Kwään Jiy 1 - Wëël Jwøk

Kanya Kwaan Jø Icriel Moa Näk Løny Jïge Ki Man Cige Baŋ Leny

¹ 'Ba na tïme na ri riet cwiiri moa ö jø Icrielli wøk ki Ijep, dïcäŋ mana dïkwøŋ ri riet dwäde, Wuuö Jwøk acäänö ki Modhe dï paap Caynay yo oduŋkaany røømmø, ni kööe,

² ni «Kwaannu jø Icriel moa näk cwøw bëët, ki køør tuŋi moge, ki køør dhøk uudi moge, ni gööru nyeŋge piny na aciel aciel.

³ Ïïni ka Aran, jøøgø bëët wär kwaannu na lwaae, ni beege cwøw mo Icriel moa näk cwiiri moge tägi ka pïërariiø këël mo kaala pïërariiø, moa näk løny jïge ki man cige baŋ leny.

⁴ 'Ba wär näk da dhaanhø mo käla yi tuuŋ man nø mo tïïö ka uuni, ni ŋati man nø røk jøøgø wär näk mo ŋata dwøŋŋa eni dhi øt wänni.

⁵ 'Ba nyeŋ jøøgøøni beege ii: «Ki røk jø tuuŋ Ruben beeye Elicuur o Cediyör;

⁶ «ki røk jø tuuŋ Cimien beeye Celumiel o Curicaday;

⁷ «ki røk jø tuuŋ Juuda beeye Nacøn wär Aminadap;

⁸ «ki røk jø tuuŋ Icakar beeye Natanel o Dhuar;

⁹ «ki røk jø tuuŋ Dhebulan beeye Eliap o Këëlön;

¹⁰ «ki røk wäät Jocep, ki røk jø tuuŋ Ipariem beeye Elicama wär Ammiyut, ni ki røk jø tuuŋ Maneeca beeye Gameeliel o Pedacur;

¹¹ «ki røk jø tuuŋ Benjamen beeye Abidan o Gidiöni;

¹² «ki røk jø tuuŋ Daan beeye Akiedhar wär Amicaday;

¹³ «ki røk jø tuuŋ Acer beeye Pagiel wär Okaran;

¹⁴ «ki røk jø tuuŋ Gaat beeye Eliacap o Deeweel;

¹⁵ «ki røk jø tuuŋ Naptali beeye Akira wär Enan.»

¹⁶ Jøøgø beege jiy moa jier røk jø Icriel, ni gena dïbwöthe mo dhøk uut kwäcge, ni gena wïth lwaae mo jø Icriel.

¹⁷ Køøre Modhe ka Aran jøøa nyeŋge cwøl yøø acwølge,

¹⁸ ni cooŋge lwaak bäre kanya ciel ri cäŋ mana dïkwøŋ ri riet dwäde. Ni ö lwaaki bäre ni køpge røkge ki køør tuŋi moge ki dhøk uut wëëkge, ni göör nyeŋ cwøw piny na aciel aciel moa näk cwiiri moge tägi ka pïërariiø këël mo kaala pïërariiø,

¹⁹ ni tïïcge gïnögø na kare kaawat mana ö Wuuö Jwøki na kööm Modhe. Manøgø beeye kanya ö Modhe na kwaan jiy dï paap Caynay.

²⁰ Ki røk nyïïkwaac Ruben na näk kany Icriel: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

²¹ Cwøw moa kwaan ri tuuŋ Ruben beege jiy ma kume ma pïëraŋween ka abïciel ki dïpe abïïc.

²² Ki røk nyïïkwaac Cimien: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

²³ Cwøw moa kwaan ri jø tuuŋ Cimien beege jiy ma kume ma pïërabïïc ka abïŋween ki dïpe adäk.

²⁴ Ki røk nyïïkwaac Gaat: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

²⁵ Cwøw moa kwaan ri jø tuuŋ Gaat beege jiy ma kume ma pïëraŋween kurbïïc ki dïpe abïciel ki pïërabïïc.

²⁶ Ki røk nyïïkwaac Juuda: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

²⁷ Cwøw moa kwaan ri jø tuuŋ Juuda beege jiy ma kume ma pïërabïriiø kurŋween ki dïpe abïciel.

²⁸ Ki røk nyïïkwaac Icakar: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

²⁹ Cwøw moa kwaan ri jø tuuŋ Icakar beege jiy ma kume ma pïërabïïc kurŋween ki dïpe aŋween.

