Jööp 14 - Wëël Jwøk

¹ «Dhaanhø man no onywøl dhaage bäät piny en nïre nøk ni ena yi bëëtö mo leth døc.

² Eni caala wï jaath man wø ŋøøk ni wø laar talø; ni eni laara pöödhö ni ba ruu kare kaamar tïpö.

³ ?Aŋø, Jwøk, løny ki man këëllï waŋï dëër ŋatøgø, ni cwölï gø nyïmï nee luumme ŋølï?

⁴ ?Aŋa ni løny jïre ki man tïïc gïn mo ba waany ni waany? Bäŋ dhaanhø mo løny jïre!

⁵ Ïïni, kwään cwiic kwøw mo dhaanhø iï nø cïp piny, ni kwään dwäde mo beede oløny ni ŋäyï; ni kanya näk iï cïp piny kipere ba løny ki man kaal gø.

⁶ Kiper manøgønø, løø nyïmï wøk ki eni ni weyï gø nee jïte ki jwöm, këël kanyo päŋ caae moe kaamar ŋat tïïc man wø tïïö ni di cunnö ki gwel.

⁷ «Kiper këël jaath da ŋäädhe kipere, kany wø näk mo eno ŋøt piny, eni cäŋa løthø, ni ö bäädi moe ni ba wec pïth marge.

⁸ Këël lweedi moe odøøŋŋø ni ränyge tiet ŋøøm, ni ö gutö mare ni ränynye bäät ŋøøm moa no otal,

⁹ ni näk mo tiere ojïtö ki pïï, løth ni jïte ki bäädi ni døø kare na jaath.

¹⁰ 'Ba dhaanhø thøw ni koonyi piny; eni aŋuun jwïëy mare cuŋ ni ba bëëde këët.

¹¹ Kaawat man wø døø pï naama dwøŋ piny, wala kaawat man wø bëët nämmi ni dwön ni talge,

¹² dhaanhø thuwø thøw ni koonyi piny ni ba duu wøk; eni ba päy wala ki man duu maal ki yi thøø këël kanyo ö jap maalli noo ränyge noo tïmge ni bäŋgø këët.

¹³ «Wui, doo beerra man kanï aani yi bwörö, ni cïëgï gø bääta këël kanyo pööth wëërri marï. Doo beerra man cïbï nïne 'moa piny, ni parï wïïï ki aani.

¹⁴ ?Aŋø, ni näk mo dhaanhø othøw, eni cäŋa kwøw këët? Aani, a kurö ki yïth nïne bëët mo bëëtö mara man ni leth en, këël kanyo dee wïïtö mo tägö ri bëëtö mara.

¹⁵ 'Ba aano cwølï, ni løøa gø jïrï; ïïno tïmö niï lääŋŋa aani, ni bee a gïna tïïyï ki cerï.

¹⁶ Køøre ïïno bëëdö niï kwara kwör tieta, ni ba parï wïïï ki raay 'moa.

¹⁷ Raay 'moa obëëdö no okan yo opïr. Ïïni, japa reyø moa tïïa ouumï.

¹⁸ «'Ba kïdi man wø bëëdö na thuur wø pädhö ni tøye na thäŋi, ni nyi kïdi ree wø daae daaø kare.

¹⁹ Pïï, nyeŋ kïte wø køøle køølø, ni ö tørri mar bäät ŋøøm ni käli ya jwïïö. Kaawat manøgønø thuwø, ïïni ŋäädhe mar dhaanhø wø raanynyï raanynyø.

²⁰ Ïïni, ï wø ööa maal bääte ki teek, ni put rwäänyö; ni ö kïdö mare ni wiili ya thøøe.

²¹ Ennø, ki man näk mo wääte ojïtö ki wödö, eni bäŋ gïn mo ŋääe kiper gø, wala wääte otïmö ni geno taaø, eni ba løny ki man joot gø.

²² Eni dëëre bëëdö ni rämö, ni eni kïmmö kiper dëëre keere.»