Jööp 20 - Wëël Jwøk

Luubö Mana Løk Cöparri

¹ Køøre aløk Cöparri nyï Nayma ni kööe,

² na «Acaare moa pär cwïnya ki ge aana tïïcge naa duunna, kiper cwïnya opädhö døc.

³ Aana wïnyö ki luup mo jääla aani, ni ö jwïëc leec wïc mara ni bwøth aani ki man dwöga.

⁴ «?Aŋø, kuyï ki mana käl ya acääŋŋe, na täk dhaanhe ki bëëtö bäät piny,

⁵ ki man näk mo met ec mar ŋat raay ba ruu, ni kanynyø mare ba bëëdö ki kany mo bäär?

⁶ Këël atöör mare okëët maal, ni eni wïïe ogutö ki pøøl,

⁷ eni ränynyö na bäre bäre kaamar laac-døøŋŋø mare. Køøre jiy moa wara ŋäc gø ge pëëö, ni ‹Nyeni en kaa?›

⁸ Eni rwäänyö na bäre bäre kaamar lääk, ni ba joot këët; ni put tïmö ni tøør wïc na bäre kaamar lääk møøk mo wø lägi ki wäär.

⁹ Nyeŋ moa wara neen gø ba jootge këët; ni ö kar bëëtö mare ni dööŋe jaak ni eni tøør yie.

¹⁰ 'Ba wääte, can mar jøøa can oneenge; ni ö jap kwärö moe ni muu ge ki cere keere.

¹¹ Eni cuu moe teek kaamar cuu wøp; 'ba teek mare poot thøw na aciel ki eni ni cige yïth ŋøøm.

¹² «Këël na bëëde ni raay ŋweeth dhee, ni ee kan tier leebe,

¹³ ni eni bëëdö ni raay ee kut dhee, ni ba many gø nee wiie,

¹⁴ eni cam mare mano came poot wïïtö yie na cïm mar olwierø.

¹⁵ Eni jap kwärö moa näk ee cam yie ŋööe wøk; eni cwïnye tïïc Jwøki tïïö nee lääme ni ŋöö geni wøk.

¹⁶ Eni cïm mar thwöl mana näk cäri maadhe maadhø, ni puti ya leep thwölli manøgø näk.

¹⁷ Eni nyeŋ näm ba neene këët, ni beege näm mo wø kwönni ki maar kïc ki caak.

¹⁸ Eni jammi moa joode ki køør tïïc mare muue muuö ni ba came; ni eni yie ba mïnni ki japa joode ki køør gath mare.

¹⁹ Kiper eni jøøa can acaare ni wëëk ge dööŋŋe jaak ki ceŋge, ni ö uudi mo ba geera eni ni tïïc ge na thööge.

²⁰ «Ka adïëri møn, eni ba jäŋ ki jape, ni bäŋ gïrpiny aciel mo wëëga eni mïn ec ki røk jap wø manynye.

²¹ Eni bäŋ gïn mo but wïïe ni ba came. Kiper manøgønø, jape ba ruu ki thumö.

²² Eni këël na bëëde ni jap kwärö thööth jïre, gïï mo leth wø poot jwøre jwørø; jiy mo wø en yïth gïï mo leth wø ööa maal bääte ni tïïge ree ki gïï mo leth.

²³ 'Ba kanyo en bäät cam ni cämö nee jääŋe, Jwøk wëëye owëëk lwör bäät gø kaamar køth ni eni ena bäät cam.

²⁴ Këël mo eni bøth ki tøŋ mar nywïënyö mana teek, eno wëëk këël ka atheerø mar nywïënyö ma jwïël.

²⁵ Eno këël ki yie ni put tuc wøk ki dïŋääe, ni ö leep atheerø mana paŋŋi ni put cwïny gø kuu wøk. 'Ba lwär mo dwøŋ oput ö bääte.

²⁶ Muudhö mana cøl bäre ööa bäät jap kwärö moe, ni ö eni ni waaŋi ya maaci mo ba løny ki bïp, ni ö jape moa dööŋ kar bëëtö mare ni puti ya maaci thöör.

²⁷ Raay moe owëëk jap maalli nyooth; ni ö pinynyi ni ö maal kuna jääl gø.

²⁸ Jammi moa en kar bëëtö mare otwier; geno käl dïcäŋ wëër mar Jwøk.

²⁹ Gïnögø beeye gïno kïth Jwøki bäät jø raay na kurge, ni beeye gïna jier Jwøki kiperge nee cïp jïge.»