mo jø Icriel akwaane, kaawat mana ö Wuuö Jwøki na kööm eni.

⁴³ Cwøw bëët moa näk kaai moa nyeŋge göör piny, na näk jïge da dwäde oceele këël mo kaala dwäde oceele, kwäänge beege jiy ma kume ma pïërariiø kurriiø ki dïpe ariiø ki pïërabïriiø kurdäk.

⁴⁴ Køøre Wuuö Jwøk acäänö ki Modhe ni kööe,

⁴⁵ ni «Lwør jø tuuŋ Libay na kar kaai mo jø Icriel, ni lwørï lääc paac mo jø tuuŋ Libay thuwø na kar kaai mo lääc paac mo jø Icriel, ni ö jø tuuŋ Libay ni tïmge na 'moa. Man beeye aani na Wuuö Jwøk.

⁴⁶ 'Ba jiy ma dïpe ariiø ki pïërabïriiø kurdäk moa näk kaai mo jø Icriel moa dööŋ wøk, ni bäŋ jø tuuŋ Libay mo wiilge rege ki ge, dëëtge dege wïïla wøk ki gwel.

⁴⁷ Wärï kädï ki gwel abïïc mar rumi mana cwøl ni cekel bäät ŋati man nø, mo opäärö ki rumi mar kar lam na en kur keere.

⁴⁸ Gwel mo ocïp jøøgø na dööŋ wøk yøø, na wiilge rege ki ge, wär mëëk Aran ki wääte.»

⁴⁹ Køøre gwet wïïdö mo jø Icriel moa dööŋ wøk, ni bäŋ jø tuuŋ Libay mo wiilge rege ki ge, akäl Modhe.

⁵⁰ Gwel moa lwør baŋ kaai mo jø Icriel beege kuma aciel ki dïpe adäk ki pïërabïciel kurbïïc mar rumi mana cwøl ni cekel, ni gwetøgø opäärö ki rumi mar kar lam na en kur keere.

⁵¹ Ni ö Modhe ni cïp gwet wïïdö jï Aran ki wääte, ki køør dwør Wuuö Jwøk, kaawat mana ö Wuuö Jwøki na kööm eni.