Kwään Jiy 12 - Wëël Jwøk

Kanya Ö Mariyam Ka Aran Na Waacge Nyeŋ Modhe

¹ 'Ba kar kanyøgø, Mariyam ka Aran nyeŋ Modhe awaacge kiper cïïe mana nywøme na näk nyi jø Kuuc, kiper cïïe mana nywøme beeye dhaagø mo käla ri jø Kuuc.

² Ni köge, na «?Aŋø, Wuuö Jwøk cäänö ki ri Modhe keere? ?Eni kär cäänö ki rewa thuwø?» Køøre gïnögø awïny Wuuö Jwøki.

³ 'Ba Modhe beeye dhaanhø mo mwöl døc, ni mööl mare kaala mar jiy bëët moa en bäät piny.

⁴ Ni put Wuuö Jwøki köö jï Modhe ka Aran ki Mariyam, ni «Ööu wøk karu dääi ni ööu nyïm oduŋkaany røømmø.» Ni putge ö wøk karge dääi.

⁵ Køøre Wuuö Jwøk aö piny ni ena yi pöölla näk ree ee wenyø, ni cuŋŋe dho oduŋkaara, ni cwøl Aran ki Mariyam, ni öge nyïm karge riedi.

⁶ Ni kö Wuuö Jwøki, ni «Wïnynyu luupa ii. Kany wø näk da nyikuŋ Jwøk dïïu, a na Wuuö Jwøk raa wø nyoodha nyoodhø jïre ki ri lääk, ni cääna ki eni ki yïth lääk.

⁷ 'Ba a ba cäänö ki dhaanhnha ma Modhe na enøgønø, kiper beeye eni no oŋäädhö dï paara bäre.

⁸ A cäänö ki eni ni løøŋwa dhøkwa ki gøøni, naa caana luubö mo tiere nëënö, ni paa aŋaade; ni ö eni ni raŋ kïta, a na Wuuö Jwøk. ?Aperŋø nø na käru lwäyö ki man waayu nyeŋ dhaanhnha ma Modhe?»

⁹ Køøre Wuuö Jwøk awëër ki geni døc, ni paany ree buutge.

¹⁰ 'Ba kanya ö pööle na paany ree bäät oduŋkaara, Mariyam ajoot ni dëëre da dhøøbø, ni ö dëëre ni neepwøth ni tar. Ni ö Aranni ni lwiith Mariyam ni joot gø ni dëëre da dhøøbø;

¹¹ ni kööe jï Modhe, «Wui Kwäärö, kär wa jäälï, kiper gïna tïïcwa, tïïcwa ni wïthwa kärwa caarø; 'ba waana bääyö.

¹² Kär Maryam tïïyï ni caala nyilaal mo nywöli no othøw, mo dëëre olööthö kanyo ö wøk ki yi menni.»

¹³ Køøre Modhe ajwöŋö dëër Wuuö Jwøk, ni kööe, na «A kwaya ïïni, Awuuö Jwøk, dwøk dëëre kare.»

¹⁴ 'Ba Wuuö Jwøk aköö jï Modhe, na «?Aŋø, doo naa wänni oŋuut täärnyïm gø ki laaw jaak, eni wïïe bäŋa doo lääö ki nïne abïriiø? Kïthu eni wøk ŋää twïër, nee bëëde kaace ki nïne abïriiø; køør manøgønø, løny ki man cäŋi duu twïër.»

¹⁵ Køøre Mariyam abëëdö wøk ŋää twïër ki nïne abïriiø, ni ö jiyi ni kärge tïŋŋö këël mana duu Mariyammi twïër.

¹⁶ 'Ba køøre jiy atïŋŋö ki Adhëëröth, ni tïïge ki twïër dï paap Paran.