Jööp 6 - Wëël Jwøk

Luup Moa Løk Jööpi

¹ Køøre aløk Jööpi ni kööe,

² ni «Wui, pänh cwïny mara na dii rømø møn no okïth bäät gïr røm no odwalø ki gïïa leth moa tägö dëëra bëët,

³ peek marge doo tïmö ni kaala akwöö mo näpa døøŋŋø, ni beeye tiere ni bëëda ni dhaa cara dhwöle naa ba cädö na wøp en.

⁴ Kiper athëëre mo Jwøk na en teeki jïre atïmö ni cööba aani, ni ö cïmmi marge ni ci dëëra. Gïna leth na kïth Jwøki bääta caala jø leny mo cööba aani.

⁵ ?Aŋø, løny jï arëën paap ki man jwöŋe ki käc ni da luum jïre? ?Wala løny jï dhieŋ ki man jwöŋe ni jïre da cam?

⁶ ?Aŋø, cam mo bäth jaak di camø ni bäŋ acäbö ree? ?Wala løø tøŋ-gwienø mana tar wø jwør dhøki jwørø ni met?

⁷ Aani teeŋ caammi moøgø a kweer ki man guda ge; gena caammi maa män ki ge.

⁸ «Wui, gïna pëënynya thur kare wäne nø, nee gïna manynya cïp Jwøki jïra,

⁹ nee jïëe ki man 'näk aani, ni ö eni ni wëëk cere leeŋ bääta ni thøøa!

¹⁰ 'Ba gïn mo poot cïpa cøm-cwïny jïra, këël ni bëëda naa ena yïth gïï mo leth døc en, aani, a kär kweer ki luup Jwøa en kur keere.

¹¹ «?Aŋø, teek mara nyïëdi røk nø, mo doo løny jïra ki man kura? ?Aŋuun bëëtö mara en kaa këët nø, mo doo løny ki man maa cwïnya?

¹² ?Aŋø, dëëra teek kaamar kïdi, ni rïŋ dëëra caala nywïënyö ma jwïël?

¹³ ?Aŋø, da teek jïra mo løny ki man kønya dëëra ki gø këët, ni gïna daa dëëra kønyø ki gø onø käl?

¹⁴ «Ŋat mo kweer ki man nyooth mëër mare jï nyawati mo ena yi gïn mo leth, lwär man lwäärö ki Jwøa en teeki jïre ee wiiø.

¹⁵ 'Ba u na nyïïawäädi 'moa, aana cøøgu kaamar nyeŋ näm mo cøøga jiy, mo kany wø manynyi nee öömmö yïthge ki pïï, ge di cwänö no otal.

¹⁶ Ni beege nyeŋ näm mo pïge rege cwödhö ki køør pey mo oløy yïthge.

¹⁷ Kany wø bëëtge ni bäŋ pïï yïthge, ge bëëdö ni geno nikïïl; ni kany wäro tïme ni piny lïëth, ge dööŋ ni bäŋ gïrpiny yïthge.

¹⁸ Jiy mo wø cäädhi ki bäät athïrööle, kany wø gakge nee ge jïtge ki pïï yïthge, ge tïmö ni marge thääyö dïpaap jaak ni thøwge.

¹⁹ Jø Tëma mo wø cäädhi ki bäät athïrööle gena määnyö, ni ö jøøa öö ki Cïïba ni öge ni ge ŋäätha ge.

²⁰ 'Ba yïthge acwat jaak ni gïna ŋääthge kärge joodø; gena ci yïth nyeŋ näpögø ni tïm gïna ŋääthge ni bäŋ tiere.

²¹ 'Ba ennø, uuna tïmö nou caala nyeŋ näpögø ki jïra; gïn mo di lwäyö ki gø ajootu ni putu lwäyö.

²² ?Aŋø, aana cäänö cøøn na bëëde, ni ‹Cïpu jïra ki gïrpiny, ni mooyu aani røk jammi mou ki muuy man wø cïp ki piny,

²³ ni piemmu aani ceŋ jiy mo wø män ki aani, ni kälu aani wøk ceŋ jiy mo wø caan aani›?

²⁴ «Pwönynyu aani, aano bëëdö ni aano nikïïl, ni ööu ni nyoothu bëëtö mara jïra mana raac.

²⁵ Wui, ateeŋ køny mo nyïëdi ni joot ki køør luup ma adïëri! ?'Ba agïnaŋø na duu cäänö maru?

²⁶ ?U manynya gø nee luubö mana caana tiirru, ni you caarø ni luup mo ŋat mo bääte opädhö bäŋ tietge?

²⁷ Uuni, uuna jiy mo løny ki man tïïu ki gïï mo reyø dëët obwöre moa näk kïïe ki køør ŋïïce mo wø tïïc ki ri kwääk ki baw, ni pïëmmu bäät gät nyïïawäädi mou nou gatha ge na laaŋe.

²⁸ 'Ba ennø, beerra man raŋŋu jïra mø. ?Aŋø, a cäänö ki luup tööt nyïmmu?

²⁹ Ennø, a caana jïïu nee ŋethu wiillu ni bäŋe gïn mo patha kare mo caannu këët. Weyu luupögø nø, kiper bëëtö mara poot bëëdö ni tiir kare.

³⁰ ?Aŋø, aani a ŋäc cäänö ki luup mo patha kare? ?Aŋø, luup mo reyø ba daa ŋiiø a keera?»