Jööp 34 - Wëël Jwøk

¹ Køøre Eliyu ena bëëdö ni poot cäänö ni kööe,

² ni «U ni wø köö ni wïthu leer, wïnynyu luup 'moa; cegu ïthu jïra, u ni wø köö ni uuno kwänynyö;

³ kiper ïth beeye ni wø jier luup, kaawat man wø ö leepi wø bel cam.

⁴ Beerra man jierø gïna tiir kiper dëëtø, ni tïmø bëët ni ø kwanya gïna beer kiper dëëtø.

⁵ «'Ba ennø, Jööp aköö, ni ‹Aana dhaanhø mo bëëtö mare tiir; 'ba Jwøk akweer ki man tïïc ŋøl luup ma kare bääta.

⁶ Këël na bëëda ni bëëtö mara tiir, aana kwaan kaamar twöt; këël na bëëda naa ba bääö, aana jïtö ki ŋwiili mo ba caŋŋi.›

⁷ ?Wui, aŋa ni caal Jööp en, mo luup abuua care ni jööt jaak kaawat man wø maath pïï?

⁸ Eni wø bëëdö ka jø wø tïïc gïï mo reyø, ni eni wø dwätö na aciel ki jø raay.

⁹ Kiper ena köö, ni ‹Ki man bëëdö ni døøya yi Jwøk mo met bäŋ gïn mo duue dëër dhaanhø.›

¹⁰ «Kiper manøgønø, cegu ïthu jïra, u ni wø köö ni tiet luup laaru ka kwany. Jwøk kare bäär ki tïïc gïn mo raac; ni eni na Jwøa en teeki jïre kare bäär ki tïïc gïn mo patha adïëri.

¹¹ Kiper eni, ŋati man nø cunne cunnö ki køør gïna tïïe; ni ö ŋati man nø ni dwøk japa tïïe wï gø ki køør bëëtö mar gø.

¹² Ka adïëri møn, Jwøk ba tïïö ki gïn mo patha adïëri, ni eni na en teeki jïre luup ba ŋøle no oköömmö.

¹³ ?Aŋø, da ŋat mo Jwøk ee mooø ki teek bäät piny? ?Aŋø, bäät piny bäre ocïba ŋa cere nee bëëde ni koora eni?

¹⁴ Doo na Jwøk cädö kaper dëëre keere, ni war jwïëy moe ki jam jwïëy mare,

¹⁵ gïïa kwøw bëët doo puta thøø, ni ö dhaanhe ni dee døø ri tør.

¹⁶ «'Ba ï na Jööp, ni näk mo tiet luup cøøa wïïï, wïny gïn, ni cegï ïthï ki luummo caana.

¹⁷ ?Aŋø, ŋat wø män ki ŋøl luup ma adïëri, løny jïre ki man käär jiy? ?Aŋø, Jwøa teek na bëëtö mare tiir, jäälï jäälö?

¹⁸ Eni na Jwøk wø köö jï nyeya, ni ‹Ïïni, wïïï raac,› ni kööe jï kwääri, ni ‹Uuna jiy mo reyø.›

¹⁹ Eni ba bëëdö ni ena løø dïbwöthe, ni jøøa näk okwär ba lääŋŋe døc ni kaala jøøa can, kiper mana näk mo geni bëët beege japa tïïe ki cere.

²⁰ Jøøgø bëët, ge laara thøø ki kany mo cään. Kany wø tïme na dhöör-wäär, ge laara thøø ni pööth karge. Jøøa teek, jwïëcge laara pöödhö ni ge kär gudö ki cenø.

²¹ «Kiper Jwøk raŋŋa yi jöör bëëtö mar dhaanhø; ni waŋe neeta kwör cääthe mo tiet gø.

²² Bäŋ kany mo cøl wala tier tïpö mo dhïïth mo løny ki man ö jø wø tïïc gïï mo reyø ni kange rege yie.

²³ Jwøk ba mak ki teek ki man cïp dhaanhø nyïme, nee luum gø ŋøle.

²⁴ Eni jiy moa teek pete petø ni thenh thenh ni bäŋ tier gïn mo pëënynye, ni kïth jø møøk kwörge.

²⁵ Ka adïëri møn, eni tïïe mo jøøgø ŋääe, ni raany geni ki wäär, ni putge ränynyö.

²⁶ Geni, ge jääl Jwøki jäälö kiper raay moge, ni nëënö nyïm jiy bëët.

²⁷ Kiper gena gaa wøk ki man caathge køør Jwøk, ni bäŋ gïn mo caarge kiper uutjïëth tïïe moe.

²⁸ Geni, jøøa can ki jøøa no ocaannø atïïcge nee jwöŋge dëër Jwøk kiper køny, ni ö Jwøki ni wïny oduuru marge.

²⁹ ?'Ba ni näk mo eno lïŋö, aŋa noo köö ni eno bääyö? ?A ni näk mo täärnyïme ee kanø, aŋa noo joot gø? Eni, jiy ki wïth juurre bëët ena tiere,

³⁰ kiper nee dhaanhø mo tøør ri Jwøk nee jiy ba kääre, nee ba tïme na abïëp mo jiy pätha yie.

³¹ «Kanymør da dhaanhø mo köö jï Jwøk, ni ‹Gïï mo leth ajwøra, 'ba ennø, a ba bääyi këët.

³² Beerra man pwönynyï aani ki japa näk kuua; 'ba ni näk mo aano bääyö, naa ba cäŋa bääyö këët.›

³³ ?Aŋø Jööp, løny jï Jwøk ki man duunne jïrï kaawat man wø manynyï, kany wø näk mo ïïno kweer ki mare? Beeye ïïni na doo ŋøl luummögø ni patha aani; kiper manøgønø, mana ŋäyï caanï.

³⁴ «Jøøa näk tiet luup cøøa wïthge, ki ŋato wïny luumma ni wø wïïe leer, geno köö,

³⁵ ni ‹Jööp cara luup mo patha mo kwänynyö; ni luup mo care bäŋ leec wïc rege.

³⁶ Doo beer ki man tet Jööp døc kar løøk, nee luup bëët caane, kiper luup mo wø dwøge caala mo ŋat raay.

³⁷ Kiper eni bäät raaye amëënne ka ageem, ni paŋ ceŋŋe yïthakiyø ni mare abuua, ni car luup mo thööth dëër Jwøk.› »