Kwään Jiy 27 - Wëël Jwøk

Luum Løøk Mar Nyïï Dhilöpat Kiper Ŋøøm Moa Doo Cïbö Ki Nyeŋ Wääge

¹ Køøre nyïï Dhilöpat wär Opëër gena nyänh buut Modhe; 'ba Ëpër beeye o Gelät, ni Gelät beeye o Makir, ni Makir beeye o Maneeca, na käl dhi øt Maneeca o Jocep. 'Ba nyeŋ nyïï Dhilöpat beege Maala, ki Nöa, ko Okila, ki Milka, ki Tirja.

² Ni ö nyïï Dhilöpati ni cuŋge dho oduŋkaany røømmø nyïm Modhe, ki Eliedhar na näk Kwääy Lam Mana Dwøŋ, ki dïbwöthe, këël acooŋa bäre, ni köge,

³ ni «Wääwa athøw dï paap, ni eni ba en yïthakic jøøa dwätö na cäädhö ki Köra na thïïŋ dëëtge dëër Wuuö Jwøk; 'ba eni thøw ka raay moe keere, ni bäŋ obwöre mo cwøw jïre.

⁴ ?Aŋø ni tïme ni nyeŋ wääwa rwäänyö dï tuuŋge en? ?Beeye kiper na bäŋe obwöre ma cwøw jïre? Ŋøøm moa doo mëëk wääwa wär mëëk waani nee tïme na kurwa dï tuuŋ wääwa.»

⁵ Køøre Modhe luum nyïï Dhilöpat abwøth nyïm Wuuö Jwøk.

⁶ 'Ba Wuuö Jwøk aköö jï Modhe,

⁷ ni «Mar nyïï Dhilöpat beeye kare. Ge diï mooø ki kurge na ŋøøm mo dööŋ jïge yïthakic tuuŋ wääge, ni wëëgï ŋøøm geni moa doo cïbö jï wääge na ŋøøm mo wø dööŋ.

⁸ «'Ba caanï jï jø Icriel, ‹Ni näk mo dhaanhø thøw ni bäŋ wääde, ŋøøm moe doo dööŋ jï nyaare.

⁹ Ni näk mo bäŋ nyaare, ŋøøm moe doo dööŋ jï nyïïmenni moa näk cwøw.

¹⁰ 'Ba ni näk mo bäŋ nyïïmenni, ŋøøm moe doo dööŋ jï nyïïmii wänni moa näk cwøw.

¹¹ Ni näk mo bäŋ nyïïmii wänni, ŋøøm moe doo dööŋ jï tuuŋge mana kare cään ki dhi øtø mare, ni tïme na mare. 'Ba gïnögø obëëdö na ciik jï jø Icriel, kaawat mana köömma ïïni, a na Wuuö Jwøk.› »

Kanya Ö Jwøki Na Jier Jøcua Nee Ci Kar Modhe Na Dïbwödhi

¹² Køøre Wuuö Jwøk aköö jï Modhe, ni «Ci bäät kïdi man na cwøl na Abarim en, ni neenï ŋöömma cïba jï jø Icriel.

¹³ 'Ba kanyo nø neenï gø, ïïno thøw ni läpï køør jø pou, kaawat mana ö coku ma Aran na läp køørge;

¹⁴ kiper kanya pïëm lwaaki ki aani dï paap Dhïn kar pï Meriba na en Kadëc, uuni luubö mara adhallu, ni käru a tïïö naa ena kur keera nyïm lwaak bäre.»

¹⁵ Køøre Modhe aköö jï Wuuö Jwøk,

¹⁶ ni «Ï na Wuuö Jwøk, na näk Jwø jwïëy mo jiy bëët, ï doo jëëtö ki dhaanhø mo käär lwaak man,

¹⁷ ŋat mo løny jïre ki man bwödhe nyïmge, ni tïïe bëët moo tïïc lwaa Icrielli ena cere, kiper nee lwaak marï, ï na Wuuö Jwøk, nee ba bëëtge kaamar dïëk mo bäŋ dïkwääy jïge.»

¹⁸ Køøre Wuuö Jwøk aköö jï Modhe, ni «Lwør Jøcua o Nun, ni beeye dhaanhø mo Jwïëc Jwøk ena bääte, ni cïbï ceŋŋï bääte,

¹⁹ ni thïïŋï eni nyïm Eliedhar na näk Kwääy Lam Mana Dwøŋ, nyïm lwaak bäre, ni köömmï eni ni nëënö jïge bëët.

²⁰ Ni cïpï thääŋ teek marï jïre, nee dwøre wïny lwaa Icrielli bäre.

²¹ 'Ba eni na Jøcua enø, wär cuŋŋe nyïm Eliedhar na näk Kwääy Lam Mana Dwøŋ, ni ö Eliedharri ni pëëny aani kiper Jøcua, ni ŋøla luup kipere ki køør gïna cwøl no Urim. 'Ba Jøcua ki lwaa Icriel bäre jammi bëët dige tïïö ki køør dwør Eliedhar.»

²² Ni ö Modhe ni tïïc gïïa caan jïre kaawat mana ö Wuuö Jwøki na kööm eni, ni lwør Jøcua ni thïïŋ gø nyïm Eliedhar na näk Kwääy Lam Mana Dwøŋ, nyïm lwaak bäre.

²³ Køøre Modhe ceŋŋe acïp bäät Jøcua ni kööm gø, kaawat mana ö Wuuö Jwøki na kööm eni.