Kwään Jiy 29 - Wëël Jwøk

Ciik Kiper Olämme Mo Wø Cïp Ra Ajwöma Man Wø Kooth Tuŋi Yie

¹ «'Ba ki yi cäŋ mana dïkwøŋ mar bïriet dwäde, u doo jïtö ka acooŋa mo ena kur keere, ni u ba doo tïïö ki tïïc mo teek. 'Ba dïcäŋ manøgø doo tïmö ni beeye cäŋ mano køthu tuŋi yie.

² 'Ba u doo cïpö ko olämi man wø waaŋ bäre na ŋwäänynye met jïra, a na Wuuö Jwøk, ni beeye rwaath aciel, ki nywø røømmø aciel, ki nyïïdïëk abïriiø ma rööm ma nyööi mo cwiicge oceele mo bäŋ gïn mo ogwäyö dëëtge.

³ Muuy mar beel thuwø, ni beeye møø mo pøøth mo ojääbö ki maaw, wär cïpu ki lääy moøgø na aciel, ni møø mano cïpu beege rumme adäk ki røk rumme apaar moa en yi rumi mana cwøl ni iipa kiper rwaath, ki rumme ariiø kiper nywø røømmø,

⁴ ki rumi aciel kiper nyirøømmø aciel man nø røk moa na abïriiø.

⁵ Køøre nø, nywø ateea aciel thuwø dou cïbö no olämi mar wëën raay, nee tïme no okïdi kiperu,

⁶ ni meedu olämi manøgø bäät olämme mo wø waaŋ kany wø päär dwääyi cooth, ki mo wø waaŋ cooth ki yïth cääŋŋe bëët, no olämme moøgø bëët cïp na aciel ki muuce mo beel ki muuce mo kwøŋ; ni beege mo wø cïpu ki køør mana no ocaanø kiperge, ni geno olämme mo wø waaŋ na ŋwäänyge met jïra, a na Wuuö Jwøk.

Ciik Kiper Olämme Mo Wø Cïp Yi Cäŋ Man Wø Tïïc Okïdi Yie

⁷ «'Ba ki ri paac nïne mar bïriet dwäde, u doo jïtö ka acooŋa mo ena kur keere, ni dwøgu dëëtu piny, ni bäŋe tïïc mo tïïyu.

⁸ 'Ba wäru cïpu ko olämi man wø waaŋ na ŋwäänynye met jïra, a na Wuuö Jwøk, ni beeye rwaath aciel, ki nywø røømmø aciel, ki nyïïdïëk abïriiø ma rööm ma nyööi mo cwiicge oceele mo bäŋ gïn mo ogwäyö dëëtge.

⁹ Muuy mar beel thuwø, ni beeye møø mo pøøth mo ojääbö ki maaw, wär cïpu ki lääy moøgø na aciel, ni møø mano cïpu beege rumme adäk ki røk rumme apaar moa en yi rumi mana cwøl ni iipa kiper rwaath, ki rumme ariiø kiper nywø røømmø,

¹⁰ ki rumi aciel kiper nyirøømmø aciel man nø røk moa na abïriiø.

¹¹ Køøre nø, nywø ateea aciel thuwø dou cïbö no olämi mar wëën raay. Moøgø dou cïbö ni meedu geni bäät olämi mar wëën raay mana no okïdi, ko olämme mo wø waaŋ cooth, ni wø cïp na aciel ki muuce mo beel ki mo kwøŋ.

Ciik Kiper Olämme Mo Wø Cïp Ra Ajwöma Man Wø Wøør Ni Jøw Bëëdö Yïth Abïle

¹² «'Ba kany wø tïm nïr dwääy mar bïriet dwäde na apaar kurbïïc, u doo cäŋa jïtö ka acooŋa mo ena kur keere, nou ba doo tïïö ki tïïc mo teek; 'ba u doo tïïö ka ajwöma ni gwøgu gø na mara, a na Wuuö Jwøk, ki nïne abïriiø.

¹³ 'Ba u doo cïpö ko olämi man wø waaŋ, ni beeye olämi mo di waaŋø mo ŋwäänynye met jïra, a na Wuuö Jwøk, ni beege rwädhe apaar kurdäk mo therø, ki nyöök rööm ariiø, ki nyïïdïëk apaar kurŋween ma rööm ma nyööi mo cwiicge oceele, mo bäŋ gïn mo ogwäyö rege.

¹⁴ 'Ba muuy mar beel thuwø, ni beeye møø mo pøøth mo ojääbö ki maaw, wär cïpu ki lääy moøgø na aciel, ni møø mano cïpu beege rumme adäk ki røk rumme apaar moa en yi rumi mana cwøl ni iipa kiper rwaath aciel man nø røk moa na apaar kurdäk, ki rumme ariiø kiper nywø røømmø man nø,

¹⁵ ki rumi aciel kiper nyirøømmø aciel man nø røk moa na apaar kurŋween.

¹⁶ Køøre nø, nywø ateea aciel thuwø dou cïbö no olämi mar wëën raay, ni meedu gø bäät olämme mo wø waaŋ cooth, ni wø cïp na aciel ki muuce mo beel ki mo kwøŋ.

¹⁷ «'Ba ki ri riet nïne wäru cïpu ki rwädhe apaar kurriiø mo therø, ki nyöök rööm ariiø, ki nyïïdïëk apaar kurŋween ma rööm ma nyööi mo cwiicge oceele, mo bäŋ gïn mo ogwäyö dëëtge.

¹⁸ Ni cïpu muuy mar beel ki muuy mar køøŋ nyïïomøki thuwø kiper rwädhe, ki nyöök rööm, ki nyïïrööm ki køør kwäänge, kaawat mana caani.

