Kwään Jiy 13 - Wëël Jwøk

Kanya Jäägö Ki Jiy Mo Liew Ŋööm Keenan

¹ Køøre Wuuö Jwøk acäänö ki Modhe ni kööe,

² ni «Jäägï ki jiy mo liew ŋööm Keenan, ni beeye ŋöömmo cïba jï jø Icriel. Wär ge jääŋŋï na dhaanhø aciel ma dïbwödhi ri jø tuuŋ man nø røk wïth tuŋi mo jø Icriel.»

³ Køøre Modhe jøøgø ajääŋŋe ki dï paap Paran ki køør mana köömmi ya Wuuö Jwøki, ni jøøgø bëët gena dïbwöthe mo jø Icriel.

⁴ Ni nyeŋge beege ii; ki røk jø tuuŋ Ruben beeye Cimia o Dhakur;

⁵ ki røk jø tuuŋ Cimien beeye Capath o Ori;

⁶ ki røk jø tuuŋ Juuda beeye Kalëp o Jöpöni;

⁷ ki røk jø tuuŋ Icakar beeye Igal o Jocep;

⁸ ki røk jø tuuŋ Ipariem beeye Awcë o Nun;

⁹ ki røk jø tuuŋ Benjamen beeye Palti o Rapu;

¹⁰ ki røk jø tuuŋ Dhebulan beeye Gadiel o Cödi;

¹¹ ki røk jø tuuŋ Jocep mana käl ri jø tuuŋ Maneeca beeye Gadi o Cuci;

¹² ki røk jø tuuŋ Daan beeye Amiel o Gemali;

¹³ ki røk jø tuuŋ Acer beeye Cethur o Mikaël;

¹⁴ ki røk jø tuuŋ Naptali beeye Nabi o Yabi;

¹⁵ ki røk jø tuuŋ Gaat beeye Guwel o Maki.

¹⁶ Moøgø beege nyeŋ jøøa jääŋ Modhe wøk kuna liewge ŋøøm. 'Ba Modhe nyeŋ Awcë o Nun acwøle ni Jøcua.

¹⁷ Kanya ö Modhe na jääŋ jøøgø nee ŋööm Keenan liewge, ena köö jïge, ni «Cou këël mano pïïyu kanya cwøl ni Nëgëp, ni pööthu mïëya en bäät kïte,

¹⁸ ni neennu ŋöömö ki bëëtö mare, man näk nyïëdi, ni neennu bëët jiy thuwø moa näk bëëdö yie, ki man näk ge teek wala ge jägö, wala ge thööth wala ge nøk.

¹⁹ Ni neennu ŋöömö man bëëtge yie ice, ki man näk mo beer wala raac, wala ge bëëdö yïth mïëri mo ena yi pwöla, wala mo ocielø ki kiiri.

²⁰ Ni neennu ŋöömö ki man näk caammi ciek yie wala ba ciek, wala ki man näk da jenni mo otuy yie wala bäŋgø. Uuni, magu rou, ni kännu ki nyïïjenni mo wø cam ki yi ŋöömmögø.» 'Ba kar kaaca beeye kany wø ciek nyïïomøki moa dïkwøŋ.

²¹ Køøre gena aay ni ge liewa ŋöömö, ni täkge ka dï paap Dhïn këël mana këët Reeyöp na en buut Libö-Amath.

²² 'Ba gena aay ni ge cøra Nëgëp, ni pïïcge Keeprön, paana bëët nyïïkwaac Anaki yie, ni beege Akimen ki Cëëci ki Thalmay. 'Ba kar kaaca, Keeprön onø geer ni cwiiye abïriiø kanya poode ni paana cwøl ni Dhöän poot kär geerø Ijep.

²³ Køøre dïlëëwe apïï yi gool mana cwøl ni Ëcköl, ni ŋutge ki bat jaath omøk mo dëëre da nyïëdi ma jwala aciel, ni lïërge gø ka athøra ni bielli ya jiyi ariiø. Ni kuunge thuwø ki nyïïjenni mo caala nyïïadikwäle, ki nyïïolämmi.

²⁴ Ni put nyeŋ kaace cwøl ni Goor Ëcköl, kiper beeye kanya ö jø Icrielli na ŋøtge jwala mar nyïïjenni yie.

Luubö Mana Caan Dïlëëwe Kanya Duuge

²⁵ 'Ba na tïme na køør nïne ma pïëraŋween, dïlëëwe aduuö ki kuna liewge piny.

²⁶ Ni pïïcge baŋ Modhe ka Aran ki lwaa jø Icriel bäre kany mo cwøl ni Kadëc dï paap Paran; ni caange luup bëët jïge ki jï lwaak bäre, ni nyoothge nyïïjenni moa kälge ki yi ŋöömmöca.

²⁷ Ni köge jï Modhe, ni «Waana pïï yi ŋöömma jääŋŋï wa yie; 'ba beeye ŋöömö mo caak ki maar kïc päl yie møn, ni moi beege nyïëdi moa jootwa yie.

²⁸ 'Ba jiy moø ni bëëdö yie yøøke beege jiy mo teek, ni päänye moøke døøŋŋø døc no ogeerø ni teek, ni jootwa nyïïkwaac Anak kaace thuwø.

²⁹ 'Ba jø Amalëk ge bëëdö Nëgëp, ni ö jø Këth ki jø Jeebuc ki jø Amör ni bëëtge mïëya en bäät kïte, ni ö jø Keenan ni bëëtge deŋ naama dwøŋ ki deŋ Naam Jördan.»

³⁰ 'Ba Kalëp jiy ajwøe nyïm Modhe, ni kööe, «Ööø maal ennø, nee paanøgø lwørø, kiper løny jïïø ki man böötø geni.»

³¹ 'Ba jøøa aay ki eni aköö, ni «Ba løny jïïø ki man cøøø baŋ jøøke, kiper teeka geni døc ki øøni.»

³² Ni ö jøøgø ni putge waac mo reyø køp jï jø Icriel kiper ŋöömma liewge, ni köge, ni «Ŋöömma ciwa yie kuna liewa gø beeye ŋöömö mo dïdö ki wïth jiy mo wø bëëdö yie. Ni jiy moa jootwa yie bëët beege jiy mo bäyö mo dëëtge døøŋŋø.

³³ Ni jootwa jø Nëpilim thuwø kaace, na käl nyïïkwaac Anak rege. Ni neenwa rewa kaamar adïtwie, ni nëën wa thuwø na enønø ki baŋge.»