Jööp 40 - Wëël Jwøk

¹ Køøre Wuuö Jwøk aköö jï Jööp,

² na «?Aŋø, ŋat wø jook jiy, pïëmö ki Jwøa en teeki jïre? Beerra man ö ŋat wø car luup mo teek dëër Jwøk ni løk pïëc manøgø!»

Luubö Mana Løk Jööpi Jï Wuuö Jwøk

³ Køøre aløk Jööpi jï Wuuö Jwøk ni kööe,

⁴ ni «Aani, aana dhaanhø jaak mo bäŋ kare. ?Olønye jïra nidïï ki man dwöga baŋï ki luubö? Aani dhaa miia miiø ki cera.

⁵ Aani, aana nø cäännö yie aciel, 'ba a ba cäänni këët; këël na nø cääna ki luup mo thööth, bäŋ luubö mør mo caana këët.»

Luup Moa Løk Jwøki Jï Jööp

⁶ Køøre Wuuö Jwøk Jööp acäänne ki ya atuunna, ni kööe,

⁷ ni «Jek riï kaawat man wø tïïc dïcwøø; aani ï pëënynya pëënynyö nee løgï jïra.

⁸ «?Aŋø, ï köö møn ni luup mo wø ŋøla patha adïëri? ?Aŋø, a jällï jällö ni aano bääyö ni keda beerra marï keere?

⁹ ?Aŋø, cerï teek ni caala mar Jwøk? ?A ïïni, ï määr ki dwøl mo caala mare?

¹⁰ Ïïni, runy dëërï ka ajiem ki dööŋ-kar, ni rïëpï riï ki wödö ki teek.

¹¹ Køny wëër marï wøk kaamar naam mo kwödö døc, ni raŋŋï jøøgø bëët ni töödö yøø ni wëëgï ge lään wïc.

¹² Jøøgø bëët ni töödö yøø raŋŋï ni dwøgï wïthge piny; ni ö jø wø tïïc gïï mo reyø ni raanynyï geni kwör wø bëëtge yïthge.

¹³ Koony geni yïth ŋøøm ge bëët; ni cïëgï geni yïth bwör.

¹⁴ Køøre aani ki dëëra a öö ni caana gø jïrï ki man näk mo riï piemï piemø ki cer cwïïï na teek.

¹⁵ «Raŋ lään wø caal ray, na näk yaa cwääö kaawat marï, ni wø bëëdö ni cama luum kaamar dhieŋ.

¹⁶ Raŋï mø, eni teek mare ena røk läär mo piere, ni läär mo bäp yie teek døc.

¹⁷ Eni jïbe cuŋŋö ni teek kaamar jaath, ni läär mo tiete otïïö ni teek døc.

¹⁸ Ni cuu moe caala nywïënyö mana näk jwïël, ni tiete teek kaamar athøc nywïëny.

¹⁹ Ni cwääc mana cwääy ki gø, ec di thääŋö ni kaala lääy bëët moa cwääc Jwøki; 'ba beeye Jwøk na cwääc gø keere noo bööt gø.

²⁰ Eni cam mare joode bäät thuuri, kany wø kwääk lääyi yie bëët mo paap.

²¹ Ni eni wø buuta tier abøw, ni ree wø kane yo otöök.

²² Eni ree wø kane tier tïpö mar abøw, ni eni bëëdö no ociel ageeta dïër.

²³ 'Ba kany wø pänh naammi ki bääte, eni ba lwäyi; eni bëëdö kare ni bäŋ gïn lääŋŋe, këël na bëët Naam Jördanni ni kwöta dhi gø.

²⁴ ?Aŋø, aŋa ni løny jïre ki man mak gø kany wø näk mo eni rääŋö, wala bïtha gø ni gän gø ki um gø?»