Jööp 24 - Wëël Jwøk

¹ «?A yi wäne nø noo ö Jwøa en teeki jïre noo cïp cääŋŋe piny mo ŋøl luup? ?A yi wäne nø noo ö jø wø ŋäc eni noo raŋge cääŋŋe moøgø?

² «Jiy møøk kïte moa näk ocïp nyeŋ kee na nyuuthe wø nyiikge nyiigø ni ge nyaaya pwöth moge; ni kwaalge dïëk mo jø møøk ni dwalge ge ri pïïth dïëk moge.

³ Arëën mar kïïc wø kälge kälö, ni kälge dhieŋ mar cï thøø na dïgïti.

⁴ Jøøa can wø cöörge wøk ki nyeŋ jïëthe, ni tïm jøøa canni bëët moa en yi ŋööm paac ni dëëtge kaange kaannø.

⁵ 'Ba ka adïëri møn, jøøa can, ge wø aa wøk dï tëën kaamar arëën paap kuna määnyge ki cam kiper nyïïge.

⁶ Ge wø cuuŋö ki caammi yïth pwöth mo patha moge, ni jeenyge gïïa näk odööŋ piny yïth pwöth omøki mo jøøa reyø.

⁷ Wäär wø thöörge ni bäŋ abïïe dëëtge, ni bëëtge ni bäŋ gïn umge dëëtge ki gø kiper köö.

⁸ Dëëtge wø bëëdö ni thec ki kuunhnhi mo bäät kïte, ni ge bëëdö ni dëëtge ege dii ri kïte kiper bäŋ kar bëëtö.

⁹ 'Ba ki røk jøøa reyø, møøk thunh wø cöötge wøk dhøk obwöre moa näk wëëkge othøw, ni käl geni ki nyeŋ pïït kööth mëëkge na can.

¹⁰ Jøøa can ge wø bëëdö ni ge cäädhi ka dëëtge kiper na bäŋ abïï, ni ge tïëdö ki ŋaak beel ni geno buup käci.

¹¹ Geni, mädhi wø welge welø tiet jenni, ni nywøpge nyïïomøki na kwøŋ, ni ge ki dëëtge geno näk riewi.

¹² Cooyø mar jiy moa näk manynya thøø wø wïnyö dï pääny, ni ö jiyi moa näk dëëtge da ŋwiili ni jwöŋge kiper køny; 'ba Jwøk ïthe käre ciiø ki lam marge.

¹³ «Da jiy mo wø gëëmö ki tar, mo ge ba many man ŋäcge uutjïëthe mo gø, wala ki man ruuge waŋjööre.

¹⁴ Kany wø pööth tarri mar dïcäŋ, dïnäge wø puta ö maal kuna 'näkge jøøa can ki jøøa näk ocaarø; ni ge kwädö ki wäär thuwø ni dëëtge ege døøc kuuwe.

¹⁵ Ni dïcwøø ma kääbi thuwø wø bëëdö ni køya muudhö, ni wø köö, ni ‹Bäŋ ŋat mo joot aani,› ni eni bëëdö ni täärnyïme ee kanø.

¹⁶ Kany wø tïme ni piny a muudhö, kuuwe uudi wø tøcge tøyø, ni kany wø tïme na dïcäŋ, dëëtge wø kange yïth uudi, ni geni bäŋ gïn manyge ri tar.

¹⁷ Kiper ki baŋge, muudhö mana cøl døc ege døøy amöölla marge; ni ö jap wø känni ki lwär yi muudhö ni tïïcge ge na nyïïawäädi moge.

¹⁸ «'Ba ge wø køøl pïïyi køølø ni tharge, ni ö ŋöömö mana näk kurge ni cieni, ni tïme ni bäŋ dhaanhø dïge mo ci yïth pwöth jenni.

¹⁹ Kaawat man wø ö meelli ki lïëth piny wø løcge pïï moa näk otïmö na pey, kaawat manøgø thuwø kar bëët jwïëc jøøa no othøw jø wø tïïc gïïa reyø wø käle kälö.

²⁰ Geni, mëëkge wïthge oput wïlö ki ge, ni ö dëëtge ni cami ya twöŋi. Jøøa reyø wïc ba par ki ge këët; 'ba ge ränynyö kaamar jaath mo otøp.

²¹ Geni, ge wø tïïö ki gïï mo reyø dëët mään moa näk bwöy, ni bäŋ bäth ec mo nyoothge jï määr thuunhnhi.

²² 'Ba Jwøk jøøa teek wø raanynye raanynyø ki køør teek mare, ni këël na bëëtge ni tietge ege këël piny, bäŋ ŋäädhe jïge mar bëëtö.

²³ Eni ge wëëge jwöm ni bëëtge no ogwøø, 'ba waŋe ena uutjïëthe moge.

²⁴ Geni, ge tïŋa maal ki kany mo thiinh, køøre ge tïmö ni ge tøør; geni, ge dwøga piny ni cooŋ geni kaamar jiy møga bëët. Geni, ge di jelø kaamar wïth beel.

²⁵ ?Ni näk mo gïnögø ba tägi, aŋa noo kööp aani tööt, noo wëëk luup 'moa tïïc ni bäŋ tietge?»