¹⁹ Køøre nø, nywø ateea aciel thuwø wär cïpu no olämi mar wëën raay, ni meedu gø bäät olämme mo wø waaŋ cooth, ni wø cïp na aciel ki muuce mo beel ki mo kwøŋ.

²⁰ «'Ba ki ri dää nïne wäru cïpu ki rwädhe apaar kurciel mo therø, ki nyöök rööm ariiø, ki nyïïdïëk apaar kurŋween ma rööm ma nyööi mo cwiicge oceele, mo bäŋ gïn mo ogwäyö dëëtge.

²¹ Ni cïpu muuy mar beel ki muuy mar køøŋ nyïïomøki thuwø kiper rwädhe, ki nyöök rööm, ki nyïïrööm ki køør kwäänge, kaawat mana caani.

²² Køøre nø, nywø ateea aciel thuwø wär cïpu no olämi mar wëën raay, ni meedu gø bäät olämme mo wø waaŋ cooth, ni wø cïp na aciel ki muuce mo beel ki mo kwøŋ.

²³ «'Ba ki ri ŋweer nïne wäru cïpu ki rwädhe apaar mo therø, ki nyöök rööm ariiø, ki nyïïdïëk apaar kurŋween ma rööm ma nyööi mo cwiicge oceele, mo bäŋ gïn mo ogwäyö dëëtge.

²⁴ Ni cïpu muuy mar beel ki muuy mar køøŋ nyïïomøki thuwø kiper rwädhe, ki nyöök rööm, ki nyïïrööm ki køør kwäänge, kaawat mana caani.

²⁵ Køøre nø, nywø ateea aciel thuwø wär cïpu no olämi mar wëën raay, ni meedu gø bäät olämme mo wø waaŋ cooth, ni wø cïp na aciel ki muuce mo beel ki mo kwøŋ.

²⁶ «'Ba ki ri bïï nïne wäru cïpu ki rwädhe abïŋween mo therø, ki nyöök rööm ariiø, ki nyïïdïëk apaar kurŋween ma rööm ma nyööi mo cwiicge oceele, mo bäŋ gïn mo ogwäyö dëëtge.

²⁷ Ni cïpu muuy mar beel ki muuy mar køøŋ nyïïomøki thuwø kiper rwädhe, ki nyöök rööm, ki nyïïrööm ki køør kwäänge, kaawat mana caani.

²⁸ Køøre nø, nywø ateea aciel thuwø wär cïpu no olämi mar wëën raay, ni meedu olämi manøgø bäät olämme mo wø waaŋ cooth, ni wø cïp na aciel ki muuce mo beel ki mo kwøŋ.

²⁹ «'Ba ki ri bïcier nïne wäru cïpu ki rwädhe abära mo therø, ki nyöök rööm ariiø, ki nyïïdïëk apaar kurŋween ma rööm ma nyööi mo cwiicge oceele, mo bäŋ gïn mo ogwäyö dëëtge.

³⁰ Ni cïpu muuy mar beel ki muuy mar køøŋ nyïïomøki thuwø kiper rwädhe, ki nyöök rööm, ki nyïïrööm ki køør kwäänge, kaawat mana caani.

³¹ Køøre nø, nywø ateea aciel thuwø wär cïpu no olämi mar wëën raay, ni meedu olämi manøgø bäät olämme mo wø waaŋ cooth, ni wø cïp na aciel ki muuce mo beel ki mo kwøŋ.

³² «'Ba ki ri bïriet nïne wäru cïpu ki rwädhe abïriiø mo therø, ki nyöök rööm ariiø, ki nyïïdïëk apaar kurŋween ma rööm ma nyööi mo cwiicge oceele, mo bäŋ gïn mo ogwäyö dëëtge.

³³ Ni cïpu muuy mar beel ki muuy mar køøŋ nyïïomøki thuwø kiper rwädhe, ki nyöök rööm, ki nyïïrööm ki køør kwäänge, kaawat mana caani.

³⁴ Køøre nø, nywø ateea aciel thuwø wär cïpu no olämi mar wëën raay, ni meedu gø bäät olämme mo wø waaŋ cooth, ni wø cïp na aciel ki muuce mo beel ki mo kwøŋ.

³⁵ «'Ba ki ri bäc nïne u doo jïtö ka acooŋa mo ena kur keere, nou ba doo tïïö ki tïïc mo teek.

³⁶ 'Ba u doo cïpö ko olämi man wø waaŋ, ni beeye olämi mo di waaŋø mo ŋwäänynye met jïra, a na Wuuö Jwøk, ni beeye rwaath aciel, ki nywø røømmø aciel, ki nyïïdïëk abïriiø ma rööm ma nyööi mo cwiicge oceele, mo bäŋ gïn mo ogwäyö dëëtge.

³⁷ Ni cïpu muuy mar beel ki muuy mar køøŋ nyïïomøki thuwø kiper rwaath, ki nywø røømmø, ki nyïïrööm ki køør kwäänge, kaawat mana caani.

³⁸ Køøre nø, nywø ateea aciel thuwø wär cïpu no olämi mar wëën raay, ni meedu gø bäät olämme mo wø waaŋ cooth, ni wø cïp na aciel ki muuce mo beel ki mo kwøŋ.

³⁹ «Gïïögø bëët dou cïbö jïra, a na Wuuö Jwøk, ki yïth kwör ajwöm moa näk ocaanø jïïu, ni beege olämme mo wø waaŋ, ki muuy mar beel, ki muuy mar køøŋ nyïïomøki, ko olämme mou mo wø duunni ki mëër; ni meedu geni bäät olämme mo kööŋ ko olämme mo wø cïpu ki met ec maru.»

⁴⁰ Køøre Modhe jammi bëët acaane jï jø Icriel kaawat mana köömmi ya Wuuö Jwøki.