Kwään Jiy 19 - Wëël Jwøk

Jöö Man Wø Døøc Dhaanhø Mo Waany Ki Gø

¹ Køøre Wuuö Jwøk acäänö ki Modhe ka Aran, ni kööe,

² ni «Ciik man caana, a na Wuuö Jwøk, beeye en; caanï jï jø Icriel nee känge jïrï ki dhieŋ ma nyakøø mo kwaar mo bäŋ gïn mo ogwäyö ree ni poot bäŋ jaath puur mo orïï ŋute.

³ Ni cïpu dherøgø jï Eliedhar na näk dïlämi, ni kïthi wøk ŋää twïër ni ŋaali nyïme kaace.

⁴ Køøre Eliedhar na näk dïlämi olwöti ki remø ki lweete ni ker gø kwöre abïriiø løøa näk dïët ki dho oduŋkaany røømmø.

⁵ Ni ö dherøgø ni waaŋi nyïm Eliedhar; ni waaŋŋa pïëne ki rïŋŋe ki remme ki weenynye moe bëët.

⁶ Ni ö dïlämi ni lwöte ki thääŋ jaadha cwøl ni cïta, ki jaadha cwøl ni icöp, ka abïï mo kwaar, ni leeŋ ge dï maac bäät dherøgø ni waaŋ enø.

⁷ Køøre dïlämi abïïge openye ni lwøk dëëre ki pïï. Køør manøgønø, eni doo døøa twïër. 'Ba eno bëëdö ni ba waany këël mano päth cäŋŋi.

⁸ Ni ö ŋata waaŋ dherøgø ni peny abïïge thuwø, ni lwøk dëëre, ni bëëde ni ba waany këël mano päth cäŋŋi.

⁹ «Køøre dhaanhø mo waany, bur dherøgø ocooŋ kanya ciel ni kïth gø ŋää twïër kany mo beer mo ena kur keere. Ni ö burri manøgøøni ni kani kiper lwaa Icriel, nee pïï wø døøc dhaanhø mo waany jiiŋŋi ki gø, ni beeye gïn wø døøc dhaanhø mo waany kiper raay.

¹⁰ Ni ö ŋata cooŋ bur dherøgø ni peny abïïge, ni bëëde ni ba waany këël mano päth cäŋŋi. 'Ba gïnögø obëëdö na ciik cooth jï jø Icriel ki jï juurre mo wø bëëdö ki geni.

¹¹ «Ŋato wäro gut dhaanhø mo othøw bëëdö ki nïne abïriiø ni ba waany, kiper mana jït dëëre ki läbö.

¹² 'Ba noo tïme na ri dää nïne ki ri bïriet nïne, dëëre odøøc mo waany ki pïïo døøc dhaanhø mo waany. Køøre eno put tïmö ni waany. 'Ba ni näk dëëre käre døøc mo waany ki ri dää nïne ki bïriet nïne, dëëre ba tïmö ni waany.

¹³ 'Ba ŋat wäro gut dhaanhø mo othøw, ni ba døøc dëëre mo waany, eni raanynya oduŋkaara na näk kar bëëtö mara, a na Wuuö Jwøk. 'Ba eni wär tïme ni tøør dï jø Icriel, ni put bëëtö ni dëëre ba waany, kiper pïïo døøc dëër dhaanhø mo waany kär jør dëëre, ni ö ränynyö mare ni dööŋe bääte.

¹⁴ «'Ba man beeye ciik kiper kany wø näk da dhaanhø mo othøw yo oduŋkaara man wø bëët jiyi yie. Jøw oen yo oduŋkaara, ki jøw oduny yie, obëëdö ni dëëtge ba waany ki nïne abïriiø.

¹⁵ Ni ö jammi bëët moa näk wïthge ŋaam na näk kär uumö ni tïmge ni ba waany.

¹⁶ «Ŋat wäro gut dhaanhø mo onääö wala mo othøw keere yi pwöla, wala ŋat wäro gut cöön dhaanhø mo othøw, wala eni guta bwörö, obëëdö ni dëëre ba waany ki nïne abïriiø.

¹⁷ «'Ba kiper nee ŋata näk dëëre ba waany dëëre døøc mo waany, bur dhieŋ mana waaŋ kiper raay, nee dëët jiy døøc mo waany, doo kïtha yi dak ni kieri ki pï naam.

¹⁸ Ni ö ŋat mo dëëre waany ni lwør jaadha cwøl ni icöp, ni cøt gø yi pïïögø ni jør gø bäät oduŋkaanynya thøw dhaanhe yie, ki bäät jammi moa en yie bëët, ki dëët jiy bëët moa en kaace. Këël dhaanhø mo da cöö mo ee gudö, wala guta dhaanhø mo onääö, wala dhaanhø mo thøwa e keere, wala bwörö, ŋatøgø dëëre doo jørø ki pïïögø thuwø.

¹⁹ Køøre ŋata dëëre waany enø, pïïögø ojør bäät ŋata näk dëëre ba waany ki ri dää nïne ki ri bïriet nïne, ni døøc dëër gø mo waany ri bïriet nïne. Ni ö ŋata dëëre døøc mo waany ni peny abïïge ni lwøk dëëre ki pïï, ni tïm dëëre ni waany kanyo päth cäŋŋi.

²⁰ «'Ba ŋata näk dëëre ba waany na näk dëëre käre døøc mo waany, wär tïme ni tøør dï lwaa Icriel, kiper mana raany oduŋkaara mana näk kar bëëtö mara, a na Wuuö Jwøk; ni ö ŋatøgø ni put bëëtö ni dëëre ba waany, kiper pïï mo wø døøc dëër dhaanhø mo waany kär jør dëëre.

²¹ Køøre gïnögø oput bëëtö na ciik kiper jø Icriel cooth. «'Ba ŋatøgø na jør pïï mo wø døøc dëër dhaanhø mo waany enø, abïïge openye. Ni ö ŋat wø gut pïïögø jaak ni bëëde ni dëëre ba waany këël kanyo päth cäŋŋi.

²² 'Ba gïno gut ŋata näk dëëre ba waany otïmö ni ba waany, ni ö ŋato gut gïnöce ni tïm dëëre ni ba waany thuwø këël kanyo päth cäŋŋi.»