Jööp 27 - Wëël Jwøk

¹ 'Ba Jööp ena bëëdö ni poot cäänö ni kööe,

² ni «Aani, a kööŋŋa ri Jwøa kwøw na en teeki jïre, Jwøa kweer ki man tïïc ŋøl luup ma kare bääta, na wëëk aani jwør gïï mo leth ki yi cwïnya.

³ Aani, këël kanyo bëëda naa poot kwøw, ni jam dhøk mar Jwøk bëëdö uma,

⁴ dhaa ba cäänö ki luup mo reyø, ni leeba ba cäänö ki luup cwøk.

⁵ Aani, ba løny ki man kööa ni luummu beeye kare; aani, këël kanyo thøøa, bëët-adïëri mara ba wiia.

⁶ Aani, bëëtö mara na tiir puta ka mak naa ba ö wøk yie na bäre. Cwïnya a ba jääle, këël kanyo bëëda naa poot kwøw.

⁷ «Beerra man ö nyïïmänna ni tïmge kaamar jøøa reyø, ni ö jø wø ŋäbö ki aani ni tïmge ni caala jøøa näk bëëtö marge ba tiir.

⁸ ?Aŋø, dhaanhø mo tøør ri Jwøk, da ŋäädhe jïre kanyo thøøe, noo ö jwïëye noo käli ya Jwøki?

⁹ ?Aŋø, Jwøk ïthe ciie ciiø ko oduuru mare kanyo ö gïïa lethi bääte?

¹⁰ ?A eni, yie wø mïnnö ki Jwøa en teeki jïre, wala løny ki man ö eni ni cøør Jwøk ki yïth nïne bëët?

¹¹ «Aani, u pwönynya pwönynyö ki jöör teek mar Jwøk; uutjïëthe mo Jwøa en teeki jïre ba kana ki uuni.

¹² Ka adïëri møn, uuni bëët gïnögø ajootu ki nyeŋŋu. ?Aperŋø nø ni cäänu ki luup bøøl en?

¹³ «'Ba man beeye gïn wø cïp Jwøki jï ŋat raay; ni beeye muuy man wø ööi ki baŋ Jwøa en teeki jïre ni wø cïp jï ŋat wø caar jø møøk.

¹⁴ Eni këël mo wääte thööth, ge thöör opëëllö thöörö ki 'näk, ni ö nyïïkwaaye ni bëëtge ni ge ba jïti ki cam mo orømø kiperge.

¹⁵ 'Ba moo bøth jïre ni kwøw, ge cäŋ täwi ka nägö, ni ö määrge moo dööŋ wøk na määr thuunhnhi ni ba jwöŋge kiperge.

¹⁶ Eni këël mo gwet-bïrö ee cooŋ piny kaamar tør, na abïïe ee löör piny kaamar pøl,

¹⁷ abïïe moa jiiŋŋe dööŋ wøk jï jøøa bëëtö marge tiir, ni røcge ge, ni ö gwet-bïrö moe ni pääŋŋi ya jøøa bëëtge beer.

¹⁸ Øtø man wø geere tïmö kaamar øt wenyø, ni caala abïla man wø geer ŋat koorri.

¹⁹ Eni cøøa baŋ niine na aŋuudi ni ŋääe ni eno kwär, 'ba kanyo pääe, jape oløny ni tøør.

²⁰ Lwär ööa bääte kaamar jwïëö, ni ö eni ni køøli ya atuunna ki wäär.

²¹ Jamø man wø ööi ki jï løø kur tuul-cäŋ eno køøle, ni ö eni ni put rwäänyö na bäre; eni di judhö kar bëëtö mare.

²² Jamø manøgø okwöt bääte ni bäŋ bäth ec mo nyoodhe jïgø; 'ba opääre ki man päär wøk ki yi teek jamø manøgø.

²³ 'Ba jammøgø poot bëëdö ni jwöŋö bääte, ni riem eni wøk kar bëëtö mare ni di buuö.