Jööp 23 - Wëël Jwøk

Luubö Mana Løk Jööpi

¹ Køøre aløk Jööpi ni kööe,

² ni «Këël ennø a bëëdö naa dwaallø ni cwïnya okëënynyö, ni cere poot peek bääta këël na bëëda naa ŋurö.

³ Wui, doo na kany en yie en ŋääa, eni da manynyø, ni daa ci kar bëëtö mare!

⁴ Aani, luupa daa caanø nyïme, ni dhaa päŋ ki man caana luup moa en cwïnya.

⁵ Ni daa luup leŋø moa dee løø jïra, ni daa tiet luup kwanyø moa caane.

⁶ ?Aŋø, a dee thiela piny ki teege na dwøŋ døc ri løøk? Ba doo løny, 'ba ïthe dee ciiø ki mara.

⁷ 'Ba dhaanhø mo bëëtö mare tiir løny ki man cïp luup moe nyïm Jwøk kaace; 'ba aani a doo jïtö ki køny na bäre bäre baŋ dïŋut luup mara.

⁸ «Këël maa doo cøøa jï løø kur tuul-cäŋ, eni tøør yie; ni këël maa doo cøøa jï løø kur pänh-cäŋ, eni ba jooda yie.

⁹ Këël mo eni ena bäät tïïc jï løø wï-piny, eni ba jooda yie; wala këël mo eno døø jï løø tier-piny, eni ba nëëni jïra.

¹⁰ 'Ba eni uutjïëthe mo wø caadha bëët ŋääe, ni kany wø pääny aani, a tïmö naa paŋŋi kaamar warkey mo okïth yi maac.

¹¹ Tieta bëëdö ni løpa kwör cääthe mo tiet Jwøk, naa bëëdö naa caatha jööre keere naa ba gak.

¹² Aani ciik moe kära wiiø; aani, luup mo wø ö wøk ki dhee yaa kan cwïnya, ni perge leth jïra ni kaala cam man wø cama ki yi cäŋ.

¹³ «'Ba Jwøk bee eni keere, ?aŋa ni løny jïre ki man mak gø ki teek ki man wiil acaara mare? 'Ba eni tïïya man wø manynye keere.

¹⁴ Eni japa näk ee cïp piny kipera wëëge thur karge, ni moa näk poot ee cïp piny kipera thööth kar kän mare.

¹⁵ Ni beeye tiere ni bëëda ni aano bwøk nyïme en, ni kany wø caara gïïögø bëët, a puta lwäyö døc ki eni.

¹⁶ Jwøk, cwïnya awëëk pädhö; Jwøa en teeki jïre aana tïïe naa bwøa døc.

¹⁷ 'Ba a ba lïŋi yi muudhö man, ni beeye yi muunhnhi no odhïŋ ni täärnyïma ee uumö bäre en.»