³⁰ Ki røk nyïïkwaac Dhebulan: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

³¹ Cwøw moa kwaan ri jø tuuŋ Dhebulan beege jiy ma kume ma pïërabïïc ka abïriiø ki dïpe aŋween.

³² Ki røk nyïïkwaac Ipariem na käl ri Jocep: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

³³ Cwøw moa kwaan ri jø tuuŋ Ipariem beege jiy ma kume ma pïëraŋween ki dïpe abïïc.

³⁴ Ki røk nyïïkwaac Maneeca na käl ri Jocep: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

³⁵ Cwøw moa kwaan ri jø tuuŋ Maneeca beege jiy ma kume ma pïëradäk kurriiø ki dïpe ariiø.

³⁶ Ki røk nyïïkwaac Benjamen: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

³⁷ Cwøw moa kwaan ri jø tuuŋ Benjamen beege jiy ma kume ma pïëradäk kurbïïc ki dïpe aŋween.

³⁸ Ki røk nyïïkwaac Daan: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

³⁹ Cwøw moa kwaan ri jø tuuŋ Daan beege jiy ma kume ma pïërabïciel kurriiø ki dïpe abïriiø.

⁴⁰ Ki røk nyïïkwaac Acer: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

⁴¹ Cwøw moa kwaan ri jø tuuŋ Acer beege jiy ma kume ma pïëraŋween kurciel ki dïpe abïïc.

⁴² Ki røk nyïïkwaac Naptali: Cwøw bëët moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, nyeŋge agöör piny na aciel aciel ki køør tuŋi moge ki køør dhøk uudi moge.

⁴³ Cwøw moa kwaan ri jø tuuŋ Naptali beege jiy ma kume ma pïërabïïc kurdäk ki dïpe aŋween.

⁴⁴ Jøøgø beege jiy moa näk okwaanø, ni kwäänö Modhe ka Aran ki dïbwöthe moa näk apaar kurriiø mo jø Icriel, ni ŋati man nø rege ööi na kar dhi øt wänni.

⁴⁵ Cwøw bëët mo jø Icriel moa näk cwiicge tägi ka pïërariiø këël mo kaala pïërariiø, moa näk løny jïge ki man cige baŋ leny, akwaan ki køør dhøk uut wëëkge.

⁴⁶ Ni kwäänge bëët beege jiy ma kume ma dïpe abïciel ka adäk ki dïpe abïïc ki pïërabïïc.

Luubö Mana Caan Kiper Jø Tuuŋ Libay Nee Ge Ba Kwaan Røk Jø Leny

⁴⁷ 'Ba jø tuuŋ Libay kär kwaan røk jøøgø.

⁴⁸ Kiper Wuuö Jwøk ocäänö ki Modhe ni kööe,

⁴⁹ ni «Kär jø tuuŋ Libay kwaanï, ni ba rwöpï kwäänge ki jø Icriel møga;

⁵⁰ 'ba jø tuuŋ Libay wär tïïyï na jiy mo oduŋkaany wø nyooth luumma tuut Jwøki ki jiy ki gïïa en yie bëët ena ceŋge. Ni ö oduŋkaara ki gïïa en yie bëët ni tïme ni käära geni, ni tïnyge gø, ni tïïcge twïër marge ni ena lak gø.

⁵¹ Køøre kany wäro tïme na kar wääth, jø tuuŋ Libay oduŋkaara puthge wøk; ni kany wäro tïme na kar pïïn piny, cwöthge piny. 'Ba no näk da dhaanhø mør jaak mo nyänhnha buut oduŋkaara wala manynya tïïc mana en yie nee tïïe, wär eni 'näk.

⁵² 'Ba jø Icriel geno tïïö ki twëëre ki køør lwaae moge, ni ŋati man nø ena ya atut mare tier bëëra marge.

⁵³ 'Ba jø tuuŋ Libay twïër marge otïmö ni ena lak oduŋkaany wø nyooth luumma tuut Jwøki ki jiy, nee bäŋe gïn mo raac mo pïï dëët jø Icriel ki køør wëëc Jwøk; ni ö jø tuuŋ Libay ni koorge oduŋkaany wø nyooth luumma tuut Jwøki ki jiy.»

⁵⁴ Ni ö jø Icrielli ni tïïcge gïïögø bëët kaawat mana ö Wuuö Jwøki na kööm Modhe.