Jööp 21 - Wëël Jwøk

Luubö Mana Løk Jööpi

¹ Køøre aløk Jööpi ni kööe,

² ni «Beerra man cegu ïthu na kare ki luup 'moa nee tïme ni beeye jöö jïïu man cømmu cwïnya ki gø.

³ Cegu ïthu jïra ki luup moo caana jïïu ii; køøre kanyo lønya ki cäänö, aano buu.

⁴ «?Aŋø, aani, a dwaalli ka nyeŋ dhaanhø cøøn? ?Aŋø, cwïnya a ba dee pädhö kiper ŋø?

⁵ Raŋŋu jïra ni thäŋ yïthu; ni wëëgu dhøgu mak ki ceŋŋu.

⁶ Aani, kany wø cäda kiper gïn, cwïnya wø puta bwøk; ni ö dëëra bäre ni put tïmö ni kwanynyi ki lwär.

⁷ ?Aperŋø ni poot jø raayi ni kwøw en, ni bëët kwøw marge cäätha nyïm, ni kwörge thuwø tïmö ni døøŋŋø døc?

⁸ Geni obwöre moge wø døøŋŋø nyïmge, ni jootge nyïïkwaacge ki nyeŋge.

⁹ Mïëri moge bëëdö ni bäŋ gïn lääŋge kiper lwär; ni ge bëëdö ni bäŋ ajäl Jwøk mo ö bäätge.

¹⁰ Rwädhe moge bäŋgø ma bwöy, ni dhäk moge moa näk mädhi ge nywøl ni beer jaak, ni bäŋgø mo bwön wøk.

¹¹ Geni, nyïïge cöörge nyïmge kaamar pïïth dïëk, ni ö nyïïge moa therø ni bëëtge ni ge pärö deŋge.

¹² Geni, ge wär ki dudi ni buul ki thoom pwötge pwödö; ni yïthge putge ka wëëk mïnnö ki dwør opelø.

¹³ Nïr kwøw moge wø thöörge ni bëëtö marge orømø, ni cige yi bwörö ni yïthge met.

¹⁴ 'Ba ge poot köö jï Jwøk, ni ‹Wec wa keerwa! Wa ba many man ŋäcwa uutjïëthe moï këët.

¹⁵ ?Aŋø, Jwøa en teeki jïre aŋa, mo løny ki man tïnywa eni? ?Na agïnaŋø noo jootwa ni näk mo wa bëëdö ni wa lama eni?›

¹⁶ Ka adïëri møn, jöö mana bëënyge ki gø ba käl ceŋge; ni aani kara bäär ki pwöc mar jø raay.

¹⁷ «?A kwöre adïï ni lamba mar jø raay bïp Jwøki bïbö, ni gïï mo leth ööa bäätge? ?A kwöre adïï ni gïï mo leth jääŋ Jwøki jääŋŋö bäätge ki gootø mare?

¹⁸ ?Aŋø, ge caala lethø ni wø kwør jamø, wala tør ni wø køøl apwøyaweerø?

¹⁹ Akøp ni ‹Jwøk ajäla mar ŋat raay wø kane kanø nee kïth bäät obwöre moe.› Wøp, beerra man cool kwör dëëre kiree nee røm dëëre.

²⁰ Beerra man joot ajäla mare ki waŋe kiree; beerra man mäthe ka ajäla mar wëëc Jwøk na en teeki jïre.

²¹ ?Aŋø, eni, kanyo nø thum dwäde mo ruut kwøw moe, da gïn mo caare këët kiper jø paare moa wii køøre?

²² «?Aŋø, Jwøk ni wø ŋøl luup jiy moa kwörge døøŋŋø, da ŋat mo mooya gø ka acaara?

²³ Dhaanhø mør thøw ni dëëre poot teek, ni bëëtö mare beer no ojäŋ,

²⁴ ni dëëre poot pulli ki cam, ni cuuwe poot teek ni beyø.

²⁵ 'Ba dhaanhø mør thøøa yi bëëtö mo leth, ni bäŋ gïn mo beer mo yie omïnnö ki gø.

²⁶ 'Ba teeŋ jøøgø bëët, ge poot cøøa yïth ŋøøm na aciel, ni cami ya twöŋi.

²⁷ «Ka adïëri møn, aani acaare mou ŋääa, ki luup moa näk you tuudö kipera naa raanynyu ki ge.

²⁸ Kiper uuna köö, ni ‹?Po nyena kare dwøŋ en kaa, kanya wara bëët jø raayi yie?›

²⁹ ?Aŋø, jiy mo wø wïdi dï mïëri käru pëënynyö, ni cegu ïthu ki luupge?

³⁰ Kiper jø wø tïïc gïïa reyø, ge wø bøth cäŋ jwør gïï mo leth, ni piem geni yi cäŋ wëër mar Jwøk.

³¹ ?Aŋø, da ŋat mo jooga ŋat raay kiper bëëtö mar gø? ?Da ŋat mo jääla gø kiper gïna tïïe?

³² Kanyo kïth eni kar koony, jiy obëëdö ni ge raŋŋa bwörö mare ni kïïnna gïre.

³³ 'Ba eni køøre oløp jiyi bëët, ni jiy moo cäädhi nyïme ba thum ki kwaan, ni ö ŋøøp pwöla ni put nikwöc bäät rïŋ dëëre.

³⁴ ?Aperŋø nø ni cømmu cwïnya ki luup mo bäŋ tietge ii, ni luup mo wø løgu jïra bëët beege luup tööt?»