Jööp 28 - Wëël Jwøk

Luum Kany Joot Leec Wïc Yie

¹ «Ka adïëri møn, da kany mo gwet-bïrö di joodø yie tiet ŋøøm, ki kany wø leeny warkey yie.

² Nywïënyö man wø cwøl ni bääŋ käla yïth ŋøøm, ni nywïënyö mana näk jwïël lëëny wøk ka ri kïdi.

³ Dhaanhø dønynya piny kany mo cøl yi muudhö; eni wø dønynya piny tiet ŋøøm kuya yi muudhö mo cøl kuna määnynye ki nyeŋ kïte.

⁴ Dhaanhø kunyö yïth ŋøøm ki kany mo ŋaam mo bäär, mo kare bäär ki kar bëëtö mar jiy, mo ba joot jiyi mo wø cäädhi. 'Ba kanyo enge yi buur kaace, buur wø løøtge løødø ki deŋŋe, ni dønyge kany mo bäär ki kar bëëtö mar jiy.

⁵ 'Ba ŋøøm ni wø joot cam yie, tiere piny ree wiilø ni keda oraany maaci.

⁶ Nyeŋ kïte moa paŋŋi joota yïth kïte moa en tiet ŋøøm, ni tør mare yie da warkey.

⁷ Weny mo wø cämö ki rïŋö bäŋgø mo joot jöör gø; këël dïbëël ba løny ki man joot gø ki waŋe.

⁸ Lääy mo wø koorri, bäŋgø mo këël tiere bäät gø, ni këël ŋuu mo teek bäŋgø mo pöödhi ki bääte.

⁹ Dhaanhø kïdi mo teek wø tøøe tøø ki cere, ni ö eni ni kaaŋ tier kïdi.

¹⁰ Eni wø tïïö ki jöö ki yïth kïte, ni jïte ki gïï mo perge leth yie.

¹¹ Eni nyeŋ näm wø gëëŋe gëëŋö nee ba kwötge, ni ö gïïa no okanø ni käl ge wøk yi tar.

¹² «?'Ba a kaa ŋø ni wø joot leec wïc yie? ?Kany wø kwany tiet luup yie en kaa?

¹³ Eni, leth pere kuc dhaanhe, ni eni ba joot bäät ŋøøm kar bëët gïïa kwøw.

¹⁴ Kut aköö ni ‹Eni tøør yia,› ni kö naama dwøŋŋi, ni ‹Eni tøør baŋa.›

¹⁵ Leec wïc ba løny ki man wiili ki warkey mo tøŋ, ni bäŋ rumi mar gwet-bïrö mo gäte tïmö ni röömi ki gø.

¹⁶ Eni ba pääri ki warkey mar kanya cwøl ni Öpïr, wala teeŋ nyeŋ kïte mo mïërö ma teeŋi.

¹⁷ Eni ba dïët ki warkey wala wïlli mo tøŋ, ni eni ba løny ki man wiili ki jammi moa näk otïïö ki warkey mo tøŋ.

¹⁸ Këël teeŋ nyeŋ kïte moa perge leth ba pääri ki gø, kiper gät leec wïc kaala nyeŋ kïte moøgø.

¹⁹ Këël kïdi mana näk abäga na käl kanya bäär yi ŋööm jø Kuuc ba pääri ki gø, ni eni ba dïët ki warkey mana tøŋ.

²⁰ «?A ennø, leec wïc oööe ki kaa? ?Kar bëëtö mar ŋäc tiet jammi en kaa ŋø?

²¹ Beeye gïn mo okanø ki man neeni ya gïïa kwøwi bëët ki nyeŋge, no omwönö ki man ŋäyi ya wec maalli.

²² Kar ränynyö ki kar thøø aköö, ni ‹Luumme keere awïnywa ki ïthwa.›

²³ 'Ba beeye Jwøk keere ni ŋäc yi jöör bëëtö mare, ni bee eni keere ni ŋäc kar bëëtö mar gø;

²⁴ kiper eni wø lwïthö bäät piny bäre, ni joot jammi bëët moa en tier maal.

²⁵ Kiper eni kanya cïp teek jï jamø, ki kwään rumme mo pïï moo en yïth näm;

²⁶ ki kanya røm pï køth moo pänh piny, ki kanya jiiŋ jöö mar agaackøth,

²⁷ kar kanyaca leec wïc aneene ni kwaan bëëtö mar gø, ni këël tier gø piny, ni pääny gø.

²⁸ Køøre ena köö jï dhaanhø, ni ‹Ka adïëri møn, ki man lwäär Wuuö Jwøk beeye leec wïca eni; ni man kwier gïn mo raac beeye ŋäc tiet jammi eni.› »