Jööp 16 - Wëël Jwøk

Luubö Mana Løk Jööpi

¹ Køøre aløk Jööpi ni kööe,

² ni «Luup mo thööth mo caala moøgø yaa nø wïnynyö; aŋø, u bëët, kee uuna jø cøm cwïny mou meeta rääm.

³ ?Aŋø, cäänö maru manø ni bäŋ tiere enø, aŋuunne bäŋgø? ?Agïnaŋø na tïïc uuni nou bëëdu nou pïëmö ki aani?

⁴ Aani thuwø, doo na u ena teeŋ kany ni bëëda yie en, doo løny jïra ki man cääna kaamar uuni; doo løny jïra ki man cääna ki luup maa jälla uuni ki ge, ni wïïa ŋøølla ŋøøllø bäätu.

⁵ 'Ba luup moa doo ö wøk ki dhaa u dee mooø ki teek, ni ö luup cøm cwïny mo wø ö wøk ki dhaa ni dwøk rääm maru piny.

⁶ «'Ba këël a doo cäänö jaak, rääm mara ba døø piny; këël a doo lïŋö, ba ö wøk dëëra.

⁷ Wui Jwøk, ka adïëri møn, bääta awëëgï pädhö, ni raanynyï jap paara bëët.

⁸ Aana wëëgï dööŋŋe na cöö keere, ni tïm dwadø mara na nyuudhi mar bääyö mara.

⁹ Jwøk amännö ki aani, ni wëëk rïŋ dëëra jeeyø ki wëër mare. Eni lage akaaye bääta, ni raŋ aani ni waŋe owiil bääta.

¹⁰ Jiy aana buuge, ni dhööŋge aani ki thäga, ni rege ege cooŋ deŋŋa ni geno ö maal bääta.

¹¹ Jwøk aana cïp ceŋ jø raay møn, ni leeŋ aani ceŋ jø wø tïïö ki gïï mo reyø.

¹² Jammi bëët beyø ki baŋa na bëëde, 'ba ennø, aana tøye; aana maae ki ŋuta ni gøc aani ki piny ni peta; ni eni bëëdö naa ee niidø.

¹³ Jø leny moe mo wø thöödhö ka athëëre aana cielge, ni ŋarge røgi 'moa ni bäŋ bäth ec mo ege nyoodhø jïra, ni ö keenhnhø mara ni øc piny.

¹⁴ Eni bëëdö ni meeta ŋwiili 'moa, ni eni bëëdö ni ŋwieya køøra kaamar ŋat leny.

¹⁵ «Kiper manøgønø, dëëra akwönynya ka abïïn keeca ni uuma dëëra ki gø, ni buta piny yi bur ni aano ränynyö.

¹⁶ Aani, nyeŋŋa awer ko oduuru, ni tïm nyeŋŋa ni jïrri.

¹⁷ 'Ba ceŋŋa poot bëëdö ni bäŋ gïn mo raac mo tïïcge, ni lam mara poot bëëdö na kare.

¹⁸ «Wui, ï na ŋøøm! Remø mara kär uumï; beerra man ö oduuru mara ni ba jïte ki jwöm.

¹⁹ 'Ba ennø, lïŋi mara ena maal, ni bee eni ni wø ŋøl luumma.

²⁰ Jøøa päät aani beege nyïïawääta, 'ba a bëëdö ni pï nyeŋŋa øya piny nyïm Jwøk.

²¹ Kaawat man wø ö dhaanhe wø dwøk dhaanhø kanya ciel ki ŋat mør, ?aŋø ni bäŋe ŋat dwøk wa kanya ciel ki Jwøk en?

²² Kiper kanyo poot cwiiri moi ni nøk ii ni kär pöödhö, aano ci kanya näk bäŋ duuö yie.»