Jööp 7 - Wëël Jwøk

¹ «?Aŋø, bëëtö mar dhaanhø bäät piny kany patha tïïc mo teek keere cøøn? ?Aŋø, nïr kwøw moe ba thööre ka tïïc mo teek kaamar ŋat mo tïïö ka gwel?

² Kaawat man wø bëët dhaanhø ma laŋŋø ni lääŋŋa tïpö, wala ŋat tïïc mo køya gät tïïc mare,

³ aana bëëdö ni da dwäde mo okwaan bääta ni gïna koora bäŋ tiere mo yaa joodø, 'ba beeye kïmmö ki yïth wärre keere na ŋøl bääta.

⁴ 'Ba kany wø nyaaŋŋa dëëra piny, a cädö ni kööa, na ‹?A yi wäne nø noo ööa maal?› 'Ba yi wäär puta tïmö ni bäär, ni puta bëëtö naa løøŋŋa raa jaak këël kanyo ruu øwi.

⁵ Tør bëëdö no omägö rïŋ dëëra bäre, ni jïte ki twöŋi, ni ö atwøti ni nigedheeth, ni bëët tuuti ni muulö jaak.

⁶ Nïr kwøw 'moa atïmö ni läädö døc ni kaala man wø läät cwääy abïï; nïr kwøw 'moa apïï ya aŋuudi ni bäŋ ŋäädhe kipere këët.

⁷ «Wui Jwøk! Par wïïï ki man näk kwøw mara beeye jam dhøk jaak, ni nyeŋŋa bäŋ gïn mo beer mo neenge këët.

⁸ Jiy mo wø raŋ aani a ba cäŋge neennø këët; ïïni, a manynyï manynyø, 'ba a ba jootï këët.

⁹ Kaawat man wø ö pööle wø neebay ni rwäänye, ŋat mo okïth yi bwörö, eni ba cäŋ duu wøk këët.

¹⁰ Eni ba duu paare këët, eno tïmö ni kuc kanya bëëde yie.

¹¹ «Kiper manøgønø, aani a ba lïŋi; aani, a cäänö ni cwïnya opädhö ki pänh cwïny mar jwïëy 'moa, ni dwaalla ni cwïnya okëënynyö.

¹² ?Aŋø, aana naama dwøŋ, wala lääna dwøŋ ni wø bëëdö yi kut, ni bëëdï naa iï määnynyö ki ŋat koor en?

¹³ Kany wø kööa ni pëëm mara cwïnya ocøme, ni ö kar niine mara ni tïïc ŋurö mara ni jööt,

¹⁴ a putï ka wëëk bwøk ki lääk mo teek, ni wëëgï aani lwär ki gïï wø neen ki yi wïc.

¹⁵ Kiper manøgønø, jwïëy 'moa, møt-dëël pute ka par, ni theemma thøø ki bëët dëël mara man.

¹⁶ Aani, aana männö ki bëët kwøw mara, naa ba many bëëtö naa kwøw këët. Beerra man wec aani keera, kiper nïr kwøw 'moa caala jam dhøk.

¹⁷ «?Aperŋø ni bëët dhaanhe en ni kare iï tïïö ni dwøŋ ki baŋï, ï na Jwøk, ni bëëdï niï lääŋŋa gø en,

¹⁸ ni eni raŋŋï raŋŋø ka amöölla cooth, niï bëëdö niï päänynya gø cooth?

¹⁹ ?Aŋø ni ba løøï waŋï wøk bääta en, wala ki man weyï aani ki nyi kany mo caala mwøny laaw?

²⁰ ?Aŋø, ni näk mo aano bääyö, agïnaŋø na baaa dëërï, ï na dïkuri mar dhaanhø? ?Aperŋø ni bëëdï ni wïïï iï këël raa en, ni tïma kaamar tëër bäätï?

²¹ ?Aperŋø ni ba weyï gïïa baaa en, ni wëënnï raay 'moa? Kiper ki kany mo cään a buta piny tiet ŋøøm; 'ba ïïni, aano manynyï, 'ba a tïmö naa tøør këët.»