Kwään Jiy 10 - Wëël Jwøk

Jöör Kooth Mar Tuŋi Moa No Otïïö Ki Gwel-Bïrö

¹ Køøre Wuuö Jwøk acäänö ki Modhe, ni kööe,

² ni «Thädhï ki tuŋi ariiø ma gwel-bïrö kiper nee tïmge na gïï wø cwølï lwaak ki ge, nee tïmge na nyuuthe kiper daak twïër thuwø.

³ Ni kany wäro kooth tuŋi karge riedi, lwaak bäre rege dige cooŋa buutï deŋ dho oduŋkaany røømmø.

⁴ Ni näk mo kootha aciel keere, dïbwöthe moa näk wïth lwaae mo wïth tuŋi mo Icriel rege dige cooŋa buutï.

⁵ 'Ba kany wäro koothu tuŋi døc ni döötge ena maal, twëëre moa en løø oduŋkaara jï løø kur tuul-cäŋ doo tïŋŋö.

⁶ Ni kany wäro cäŋu tuŋi koothø ri rietge, twëëre moa en jï løø tier-piny ko oduŋkaara doo tïŋŋö. 'Ba kany wäro tïmge ni ge tïŋŋö, tuŋi doo koodhø.

⁷ Ni kany wäro tïme ni cooŋa lwaak kanya ciel, tuŋi wär koothu; 'ba kär koothu døc ni döötge ena maal.

⁸ «'Ba wäät Aran na näk dïlämme beege na doo kooth tuŋi. Gïnögø otïmö na ciik jïïu cooth ki yïth beenhnhe mou bëët.

⁹ 'Ba kany wäro cou baŋ leny nou këëdu ki nyïïmännu mo wø many uuni nou dïïmge yi ŋöömmu, tuŋi doo koodhø ni di layø, kiper nee Wuuö Jwøk na näk Jwøu wïïe pare ki uuni, ni piem uuni ceŋ nyïïmännu.

¹⁰ Kany wäro tïme na cääŋŋe mo met ec mou, ni beege nïr ajwöm moa no ocaanø jïïu, ki nïr wø päär dwääyi yïthge cooth, tuŋi dou koodhø bäät olämme mou mo wø waaŋ bäre, ki bäät olämme mo wø duunni ki mëër; nee tuŋi moøgø tïmge na gïï parru wïthu ki ge nyïm Jwøu. Beeye a na Wuuö Jwøk na näk Jwøu.»

Kanya Tïŋ Jø Icrielli Ki Dï Paap Caynay

¹¹ 'Ba kanya tïm nïne mo riet dwäde na pïërariiø, ri riet cwiiri, pöölö atïŋ maal ki bäät oduŋkaany wø nyooth luumma tuut Jwøki ki jiy.

¹² Ni ö jø Icrielli ni tïŋge ki dï paap Caynay, ni putge wääth ki wäädhi moa caathge. Ni ö pöölö ni cuŋŋe ni ena bäät paap Paran.

¹³ 'Ba man beeye wääth mana dïkwøŋ na tïŋge ki køør mana ö Wuuö Jwøki na kööm Modhe.

¹⁴ 'Ba lwaa leny mar jø tuuŋ Juuda akwøŋ tïŋŋö ki køør bëëra mar twïër marge, ni dïbwödhi marge beeye Nacøn wär Aminadap.

¹⁵ Ni dïbwödhi mar lwaa leny mar jø tuuŋ Icakar beeye Natanel o Dhuar.

¹⁶ Ni dïbwödhi mar lwaa leny mar jø tuuŋ Dhebulan beeye Eliap o Këëlön.

¹⁷ 'Ba kanya puth oduŋkaara wøk, jøøa käär oduŋkaara, ni beege nyïïkwaac Gërcön ki nyïïkwaac Mërari, gena tïŋŋö.

¹⁸ Køøre lwaa leny mar jø tuuŋ Ruben atïŋŋö ki køør bëëra mar twïër marge, ni dïbwödhi marge beeye Elicuur o Cediyör.

¹⁹ Ni dïbwödhi mar lwaa leny mar jø tuuŋ Cimien beeye Celumiel o Curicaday.

²⁰ Ni dïbwödhi mar lwaa leny mar jø tuuŋ Gaat beeye Eliacap o Deeweel.

²¹ Køøre nyïïkwaac Kät atïŋŋö ni ge käära japa en kur keerge; 'ba oduŋkaara agur piny kanya poode ni ge poot kär pïïy.

²² Køøre lwaa leny mar jø tuuŋ Ipariem atïŋŋö ki køør bëëra mar twïër marge, ni dïbwödhi marge beeye Elicama wär Ammiyut.

²³ Ni dïbwödhi mar lwaa leny mar jø tuuŋ Maneeca beeye Gameeliel o Pedacur.

²⁴ Ni dïbwödhi mar lwaa leny mar jø tuuŋ Benjamen beeye Abidan o Gidiöni.

²⁵ Køøre lwaa leny mar jø tuuŋ Daan atïŋŋö na aŋuudi køør lwaae bëët, ni ge cäädhi ki køør bëëra mar twïër marge, ni dïbwödhi marge beeye Akiedhar wär Amicaday.

²⁶ Ni dïbwödhi mar lwaa leny mar jø tuuŋ Acer beeye Pagiel wär Okaran.

²⁷ Ni dïbwödhi mar lwaa leny mar jø tuuŋ Naptali beeye Akira wär Enan.

²⁸ Manøgø beeye jöör wääth mana cääth jø Icrielli ki gøøni kanya tïŋge ki køør lwaae moge.

²⁹ Køøre Modhe acäänö ko Obap o Raguël nyï Midien; 'ba Raguël beeye wää cï Modhe. Ni kö Modhe jï gø, ni «Wa tïŋŋö ennø ni wa cøøa kanya kö Wuuö Jwøki ni di cïbö jïwa. Ennø, ø aa na aciel, niï jïtï ki bëëtö mo beer buutwa, kiper Wuuö Jwøk jø Icriel ee buŋŋö ki gïn mo beer.»

³⁰ Ni løgi ya Obapi jï Modhe, na «A ba ci; a døøa powa baŋ tuuŋwa.»

³¹ 'Ba Modhe aköö, na «A kwaya ïïni, kär wa weyï, kiper kwör wäro pïïwa piny yïthge dï paap ŋäyï, kiper ï tïmö ni ïïna waŋ jïwa.

³² 'Ba ni näk miï aay ki waani, gïn wäro beer noo tïïc Wuuö Jwøki jïwa, tïïcwa tïïö jïrï thuwø.»

³³ Køøre jø Icriel atïŋŋö ki bäät Kïn Wuuö Jwøk, ni cääthge ki nïne adäk. 'Ba ki yïth nïrögø na adäk yøø, acanduk man wø nyooth luumma tuut Wuuö Jwøki ki jiy wø cäädhö nyïmge, kiper nee kany wø pïge piny yie joot ki køøre.

³⁴ Ni ö pöölö mar Wuuö Jwøk ni en bäätge ki waŋcäŋ, kany wø näk ge tïŋŋö yi twïër.

³⁵ 'Ba kany wø näk ma acanduk tïŋŋö, Modhe wø köö, «Wui Wuuö Jwøk, ö maal, ni wëëgï nyïïmännï keethø, ni tïïyï jø wø män ki ïïni nee bwøkge nyïmï.»

³⁶ 'Ba kany wø cuŋŋe yie, eni wø köö, «Awuuö Jwøk, duu baŋ jø Icriel moa näk kum kum.»