Jööp 2 - Wëël Jwøk

Riet Päärö Mana Tägö Dëër Jööp

¹ 'Ba da dïcäŋ mør thuwø mo nyïïatwiet maal geno ö kuna cuŋge nyïm Wuuö Jwøk, ni ö Ceethan thuwø ni ööe ki geni na aciel nee cuŋŋe nyïme.

² Kanyøgø Wuuö Jwøk aköö jï Ceethan, ni «?Ï kälï kaa ŋø cøøn?» Køøre aløk Ceethanni jï Wuuö Jwøk, ni kööe, na «A käla kuna wïra bäät piny bäre ni jøøya gøøni.»

³ Køøre Wuuö Jwøk aköö jï Ceethan, ni «?Dhaanhnha ma Jööp ajootï? Eni, ena dhaanhø mo bäŋ ŋat mo caala gø bäät piny; ena dhaanhø mo bäŋ gïn mo ogwäyö ri bëëtö mare, mo bëëtö mare tiir, ni eni lwäär ki Jwøk, ni ree ee mänö ki gïï mo reyø. 'Ba këël na bëëdï niï tuuŋŋa aani bääte kiper nee eni raanynya ki gïn mo bäŋ tiere, eni poot bëëdö ra adïëri mare.»

⁴ 'Ba aløk Ceethanni ni kööe, ni «Ŋati man nø jwøra gïno pïï dëëre. 'Ba dhaanhø løny jïre ki man cïp jap kwøwe bëët kiper jwïëye.

⁵ 'Ba ni näk mo cerï iï tïŋ maal bääte, ni ö rïŋ dëëre ki cuu moe ni jïte ki täw, ka adïëri møn, ï pute ka janynyø täärnyïmï kiree.»

⁶ Køøre Wuuö Jwøk aköö jï Ceethan, «Wøp, tïïc gïna manynyï jaak dëëre, 'ba jwïëye keere kär gutï.»

⁷ Kanyøgø Ceethan aay nyïm Wuuö Jwøk, ni kïth dëër Jööp ka ajøra mo dwøŋ døc, ni beeye ki mana täge ki thäny tiete këël dï wïïe.

⁸ Køøre Jööp alwötö ka abat nee dëëre gøønynye ki gø, ni eno pï piny yi bur.

⁹ 'Ba cïïe aköö jïre, na «?Aŋø ni poot bëëdï ra adïëri marï en? Jaany Jwøk nø; ni thøwï!»

¹⁰ 'Ba aløøe jï cïïe ni kööe, ni «Ïïni, ï cäänö kaamar dhaagø ma bøøl. ?Aŋø, ø doo bëëdö ni ø joota gïn mo beer keere ki baŋ Jwøk, ni bäŋ gïn mo raac?» 'Ba ki yïth japøgø bëët, Jööp kär bääyö ki yïth luup moe bëët moa caane.

¹¹ 'Ba nyïïawäät Jööp ma adäk, ni beege Elipath nyï Tëman, ki Bildat nyï Cuua, ki Cöpar nyï Nayma, kanya wïnyge gïïa leth bëët na tägö dëër Jööp, gena cïp piny ki cäŋ man røømge yie nee cige kuna cømge cwïny Jööp.

¹² 'Ba kanya cige na lwiithge gø ni karge poot bäär, eni kärge ŋiiø, ni putge tägö ko oduuru ni döötge ege tïŋ maal døc; ni jeecge abïïe moge, ni jøøpge tør wïthge ki pänh cwïny.

¹³ Køøre gena put pï piny yïth ŋøøm ki eni ciel ki nïne abïriiø ki wärre abïriiø. 'Ba bäŋ dhaanhø aciel dëëtge mo dhee ee tuuö ki eni, kiper bëëtö mana jootge na leth na en yie.