Jööp 39 - Wëël Jwøk

¹ «?Aŋø, da gïn mo ŋäyï kiper kany wø ö adëëlli wø nywølge? ?Aŋø, løny jïrï ki man raŋï aŋer kany wø nywøle ki nyïïe?

² ?Aŋø, løny jïrï ki man kwarï dwäde marge këël kany wø pïïcge ri lwaar marge? ?Aŋø, da gïn mo ŋäyï kiper caae mo lwaar moge?

³ Geni cøŋge wø këëlge piny ni nywølge nyïïge, ni put mäc lwaarri nijwöm dëëtge.

⁴ Dëët nyïïge døøŋŋø ni putge tïmö ni teek dïpaap, ni putge aay ni ge ba duu baŋ mëëkge.

⁵ «?Aŋø, aŋa na tïïc arëëni mo paap nee bëëtge ki wïthge? ?Na aŋa na tïïc ge nee bëëtge ni geno pädö?

⁶ Geni, paap acïba jïge na kar bëëtö marge, ni tïm kar bëëtö marge ni bee yi ŋöömma näk bäŋ gïn tuy yie.

⁷ Ge ŋeethø bäät pääny kiper okiera man wø tägi yie, ni bäŋ dwør ŋat mo kwør geni mo wïnyge.

⁸ Geni bäät kïte wø neetge neetø nee jïtge ki kar kwaath kiper dëëtge, ni bëëtge ni ge manynya luum mana mar.

⁹ «?Aŋø, løny jïrï ki man pwönynyï jööbi niï tïnynye? ?Aŋø, løny jïrï ki man kïthï gø yi lwaaga marï nee but yie ki wäär?

¹⁰ ?Aŋø, løny jïrï ki man magï gø nee pwödhö marï puure? ?Aŋø, løny jïre ki man kuk gool jïrï?

¹¹ ?Aŋø, løny jïrï ki man ŋääthï gø kiper teek mare na dwøŋ? ?Aŋø, tïïc marï na teek løny jïrï ki man leeŋï gø bääte?

¹² ?Aŋø, løny jïrï ki man ŋääthï gø nee beel moï cooŋe ni kïth ge kar dïn?

¹³ «Uudö bwöpe wø tuuŋŋe tuuŋŋö jaak ni yie met, 'ba bwöm moe ko okwöre moe ba caal mo aliil.

¹⁴ Eni tøŋ moe nywøle yi ŋøøm ni wii gø piny jaak, ni tïm tøŋŋi moe ni lïëth yi tør.

¹⁵ 'Ba ba caare ki man näk mo ge di nyørø ki tiel ni tøcge, wala ki man ö lääc paapi ni cääthge ki bäätge.

¹⁶ Eni cwïnye ba pädhi kiper nyïïe, ni ge ba maar kwaan kaamar nyïïe, ni ba caare man näk öölö mare ocam paapi jaak.

¹⁷ Kiper eni kär mooc Jwøki ki leec wïc, ni bäŋ gïr kwany tiet jammi mo ocïbö jïre.

¹⁸ 'Ba kany wø peer bwöpe nee reeŋe, eni puta ŋeethø bäät okweeny lääy ki ŋat wø kiiw gø.

¹⁹ «?Aŋø, løny jïrï ki man cïpï ki teek jï okweeny lääy, wala man kïthï ŋut gø ki gööl?

²⁰ ?Aŋø, eni løny jïrï ki man tïïyï gø nee päre kaamar bäänyö? 'Ba kany wø kudhe ni mare ŋwøc, kännö ki lwär.

²¹ Eni ŋøøm cäye cäyö ki tiete, ni put yie mïnnö ki teek mare, ni put reŋ kar leny.

²² Eni ŋeethø bäät lwär, ni bäŋ gïn mo eni bwøk ki gø, ni eni ba døøa ŋääe ni mare lwär ko opëëllö.

²³ Eni dööt athëëre mo ena yi køp di wïnynyö, ki tøøŋi moa no opaaø na näk bëëdö ni paŋŋi.

²⁴ Kanya wø wïny dwør tuuŋ mar leny, dëëre puta tïmö ni rïïŋö, ni reeŋe døc ni ŋøøm di källö, ni ba cuŋŋi.

²⁵ 'Ba noo wïny dwør tuuŋ mar leny, eni puta twäätö, ni ŋwääc leny ni kare poot bäär, ni wïny dïŋaŋ mar kwääri mo leny.

²⁶ «?Aŋø, akäna wëëgï määtö ki køør leec wïc marï, wala man tïïyï gø nee bwöpe peere ni ee løø tier-piny?

²⁷ ?Aŋø, bee ïïni ni wø kööm olwiith nee määt maal kuya, ni geer øde bäät kïte mo ena maal døc?

²⁸ Eni bëëdö wï kïdi maal ni buuta yie ki wäär, ni beeye bäät kïdi mana näk kar gwøk røk.

²⁹ 'Ba ki kaace eni määnyö ki cam, ni këël waŋe ri gø ni kare bäär.

³⁰ Nyïïe wø cämö ki rïŋö mo ree poot da remø, ni kany wø dee dëël mo othøw, eni di joodø yie.»