Kwään Jiy 24 - Wëël Jwøk

¹ 'Ba kanya neeni ya Beelammi ni Jwøk yie met ki man gwïëth jø Icriel, eni kär aay nee määnye ki jap thïëth, kaawat mana tïïe yïth nïne møga. 'Ba nyïme aløøe ni neeta dï paap.

² Køøre wïïe atïŋ maal, ni joot jø Icriel ni rege ege cïïmmö na wïth tuŋi, ni ö Jwïëc Jwøki ni ö bäät Beelam,

³ ni ö Beelammi ni täge ki man køp dwør Jwøk, ni kööe, na «A caana dwør Jwøk, a na Beelam o Beeyör, naa cäänö ni aana dhaanhø mo nyeŋŋe ojabø.

⁴ Aani, a caana dwør Jwøk ni aana ŋat wø wïny luup mo Jwøk, ni aana ŋat wø neen mar Jwøa en teeki cere, ni neena gø ni pädha, ni nyeŋŋa yaa jabø.

⁵ «U na jic Jeekap, oduŋkaare mou mïërö døc; ni twëëre mou mïërö thuwø, u na jø Icriel,

⁶ ni ge caala gøli mo rege ege lwørø, ni caalge pwöth mo wø en deŋ naam, ni caalge jenni mo mïërö mo opiith Wuuö Jwøki, ni caalge orøge mo ena lak naam.

⁷ Paac maru otïmö ni yie da pïï mo thööth døc, ni jït nyïïkwaayu ki bëët durö, ni tïm nyeya marge ni dwøŋŋa eni ki nyenynya näk Agaak, ni tïm buye no owøørø.

⁸ «Jø Icriel akäl Jwøki wøk ki Ijep, ni tïïc geni ni teek kaamar jööbi. Wïth juurre moa näk nyïïmänge oraanyge, ni tøcge cuuge na thäŋi, ni këërge geni ka athëëre.

⁹ Jø Icriel caala cïgïï ŋuu mo obut piny, ni ge caala maath ŋuu. ?Aŋa no maar gø jiec? Gwïëth oen bäät ŋat wäro gwïëth geni, na acïëni oen bäät ŋat wäro cien geni.»

¹⁰ Køøre Balak awëër døc ki Beelam, ni teeŋ ceŋŋe; ni kö Balaki jï Beelam, ni «Ïïna cwøla nee nyïïmän 'moa cienï. 'Ba ennø, ï poot gwïëtha geni kwöre moi na adäk ii.

¹¹ Kiper manøgønø, aa pou kawaane ennø. Aana köö niï daa wøørø døc cøøn na bëëde; 'ba ennø, Wuuö Jwøk wöt marï amäne.»

¹² 'Ba Beelam aköö jï Balak, «Kaa acaana jï jiyï moa jääŋŋï baŋa na bëëde, ni kööa,

¹³ ni ‹Këël Balak doo cïpa øde bäre mo päŋ ki warkey ki gwel-bïrö jïra cøøn, bäŋ gïn mo raac wala mo beer mo daa tïïö ki wïïa keera ni kaala ciik Wuuö Jwøk; ni gïno caan Wuuö Jwøki beeye gïno caana.›

¹⁴ 'Ba ennø, a døøa baŋ jø powa. Ööï, nee gïno tïïc jøøi dëët jiy moï ki yïth nïne moo ööi caana jïrï.»

Ŋweer Dwør Jwøk Mana Køp Beelammi

¹⁵ Køøre Beelam aput tägö ki man køp dwør Jwøk, ni kööe, na «A caana dwør Jwøk, a na Beelam o Beeyör, naa cäänö ni aana dhaanhø mo nyeŋŋe ojabø.

¹⁶ Aani, a caana dwør Jwøk ni aana ŋat wø wïny luup mo Jwøk, ni ŋäc leec wï Jwøa Dwøŋ ni en Maal, ni aana ŋat wø neen mar Jwøa en teeki cere, ni neena gø ni pädha, ni nyeŋŋa yaa jabø.

¹⁷ «Ŋato ööi anø jooda, 'ba öönynye patha ennø; ni eni nëënö jïra, 'ba kare ba cään. Nyeya othïïŋ ri jø Icriel, ni caala cëërö mo pøn ri jic Jeekap; ni ö eni ni gøøc jø Möap ki kare bäre, ni dïïr wïthge, ge na näk jø okiera.

¹⁸ Jø Ëdöm ni wø bëëdö Cëër, ni beege nyïïmän moe, odïïme ni tïmge ni ena cere; 'ba jø Icriel teek marge okadhi.

¹⁹ Eni noo thïïŋ ri jic Jeekap obëëdö na kwäärö, ni raany jøøa näk odööŋ yïth päänye mo nyïïmänge bëët.»

Dwør Jwøk Mana Køp Beelammi Na Aŋuudi

²⁰ Køøre Beelam jø Amalëk aneene ki ya acaara mare, ni täge ki man køp dwør Jwøk, ni kööe, ni «Jø Amalëk beege wï jur mana kwøŋ leny ki jø Icriel, 'ba noo tïme na aŋuudi geno raanynyi.»

²¹ Køøre Beelam jø Këën aneene ki ya acaara mare, ni täge ki man køp dwør Jwøk, ni kööe, ni «Kar bëëtö maru bëëdö ni teek kaamar øt wenyø mo ogeer wï kïdi,

²² 'ba u na jø Këën, uuno raanynyi, kanyo ö jø Acörri noo makge uuni ki tøŋ.»

²³ Ni cäŋ Beelammi tägö ki man køp dwør Jwøk, ni kööe, «?Wui, aŋa noo maar bëëtö kanyo ö Jwøki noo tïïc gïnögø?

²⁴ 'Ba da jiy mo öö ki yïth baabuure ni ge käla Kitim, ni caarge jø Acör ki jø Eber. 'Ba geno ränynyi thuwø.»

²⁵ Køøre Beelam aö maal ni døø kanya bëëde yie, ni ö Balaki thuwø ni aae ki øtjööre.